വീണ്ടുമൊരു ബൂലോക സംഗമം കൂടി.....


തുടരെ തുടരെ കേരളത്തില്‍ ബ്ലോഗ്‌ സംഗമങ്ങള്‍ നടന്നു വരികയാണ്. തിരൂര്‍ തുഞ്ചന്‍ മീറ്റ് വളരെ ആവേശത്തോടെയാണ് ബൂഒലോകര്‍ സ്വീകരിച്ചത്. എന്നാല്‍ വിദേശത്തു അവധിക്കാലം അല്ലാത്തതിനാല്‍ പലര്‍ക്കും മീറ്റില്‍ പങ്കെടുക്കാനാവാത്ത സങ്കടം തീര്‍ക്കുകയാണ് പ്രശസ്ത മലയാളം ബ്ലോഗര്‍മാരായ നാടകക്കാരനും രഞ്ജിത്ത് ചെമ്മാടും ബിജു ആലക്കൊടുമൊക്കെ സംഘാടക സമിതികളായി രൂപീകരിച്ച കണ്ണൂര്‍ സൈബര്‍ മീറ്റ്‌ വഴി. ബ്ലോഗര്‍മാര്‍ക്ക് പുറമേ, ഫെസ് ബുക്ക്‌, ഓര്‍കൂട്ട്, വികി പീഡിയ കമ്മ്യൂണിറ്റികളില്‍ ഉള്ളവരെയും ഉള്‍പ്പെടുത്തിയാണ് കണ്ണൂര്‍ മീറ്റ്‌ സംഘടിപ്പിക്കുന്നത്. തെയ്യത്തിന്റെ നാട്ടില്‍ തെയ്യം തുള്ളും മനോഹര ലോഗോയും സംഘാടകര്‍ തയ്യാറാക്കി കഴിഞ്ഞു. ബ്ല്ലോഗ് സുവനീര്‍ എന്ന പദ്ധതിയാണ് തിരൂര്‍ തുഞ്ചന്‍ മീറ്റിനെ ആവേശം കൊള്ളിച്ചതെങ്കില്‍, ബ്ലോഗ്‌ ഫെസ്റ്റ് എന്ന മറ്റൊരു നൂതന ആശയവുമായാണ്‌ സംഘാടകര്‍ വന്നിരിക്കുന്നത്. കഥ, കവിത, ലേഖനം, ചിത്രരചന, ഫോട്ടോഗ്രാഫി എന്നിങ്ങനെ വിവിധ വിഭാഗങ്ങളില്‍ മത്സരം നടത്തി മികച്ച അഞ്ചു ബ്ലോഗുകള്‍ ഏതെന്ന് കണ്ടെത്തി അവയ്ക്ക് മികച്ച പുരസ്കാരം ഏര്‍പ്പെടുത്തുകയാണ് കണ്ണൂര്‍ സൈബര്‍ മീറ്റില്‍. മീറ്റിനു നമ്മുടെ ബൂലോകം പ്രവര്‍ത്തകരുടെയും അഭ്യുദയ കാംക്ഷികളുടെയും എല്ലാവിധ വിജയാശംസകളും നേരുന്നു. അതോടൊപ്പം സംഘാടക സമിതി അംഗമായ നാടകക്കാരന്‍ എന്ന ബിജു കോട്ടില എഴുതുന്ന ആമുഖ ലേഖനവും താഴെ നല്‍കുന്നു.

നമ്മുടെ ബൂലോകം പത്രാധിപ സമിതി.

കണ്ണൂരിനൊരു സൈബർ മീറ്റ് .:നാടകാക്കാരന്‍

ക്കെ ഒരു പ്രതീക്ഷയായിരുന്നു .. എല്ലാരേം ഒരിക്കൽ കാണണം എന്നത് . എന്നും തമാശപറഞ്ഞും , വഴക്കടിച്ചും, ചിരിച്ചും, തെറിവിളിച്ചും, കരുത്തുറ്റ ചർച്ചകൾ നടത്തിയും ,കാലത്തിന്റെ മാറ്റത്തിനു മുമ്പേ നടക്കുന്നവർ, അവരുടെ ഇടയിൽ കാണാതെ, പരസ്പരം അറിയാതെ അദൃശ്യമായി രൂപപ്പെട്ടുവരുന്ന ഒരു അഗാധ സൌഹൃദം. അത് ഒരു മണിച്ചെപ്പിലെന്ന പോലെ കാത്തു സൂക്ഷിക്കാൻ. വീണ്ടും ഒരു മീറ്റ് എന്നത് യാഥാർത്ഥ്യമാവുകയാണ്. കണ്ണൂരിൽ.

കുട്ടായ്മയുടെയും സ്നേഹത്തിന്റെയും കുന്നായ കണ്ണൂരിലേക്ക് എല്ലാ ബ്ലോഗ്ഗേഴ്സിനും, സൈബർ കൂട്ടായ്മകളിലെ മുഴുവൻ, ആളുകളെയും , സംഘാടക സമിതി അംഗം എന്നനിലയിൽ സ്വാഗതം ചെയ്യുകയാണ്.

ഒരു പക്ഷെ ചെറായി ബ്ലോഗ് മീറ്റ് നടന്ന കാലയളവുതൊട്ടായിരിക്കാം ബൂലോകത്തെ ഞാൻ പരിചയപ്പെടുന്നത്. നിരവധി സൌഹൃദങ്ങൾ അന്നു തൊട്ടിന്നേ വരെ എന്നും ഇടനെഞ്ചിൽ കൊണ്ടു നടക്കുന്നു അന്നു തൊട്ട് തുടങ്ങിയ ആഗ്രഹമാണ്ണ് എല്ലാവരെയും ഒന്നു നേരിൽ കാണാൻ ഒരു മീറ്റിലെത്തുക എന്നത് . അതു കഴിഞ്ഞ് ഇടപ്പള്ളി മീറ്റിൽ വരണം എന്ന് പലരും പറഞ്ഞു. ഇടപ്പള്ളി മീറ്റ് ജൂലൈ മാസത്തിലായിരുന്നു എന്ന് എന്റെ ഓർമ്മ . സമയത്ത് ലീവ് ഏപ്രിലിൽ , ഒരു കാരണവശാലും പങ്കെടുക്കാൻ കഴിയില്ലെന്നത് വല്ലാതെ സങ്കടപ്പെടുത്തി. എന്തു തന്നെ ആയാലും അടുത്ത മീറ്റിനു പങ്കെടുക്കും എന്ന് തീരുമാനിച്ച് ലീവെല്ലാം വളരെ മുൻ കൂട്ടി ജൂലൈ അവസാനത്തിലേക്ക് മാറ്റി.. അപ്പൊ ദേ തുഞ്ചൻ മീറ്റ് വന്നു . ഡേറ്റ് കിടക്കുന്നത് ഏപ്രിൽ 17 , ആലിൻ കായ പഴുക്കുമ്പോ കാക്കയ്ക്ക് വായിൽ പുണ്ണ് എന്ന പോലെ സങ്കടപ്പെടാനേ നിവർത്തിയുള്ളു.. ഇടപ്പള്ളി മീറ്റ് തൊട്ട് മുള്ളൂക്കാരനോടു പറയുന്നതായിരുന്നു, കണ്ണൂർ ഒരു മീറ്റ് വെയ്ക്കണം എന്ന് . പക്ഷെ ആരു മിനക്കെടും ഇതിനൊക്കെ., എന്ന് എന്തു പറഞ്ഞാലും , ഉടക്കുന്ന മുള്ളൂക്കാരൻ. എന്തു ചെയ്യാം ഒടുക്കം തുഞ്ചൻ മീറ്റും കഴിഞ്ഞ സമയത്താണ് എന്നെപ്പോലെ കുറെപ്പേരുണ്ടെന്ന സത്യം ഞാൻ മനസിലാക്കിയത്. അങ്ങിനെ ., ആലക്കോടൻ ചരിതം എന്ന ബ്ലോഗുടമ ബിജുകുമാർ ആലക്കോട് ഒന്നു സൂചിപ്പിക്കുകയായിരുന്നു. സെപ്തമ്പറിൽ ഞാനും നാട്ടിലുണ്ട് അങ്ങിനെയാണെങ്കിൽ ഒരു മീറ്റ് സംഘടിപ്പിച്ചാലോ അതും കണ്ണൂർ ബ്ലോഗർമ്മാരെ മാത്രം വച്ച് .. ചെറിയതോതിൽ മതി എന്നും പറഞ്ഞു . അപ്പൊ പൊട്ടിയ ലഡുവാ മനസിൽ ഇന്നേ വരെ പൊട്ടി തീരാതെ ഓരോ ആൾക്കാരുടെ പ്രതികരണത്തിൽ നിന്നും പൊട്ടിക്കൊണ്ടേ ഇരിക്കുന്നേ ..

ഹല്ലേ ബോൽ എന്ന ബ്ലോഗുടമ ജീവനും ,ആലക്കോടനും പരസ്പരം സംസാരിക്കുകയും , ആവശ്യമായ സഹായങ്ങൾ ചെയ്യാം എന്ന് ജീവനും പറഞ്ഞപ്പോ മറ്റൊന്നും ആലോചിച്ചില്ല ,

ചിത്രകാരനെയും , കുമാരനെയും, വിളിച്ചു കാര്യങ്ങൾ അന്വേഷിച്ചു, എല്ലാവരുടെയും കൂട്ടായ തീരുമാനപ്രകാരം , കണ്ണൂർ മീറ്റ് എന്നത് , വിപുലമായ മീറ്റ് തന്നെ ആകണം എന്ന് ഉറപ്പിക്കുകയും ചെയ്തു. അതിന്റെ .. ഭാഗമായുള്ള പ്രാരംഭ പ്രവർത്തനങ്ങൾ ഇപ്പോൾ തന്നെ തുടങ്ങണം എന്നും. തീരുമാനമായി. ഓണക്കാലമായതിനാൽ നിരവധി ആളുകൾ നാട്ടിലുണ്ടാകുമെന്നറിഞ്ഞതു കൊണ്ട് തന്നെ ഓണം കഴിഞ്ഞ് തൊട്ടടുത്ത ഞായറാഴ്ച തന്നെ നടത്താൻ തീരുമാനിച്ചു. കണ്ണൂർ ജവഹർ ലൈബ്രറി ഹാളിലോ അതോ പുറത്തോ .. നടത്താമെന്നാണു ഉദ്ദേശിക്കുന്നത് അത്തരം കാര്യങ്ങൾ ഫൈനൽ ആകുന്നതേ ഉള്ളൂ തീരുമാനത്തോടുള്ള ബ്ലോഗർമാരുടെ പ്രതികരണം അറിഞ്ഞാൽ മാത്രമേ എത്ര ആൾക്കാർ വരൂ എന്ന് അറിയാൽ കഴിയൂ ബ്ലോഗ് എന്നതിനപ്പുറത്ത് , ഫേസ് ബുക്ക് , കൂട്ടം, ട്വിറ്റർ , ഓർകുട്ട് , എന്നീ എഴുത്തു മേഖലയിലെ സകലരെയും ഒന്നിപ്പിക്കുക എന്നതോടൊപ്പം , മലയാളത്തെയും, മലയാളം ബ്ലോഗിനെയും കൂടുതൽ പേരിലേക്ക് എത്തിക്കുക എന്നതും മീറ്റിന്റെ പ്രധാന ലക്ഷ്യമായി ഉറപ്പിക്കുകയും ചെയ്തു. മീറ്റിനോടനുബന്ധിച്ച് ഒരുമീറ്റ് ഫെസ്റ്റ്എന്ന ആലോചനയും ഉണ്ട് .. അത്തരം കാര്യങ്ങൾ തീരുമാനമാകുന്ന മുറയ്ക്ക് എല്ലാവരെയും അറിയിക്കുന്നതായിരിക്കും. മീറ്റിന്റെ വിജയത്തിലേക്ക് കണ്ണൂരിലെ ആൾക്കാരോടൊപ്പം മറ്റു ജില്ലയിലേ ബ്ലോഗർമ്മാരും തികഞ്ഞ സഹകരണമാണു ഇതിന്റെ നടത്തിപ്പിലേക്ക് നൽകിക്കൊണ്ടിരിക്കുന്നത് . അതു കൊണ്ടു തന്നെ മീറ്റ് ഒരു വൻ വിജയമായിരിക്കും എന്നുള്ളതിൽ തർക്കമില്ലാത്ത കാര്യമാണ് ..ഫേസ് ബുക്കിൽ കണ്ണൂർ സൈബർ മീറ്റ് എന്ന ഒരു ഗ്രൂപ് തുടങ്ങിയിട്ടുണ്ട് http://www.facebook.com/home.php?sk=group_196947790350363&ap=1 . അതോടൊപ്പം തന്നെ മീറ്റിന്റെ വിജയത്തിനും തീരുമാനങ്ങൾ ബ്ലോഗ്ഗർമ്മാരിൽ അറിയിക്കുന്നതിനും ആയി,ഒരു ബ്ലോഗും തുടങ്ങിയിട്ടുണ്ട് . http://kannurmeet.blogspot.com തുടർന്നങ്ങോട്ട് മീറ്റൊരു ചരിത്ര വിജയമാക്കി തീർക്കാൻ മുഴുവൻ ആൾക്കാരുടെയും സഹായ സഹകരണങ്ങൾ പ്രതീക്ഷിച്ചു കൊണ്ട് . എല്ലാവരെയും മീറ്റിലേക്ക് സ്വാഗതം ചെയ്യുന്നു. ലീവും കാര്യങ്ങളും ഒക്കെ മുൻ കൂട്ടി തീരുമാനിക്കുക മീറ്റ് ഗംഭീരമാക്കിത്തരിക .

സ്നേഹത്തോടെ സംഘാടകസമിതിക്കുവേണ്ടി

നാടകക്കാരൻ











യു .എ. ഇ. ബൂലോകരുടെ സംഗമം ഹൃദ്യമായ അനുഭവമായി!

വാഴക്കോടൻ
ദുബായ്: സബീല്‍ പാര്‍ക്കില്‍ വെച്ച് നടന്ന യു എ ഇ ബ്ലോഗര്‍മാരുടെ കുടുംബ സംഗമം ലാളിത്യം കൊണ്ടും പങ്കാളിത്തം കൊണ്ടും ഹൃദ്യമായ ഒരനുഭവമായി. സാധാരണ യു. എ. ഇ. മീറ്റ് സംഘടിപ്പിക്കാറുള്ള സ്ഥിരം സംഘാടകരില്‍ നിന്നും വ്യത്യസ്തമായി പുതുമുഖ ബ്ലോഗര്‍മാര്‍ ഈ പരിപാടി ഏറ്റെടുത്ത് നടത്താന്‍ മുന്നോട്ട് വരുകയും, പരാതികള്‍ക്കിടവരുത്താത്ത രീതിയില്‍ പരിപാടി സംഘടിപ്പിക്കുകയും ചെയ്തു എന്നത് എടുത്ത് പറയേണ്ട കാര്യം തന്നെയാണ്. ചുരുങ്ങിയ ദിവസങ്ങള്‍ക്കുള്ളില്‍ ഇത്തരമൊരു പരിപാടി സംഘടിപ്പിച്ച് വിജയിപ്പിക്കുന്നതില്‍ മീറ്റിന്റെ സംഘാടകര്‍ കാണിച്ച ഊജ്ജസ്വലതയും ആത്മാര്‍ത്ഥതയും അഭിനന്ദനമര്‍ഹിക്കുന്നു.

മലയാളം ബ്ലോഗേര്‍സ് ഗ്രൂപ്പ് എന്ന് ഫേസ് ബുക്ക് ഗ്രൂപ്പിലെ കൂടി അംഗങ്ങളായ ഇസ്മയില്‍ ചെമ്മാട്, ഷെബീര്‍-തിരിച്ചിലാന്‍, അനില്‍കുമാര്‍ സി പി, ശ്രീജിത്ത് കൊണ്ടോട്ടി, സുല്‍ഫിക്കര്‍ തുടങ്ങിയവര്‍ ഒരു ബ്ലോഗ് മീറ്റ് സംഘടിപ്പിക്കാന്‍ തീരുമാനിക്കുകയും, അത് പിന്നീട് യു. എ. ഇ. യിലെ എല്ലാ ബ്ലോഗര്‍മാരേയും, ബസ്സര്‍മാരേയും, കൂട്ടം, ഫേസ്ബുക്ക് തുടങ്ങി സോഷ്യല്‍ നെറ്റ്‌വർക്കിങ്ങ് ഗ്രൂപ്പിലുള്ളവരേയും ഉള്‍പ്പെടുത്തി വിപുലമായ ഒരു സംഗമമായി രൂപപ്പെടുകയായിരുന്നു. ഇത്തരം ഒരു കൂടിച്ചേരലിന്റെ അവശ്യം മുന്നോട്ട് വന്നപ്പോള്‍ യുഎഇയിലെ ബൂലോകരുടെ സംഗമം എന്ന ബ്ലോഗില്‍ മീറ്റ് അറിയിച്ച് കൊണ്ട് പോസ്റ്റ് ഇടുകയും അതിന് അഭൂതപൂര്‍വ്വമായ പ്രതികരണം ഉണ്ടാവുകയും, പിന്നീട് സംഘാടനം കൊണ്ട് ശ്രദ്ധേയമാവുകയുമായിരുന്നു ഈ കുടുംബ സംഗമം.

ദുബൈയിലെ സബീല്‍ പാര്‍ക്കില്‍ രാവിലെ ഒന്‍പത് മണിക്ക് തന്നെ സംഘാടകര്‍ എത്തുകയും, കൂടിയിരിക്കാന്‍ സൗകര്യമുള്ള സ്ഥലം കണ്ടെത്തുകയും അവിടെ ബാനര്‍ കെട്ടി ഒരു വേദി ഒരുക്കുകയുമായിരുന്നു. പത്തരയോട് കൂടി ബ്ലോഗര്‍മാര്‍ ഏറെക്കുറെ എത്തുകയും യാതൊരു വിധ ഔപചാരികതയും ഇല്ലാതെ തന്നെ ബ്ലോഗ് മീറ്റ് ആരംഭിക്കുകയും ചെയ്തു. മരത്തണലില്‍ കൂടിയിരുന്നവര്‍ പരസ്പരം പരിചയപ്പെടുത്തിയും പരിചയപ്പെട്ടും സംഗമം ആരംഭിച്ചു.

മലയാള ബ്ലോഗിന്റെ ഗ്രാഫ് മുകളിലേക്ക് ഉയരുന്നില്ലെന്നും, ബ്ലോഗിനേക്കാല്‍ പ്രാധാന്യം ഫേസ്ബുക്കും ഗൂഗിള്‍ ബസ്സുകളും കയ്യടക്കുന്നു എന്നും ചര്‍ച്ചയില്‍ കൈപ്പള്ളി എന്ന ബ്ലോഗര്‍ ഉന്നയിക്കുകയുണ്ടായി.എങ്കിലും ഗൂഗിള്‍ ബസ്സിലോ ഫേസ്ബുക്കിലോ നടത്തുന്ന കാര്യമാത്ര പ്രസക്തമായ ചര്‍ച്ചകളും നോട്ടുകളുമെല്ലാം പിന്നീട് സെര്‍ച്ച് ചെയ്ത് കണ്ടെത്താനാവില്ല എന്ന ന്യൂനത മുന്നിര്‍ത്തി അത്തരം ലേഖനങ്ങള്‍ ബ്ലോഗില്‍ മാത്രം പ്രസിദ്ധീകരിക്കാനും, ബ്ലോഗ് ഫേസ്ബുക്ക് ഗൂഗിള്‍ ബസ് എന്നിവയുമായി കണക്റ്റ് ചെയ്ത് കൂടുതല്‍ വായനക്കാരില്‍ എത്തിക്കാന്‍ എല്ലാവരും ശ്രമിക്കണമെന്നും കൈപ്പള്ളി അഭിപ്രായപ്പെട്ടു.

ബസ്സിന്റേയും ഫേസ് ബുക്കിന്റേയും ആരവത്തില്‍ മുങ്ങിപ്പോയ ബ്ലോഗിലേക്ക് കൂടുതല്‍ ആളുകളെ ആകര്‍ഷിക്കുവാനും ബ്ലോഗിനെ പുനരുജ്ജീവിപ്പിക്കാനും എല്ലാ ബ്ലോഗര്‍മാരും പ്രയത്നിക്കണമെന്നും കിച്ചു ഓര്‍മ്മിപ്പിച്ചു. ഇപ്പോള്‍ എഴുത്ത് നിര്‍ത്തിവെച്ചിരിക്കുന്ന എല്ലാരും തന്നെ താല്‍ക്കാലികമായ ഈ മാന്ദ്യം അവസാനിപ്പിച്ച് ഉണര്‍ന്നെണീക്കണമെന്നും അവര്‍ അപേക്ഷിക്കുകയുണ്ടായി

മലയാള ബ്ലോഗ് വളരുന്നില്ല എന്ന പരാതികള്‍ക്കിടയിലും ബ്ലോഗ് മീറ്റുകളിലെ വര്‍ദ്ധിച്ച പങ്കാളിത്വം ബ്ലോഗിങ്ങിന് ശുഭസൂചനയാണ് നല്‍കുന്നതെന്ന് തിരൂര്‍ തുഞ്ചന്‍ മീറ്റിലും യു എ ഇ മീറ്റിലും പങ്കെടുത്ത അനുഭവ സാക്ഷ്യവുമായി വാഴക്കോടന്‍ വെളിപ്പെടുത്തി. പുതിയ തലമുറ ബ്ലോഗിലേക്ക് കടന്ന് വരാന്‍ ഓരോരുത്തരും അവരാല്‍ കഴിയുന്നത് പോലെ പരിശ്രമിക്കണമെന്നും, പുതിയ ആളുകളെ പ്രോത്സാഹിപ്പിക്കണമെന്നും വാഴക്കോടന്‍ അറിയിച്ചു. എന്നാല്‍ ചിലര്‍ നടത്തുന്ന അനാവശ്യ വിവാദങ്ങളെ നിസാരമായി കാണാനും, അത്തരം വിവാദങ്ങള്‍ ആരോഗ്യകരമായ പ്രവര്‍ത്തനങ്ങള്‍ക്ക് പ്രചോദനമാവണമെന്നും അല്ലാതെ അതിന്റെ പേരില്‍ മുതലെടുപ്പുകള്‍ നടത്തുന്നത് നല്ല പ്രവണതയല്ല എന്നും വാഴക്കോടന്‍ കൂട്ടിച്ചേര്‍ത്തു. ഇറാഖില്‍ നിന്നും നാട്ടിലേക്ക് പോകുന്ന വഴി മീറ്റില്‍ പങ്കെടുത്ത ആചാര്യന്‍ എന്ന ഇംത്യാസ്, ബ്ലോഗും ഫേസ്ബുക്കുമെല്ലാം കൂടുതല്‍ ജനകീയമാവണമെന്നും, സമൂഹത്തിന് ഗുണപ്രദമാകുന്ന രീതിയില്‍ ഇവ മാറ്റിയെടുക്കാന്‍ ശ്രമിക്കണമെന്നും തന്നെ പരിചയപ്പെടുത്തിക്കൊണ്ട് പറഞ്ഞു.

അനില്‍കുമാർ, ‍,ചന്ദ്രകാന്തം എന്നിവര്‍ ബ്ലോഗ് സുവനീര്‍ പുറത്തിറക്കുന്നതിനെ പറ്റി പ്രതിപാദിക്കുകയും, സുവനീര്‍ ആവശ്യക്കാര്‍ക്ക് എത്തിക്കാനുള്ള വിലാസങ്ങള്‍ തയ്യാറാക്കുകയും ചെയ്തു.ഉമ്പാച്ചു എന്ന ബ്ലോഗറുടെ കവിതാ പുസ്തകങ്ങള്‍ ആവശ്യക്കാര്‍ക്ക് ലഭ്യമാക്കാനുള്ള സാഹചര്യവും ഒരുക്കിയിരുന്നു.

ആദ്യാക്ഷരി അപ്പുവും ഫോട്ടോഗ്രാഫര്‍ നൗഷാദും ചേര്‍ന്ന് ഫോട്ടോ ബ്ലോഗര്‍മാര്‍ക്ക് ഫോട്ടോ എടുക്കുന്നതിനെ കുറിച്ച് ആധികാരികമായി ചില ടിപ്സും,ഫോട്ടോയെടുക്കുമ്പോള്‍ ശ്രദ്ധിക്കേണ്ട കാര്യങ്ങളെ കുറിച്ചും വിവരണം നല്‍കുകയുണ്ടായി.

ഇപ്പൊഴും ഭാവിയിലും വളരെയധികം ഉപകാരപ്രദമായേക്കാവുന്ന “ പദമുദ്ര” എന്ന പ്രോജക്റ്റിലേക്ക് കൂടുതല്‍ പദങ്ങളോടെ എല്ലാവരും സഹകരിക്കണമെന്ന് അതിന്റെ സാരഥിയായ സിദ്ധാര്‍ഥന്‍ അഭ്യര്‍ത്ഥിച്ചു.

ഭക്ഷണ ശേഷം പാട്ടും കളികളും ക്വിസ് മത്സരങ്ങളും, നര്‍മ്മ ക്വിസ് മത്സരങ്ങളും ആസ്വാദനത്തിന്റെ പുത്തന്‍ അനുഭവങ്ങളായി മാറി. കുറുമാന്റെ സാന്നിദ്ധ്യം സദസ്സിനെ ഏറെ ചിരിപ്പിക്കുകയും ആകര്‍ഷിക്കുകയും ചെയ്തു. വിശാലമനസ്ക്കൻ‍, തമനു, ഇത്തിരിവെട്ടം, സിദ്ധാര്‍ത്ഥന്‍, സുനിൽ‍, കനൽ‍, അഗ്രജന്‍, സുൽ‍, അലിയു, രഹ്‌ന, അപ്പു, ഷംസുക്ക ..........തുടങ്ങി ബ്ലോഗ് രംഗത്തേക്ക് ആദ്യം കടന്നെത്തിയ ഇവരുടെ സാന്നിദ്ധ്യം പുതിയ തലമുറക്ക് ആശ്ചര്യവും പ്രചോദനവുമായി. അവരെ പരിചയെപ്പെടാനും കൂടുതല്‍ അറിയാനും ഈ ബ്ലോഗ് മീറ്റ് വഴിയൊരുക്കിയതില്‍ എല്ലാവരും ഐക്യകണ്ഠേന സംഘാടകരെ അനുമോദിച്ചു. ഇനിയും ഇത്തരം ബ്ലോഗ് മീറ്റുകളില്‍ നിര്‍ബന്ധ സാന്നിദ്ധ്യമായിരിക്കുമെന്ന് ഓരോ ബ്ലോഗര്‍മാരും ആണയിട്ട് കൊണ്ടാണ് ഈ കുടുംബ സംഗമം അവസാനിപ്പിച്ച് എല്ലവരും അഞ്ച് മണിയോടെ പിരിഞ്ഞ് പോയത്.

ഓരോ ബ്ലോഗ് മീറ്റിലേയും പങ്കാളിത്തം മലയാള ബ്ലോഗിന് തീര്‍ച്ചയായും ഉയര്‍ച്ചയും ബ്ലോഗിങ്ങിന്റെ സ്വീകാര്യത കൂടുതല്‍ പേരില്‍ എത്തുന്നുണ്ട് എന്ന് തന്നെയാണ് ഇത്തരം ബ്ലോഗര്‍മാരുടെ സംഗമങ്ങളില്‍ നിന്നും ഉരുത്തിരിയുന്നത്. ഭാവിയിലും ഇത്തരം ബ്ലോഗ് മീറ്റുകള്‍ മലയാളം ബ്ലോഗിന്റെ വളര്‍ച്ചയ്ക്ക് മികച്ച പിന്തുണ നല്‍കുമെന്നും നിസ്സംശയം പറയാവുന്നതാണ്.

പോപ്പുലർ പോസ്റ്റുകൾ