മൂന്ന് പഠനശിബിരങ്ങൾ

നിരക്ഷരൻ
-മലയാളത്തിൽ, എന്തുകൊണ്ടും ഉണർവ്വ് ഉണ്ടാക്കാൻ പോകുന്ന വർഷം തന്നെയാണെന്ന് 2011 എന്ന് ഇതുവരെ കാണാനായ പ്രവർത്തനങ്ങളിൽ നിന്ന് വിലയിരുത്തുന്നതിൽ തെറ്റില്ലെന്ന് തോന്നുന്നു. കഴിഞ്ഞ വർഷം ഡിസംബർ മാസം 14ന് ഇ-ഭാഷാ സെമിനാർ സംഘടിപ്പിച്ചുകൊണ്ട് ഇതേ വിഷയത്തിൽ സാഹിത്യ അക്കാഡമി കാണിച്ച താല്‍പ്പര്യം ബൂലോകർ നല്ല രീതിയിൽ ഉൾക്കൊള്ളുകയും, തുടർന്നും ഇത്തരം പ്രവർത്തനങ്ങൾ ഉണ്ടാകണമെന്ന് കാണിച്ച് ഒരു ഹർജി സാഹിത്യ അക്കാഡമി സമക്ഷം സമർപ്പിക്കണമെന്ന് ആദ്യശില്‍പ്പശാലയുടെ സംഘാടകനായിരുന്ന ശ്രീ കെ.എച്ച്.ഹുസൈൻ ആവശ്യപ്പെട്ടതനുസരിച്ച് ഹർജി തയ്യാറാക്കുകയുമുണ്ടായി. ഒരു മാസം കാലയളവിൽ 1000 ൽ അധികം ഒപ്പുകളാണ് ആ ഹർജിയിലേക്ക് ശേഖരിക്കപ്പെട്ടത്.


പ്രസ്തുത ഭീമഹർജിയുടെ പ്രിന്റ് എടുത്ത് ബൂലോകർ തന്നെ അത് അക്കാഡമിക്ക് സമർപ്പിക്കുന്നതിന് മുന്നേ തന്നെ അക്കാഡമി പ്രസിഡന്റ് വത്സല ടീച്ചറുടെ നിർദ്ദേശപ്രകാരം അക്കാഡമി ലൈബ്രേറിയൻ അത് പ്രിന്റ് എടുത്ത് രേഖയായി സ്വീകരിക്കുകയും, അതിന്റെ തുടർനടപടി എന്ന നിലയ്ക്ക് പീച്ചിയിൽ വെച്ച് കൂടുതൽ കാര്യക്ഷമമായ ഒരു ക്യാമ്പ് സംഘടിപ്പിക്കുന്നതിനായി ആശയവിനിമയങ്ങൾ നടത്തിക്കൊണ്ടിരിക്കുകയാണ്. ഉടനെ തന്നെ മറ്റൊരു നല്ല സെമിനാർ ഉണ്ടാകുമെന്നും അത് കൂടുതൽ പ്രയോജനപ്രദമാകുമെന്ന് കരുതാം.

അതിനിടെ ഇക്കഴിഞ്ഞ ദിവസങ്ങളിൽ കേരളത്തിൽ നടന്ന 3 പഠനശിബിരങ്ങളെപ്പറ്റിയുള്ള എന്റെ അനുഭവങ്ങൾ ഇവിടെ കുറിക്കട്ടെ.

19 ഫെബ്രുവരി 2011

എറണാകുളത്ത് ടോക്ക് എച്ച് സ്കൂളിൽ വെച്ച് നടന്ന വിക്കിപീഡിയ പഠനശിബിരത്തിൽ 30ന് അടുക്കെ പങ്കാളിത്തമുണ്ടായിരുന്നു. യഥാസമയം പഠനശിബിരത്തിൽ പങ്കെടുക്കാനാവാതെ പോയവർ അടുത്ത വിക്കി പഠനശിബിരം എവിടെയാണെന്ന് ചോദിച്ചുകൊണ്ട് ഇപ്പോഴും ബന്ധപ്പെട്ടുകൊണ്ടിരിക്കുകയാണ്. ആശാവഹമായ ഒരു കാര്യമായി ഇതിനെ കാണാതെ വയ്യ.

എറണാകുളം വിക്കി പഠനശിബിരം
അനൂപും ഡോ:ഫുആദ്‌ഉം ക്ലാസ്സെടുക്കുന്നു.
ഒരു ഗ്രൂപ്പ് ഫോട്ടോ (ഭാഗികം)
എറണാകുളം വിക്കിയിൽ ക്ലാസ്സ് എടുക്കാനായി ബാംഗ്ലൂരുനിന്ന് എത്തിയ അനൂപിനും, കൊല്ലത്തുനിന്നെത്തിയ ഡോ:ഫുആദ്നുമൊപ്പം വളരെ താല്‍പ്പര്യത്തോടെ പങ്കെടുത്ത സീനിയർ പൗരന്മാർ അടക്കമുള്ള എല്ലാ പഠിതാക്കൾക്കും നന്ദി. കൊച്ചി റിഫൈനറി എന്ന വിക്കിപീഡിയ താൾ ഉണ്ടാക്കിക്കൊണ്ടാണ് വിക്കി പഠനം നടത്തിയത്. എറണാകുളം വിക്കി പഠനശിബിരത്തെക്കുറിച്ച് കൂടുതൽ മനസ്സിലാക്കാൻ ഇതുവഴി പോകുക.

20 ഫെബ്രുവരി 2011

വയനാട്ടിലെ കുറുവയിൽ വെച്ച് ലൈബ്രറി കൗൺസിലിന്റെ നേതൃത്വത്തിൽ നടക്കുന്ന ഇ-ഭാഷാ പഠന ക്യാമ്പിലേക്ക് ക്ഷണം കിട്ടിയപ്പോൾ സ്ഥിരതാവളമായ വയനാട്ടിലേക്ക് പോകാമെന്ന സന്തോഷത്തിനപ്പുറം, ലൈബ്രറി മാനേജ്മെന്റ് സിസ്റ്റത്തിൽ തന്റേതായ നിസ്വാർത്ഥ സേവനങ്ങൾ നൽകിയിട്ടുള്ള, അല്ലെങ്കിൽ ഇത്തരം കാര്യങ്ങൾക്കായി ജീവിതത്തിലെ നല്ലൊരു പങ്ക് സമയവും ചിലവഴിക്കുന്ന ശ്രീ കെ.എച്ച്.ഹുസൈന്റെ ക്ലാസ്സിൽ പങ്കെടുക്കാമെന്ന സന്തോഷവും ഉണ്ടായിരുന്നു.
ശ്രീ കെ.എച്ച്.ഹുസൈൻ ക്ലാസ്സ് എടുക്കുന്നു.
ദ്വിദിന ക്യാമ്പിന്റെ രണ്ടാം ദിവസം, ബ്ലോഗിങ്ങ് വിക്കിപീഡിയ എന്നീ വിഷയങ്ങൾക്കായി മാറ്റിവെച്ചിരിക്കുകയായിരുന്നു. ശ്രീ കെ.എച്ച് ഹുസൈൻ, ഡി.പ്രദീപ്‌കുമാർ, ചിത്രകാരൻ, മൈന ഉമൈബാൻ, സുനിൽ കെ.ഫൈസൽ, മുള്ളൂർക്കാരൻ, ഹബീബ്, നന്ദകുമാർ, ജോഹർ എന്നിവർക്കൊപ്പം സെമിനാറിൽ പങ്കെടുക്കാനായത് അതിയായ സന്തോഷത്തിനിടയാക്കി.

ഹുസൈൻ സാർ വളരെ വിശദമായിത്തന്നെ ലൈബ്രറി മാനേജ്മെന്റ് സിസ്റ്റം എന്ന വിഷയത്തെപ്പറ്റി സംസാരിച്ചു. അതിനായി തയ്യാറാക്കിയ സോഫ്റ്റ്‌വെയറിന്റെ ഉപയോഗം പ്രസന്റേഷനായി അവതരിപ്പിക്കപ്പെടുകയും ചെയ്തു.

ഇന്റർനെറ്റിന്റെ വേഗത അല്‍പ്പം കുറവായിരുന്നെങ്കിലും,  മെയിൽ ഐഡി എങ്ങനെ ഉണ്ടാക്കാം, ബ്ലോഗ് എങ്ങനെ ഉണ്ടാക്കാം എന്നതൊക്കെ  മുള്ളൂക്കാരൻ ഓൺലൈനായിത്തന്നെ അവതരിപ്പിച്ചു.

മുള്ളൂക്കാരന്റെ ബ്ലോഗ് ക്ലാസ്സ്

വിക്കിപീഡിയയെപ്പറ്റിയുള്ള പഠനം നടത്തിയത് ഹബീബാണ്. കുറുവയ്ക്ക് തൊട്ടടുത്തുള്ള പാക്കം എന്ന സ്ഥലത്തെപ്പറ്റിയുള്ള താൾ ഉണ്ടാക്കിക്കൊണ്ട് ഹബീബ് തന്റെ ജോലി ഭംഗിയായി നിർവ്വഹിച്ചു.
ഹബീബിന്റെ വിക്കിപീഡിയ ക്ലാസ്സ്
വയനാട്ടിലെ ആദിവാസി സഹജീവികൾക്കായി അഹോരാത്രം അദ്ധ്വാനിക്കുന്ന കുഞ്ഞഹമ്മദിക്കയും ചടങ്ങിൽ സന്നിഹിതനായിരുന്നു. അദ്ദേഹത്തെപ്പറ്റി പബ്ലിഷ് ചെയ്തിരിക്കുന്ന ബ്ലോഗ് പോസ്റ്റ് ഓൺലൈനായി കാണിച്ചുകൊടുത്തുകൊണ്ടുതന്നെ വയനാട്ടുകാർക്ക് അദ്ദേഹത്തെ നേരിട്ട് പരിചയപ്പെടുത്തിക്കൊടുക്കാനായി.

സന്നിഹിതരായിരുന്ന ബ്ലോഗേഴ്സ്
സമയപരിമിതി കാരണം സെമിനാറിന്റെ അവസാനഭാഗം മൈന ഉമൈബാന്റേയും ഈയുള്ളവന്റേയും സംസാരം പെട്ടെന്നുതന്നെ അവസാനിപ്പിക്കേണ്ടി വന്നു. അല്‍പ്പം വൈകിയുള്ള ഉച്ചഭക്ഷണത്തിനുശേഷം എല്ലാവരും സ്വന്തം നാടുകളിലേക്ക് മടങ്ങി.

22 ഫെബ്രുവരി 2011

കൊടുങ്ങല്ലൂർ കുഞ്ഞിക്കുട്ടൻ തമ്പുരാൻ കോളേജിൽ 22, 23 തീയതികളിൽ സ്വതന്ത്ര മലയാളം കമ്പ്യൂട്ടിങ്ങ് ക്യാമ്പ് ഉണ്ടെന്നും സ്ഥലത്തുണ്ടെങ്കിൽ പങ്കെടുക്കണമെന്നും ഹുസൈൻ സാർ വളരെ മുന്നേ തന്നെ അറിയിച്ചിരുന്നതാണ്. ക്യാമ്പിലെ ഒരു കാഴ്ച്ചക്കാരനായി പങ്കെടുക്കാം എന്ന് കരുതിയിരുന്നെകിലും കോളേജിൽ എത്തിയപ്പോൾ സ്ഥിതി അങ്ങനൊന്നുമല്ലായിരുന്നു. വിക്കിപീഡിയ, ബ്ലോഗ് എന്നീ വിഷയങ്ങളെക്കുറിച്ച് സംസാരിക്കണമെന്ന ആവശ്യം അനുസരിക്കാതെ നിവൃത്തിയില്ലായിരുന്നു. സദസ്സിലുള്ള കുട്ടികളിൽ നല്ലൊരു ഭാഗത്തിന് ബ്ലോഗ്, വിക്കിപീഡിയ, ഫേസ്‌ബുക്ക് എന്നീ കാര്യങ്ങളെപ്പറ്റി കാര്യമായി ധാരണയുള്ളവരായിരുന്നെന്നത് ഗുണകരമായിത്തോന്നി.

സൂരജ് കെന്നോത്തിന്റെ നേതൃത്വത്തിലുള്ള ക്യാമ്പിന്റെ ഔദ്യോഗിക ചടങ്ങിൽ പ്രിൻസിപ്പാൾ, മലയാളം വിഭാഗം മേധാവി ശ്രീമതി സുബൈദ ടീച്ചർ, ശ്രീ, പി.പി.രാമചന്ദ്രൻ, ശ്രീ അൻ‌വർ അലി എന്നിവർ സംസാരിച്ചു. മഹാരാജാസ് കോളേജ് മലയാളം വിഭാഗം അദ്ധ്യാപിക ഉഷാകുമാരി ടീച്ചറും, നാട്ടിക എസ് എൻ. കോളേജ് മലയാളം വിഭാഗം അദ്ധ്യാപിക കുശലകുമാരി ടീച്ചർക്കുമൊപ്പം റെഡ് ഹാറ്റ് എന്ന കമ്പനിയുടെ പ്രതിനിധിയായി അനി പീറ്ററും,  ചടങ്ങിൽ സംബന്ധിച്ചു.
ശ്രീ. സൂരജ്, ബഹു: പ്രിൻസിപ്പാൾ, ശ്രീമതി സുബൈദ ടീച്ചർ. ശ്രീ ഹുസൈൻ

ശ്രീ പി.പി.രാമചന്ദ്രൻ സംസാരിക്കുന്നു.
ശ്രീ അൻ‌വർ അലി സംസാരിക്കുന്നു.
നിരക്ഷരന്റെ ഊഴം
സദസ്സ്
തുടർന്ന് കാന്റീനിലെ ഉച്ചഭക്ഷണത്തിനുശേഷം ക്യാമ്പസിലെ ഒരു മാവിൻ‌ചുവട്ടിൽ എല്ലാവരും ഇരുപ്പുറപ്പിച്ചു. അനി പീറ്ററും സൂരജും തങ്ങളുടെ കർത്തവ്യത്തിലേക്ക് കടന്നു. സ്വതന്ത്രസോഫ്റ്റ്‌വെയറുകളെക്കുറിച്ച് കുട്ടികളെ ബോദ്ധ്യപ്പെടുത്തുന്നതിനൊപ്പം അതിലെ മലയാളം വേർഷന് ആവശ്യമായതും ഉചിതമായതുമായ മലയാള പദങ്ങൾ നിർദ്ദേശിക്കുക എന്ന ജോലിയിലേക്ക് എല്ലാവരും കടന്നു. വളരെ ശ്രമകരമായ ഒരു കർമ്മം തന്നെയാണതെന്ന് താമസിയാതെ തന്നെ എല്ലാവരും മനസ്സിലാക്കി. എന്നിരുന്നാലും ചില നല്ല പദങ്ങൾ നിർദ്ദേശിക്കാൻ കുട്ടികൾക്കായി.
ക്യാമ്പസ് മാവിന് ചുവട്ടിൽ ഒരു ഇ-മലയാളം ശില്‍പ്പശാല
800 ൽ അധികം പദങ്ങൾക്ക് ഉചിതമായ നിർദ്ദേശങ്ങൾ നൽകുക എന്നത് ഒന്നോ രണ്ടോ ദിവസം കൊണ്ട് നടക്കുന്ന കാര്യമല്ലെന്നത് വ്യക്തമായിരുന്നു. കേരളത്തിൽ ഏതെങ്കിലും ഒരു വിദ്യാലയത്തിൽ ആദ്യമായി നടക്കുന്ന ഒരു സംരംഭം എന്ന നിലയിൽ...ഹുസൈൻ സാറിന്റെ വാക്കുകളിൽ പറഞ്ഞാൽ, മലയാള ഭാഷയുടെ ചരിത്രത്തിൽത്തന്നെ പ്രാധാന്യമർഹിക്കുന്ന ഒരു ചടങ്ങിനാണ് ആ തണൽമരവും ക്യാമ്പസും സാക്ഷ്യം വഹിച്ചത്.

അനി പീറ്ററും സൂരജും ക്ലാസ്സെടുക്കുന്നു.
പ്രൊജൿറ്റർ ഉപയോഗിച്ച് കൂടുതൽ വിശദമായി കാര്യങ്ങൾ അവതരിപ്പിക്കേണ്ട ആവശ്യത്തിലേക്കായി എല്ലാവരും ഒരു ക്ലാസ്സ് മുറിയിലേക്ക് നീങ്ങി. വൈകുന്നേരം സെമിനാറിന്റെ ആദ്യദിവസം ക്യാമ്പസിനകത്ത് അവസാനിക്കുമ്പോഴേക്കും പദങ്ങൾ ചിട്ടപ്പെടുത്തുന്നതിലേക്ക് വ്യക്തവും കൃത്യവുമായ ഒരു മെത്തഡോളജി തന്നെ രൂപപ്പെടുത്തി എടുക്കാനായെന്നത് ശ്രദ്ധേയമായി. എന്നിരുന്നാലും കുറേക്കൂടെ ഗൗരവതരമായ ഒരു ചർച്ച ആവശ്യമെന്ന് കണ്ടതിനാൽ കോളേജിന്റെ തൊട്ടടുത്ത് തന്നെയുള്ള സുബൈദ ടീച്ചറിന്റെ വീട്ടിലേക്ക് എല്ലാവരും നീങ്ങി.
സുബൈദ ടീച്ചറിന്റെ വീട്ടിലെ ചർച്ച
ടീച്ചറുടെ വീട്ടിൽ നടന്ന ചർച്ചയ്ക്ക് ഹുസൈൻ സാറും രാമചന്ദ്രൻ സാറും നേതൃത്വം നൽകി. ഭാഷയെപ്പറ്റി കമ്പ്യൂട്ടറിൽ ഉപയോഗിക്കുന്ന ഇംഗ്ലീഷ് പദങ്ങൾക്ക് തത്തുല്യമായ അർത്ഥവത്തായ മലയാളപദങ്ങൾ കണ്ടുപിടിക്കുന്നതിനെപ്പറ്റിയുള്ള ചർച്ച, പദങ്ങളുടെ നാൾവഴി എന്ന രീതിയിൽത്തന്നെ മുന്നോട്ട് നീങ്ങി. മലയാളത്തിൽ നമുക്ക് സ്വന്തമായുള്ള പല മനോഹരമായ പദങ്ങളും എത്രയോ കാലങ്ങൾക്ക് മുന്നേ തന്നെ നാം നടതള്ളി, പകരം ഇംഗ്ലീഷ് പദങ്ങളുമായി പൊരുത്തപ്പെട്ടുകഴിഞ്ഞിരിക്കുന്നു എന്നത് ഒരു ഞെട്ടലോടെ തന്നെ മനസ്സിലാക്കേണ്ടിവന്നു.

ഉദാഹരണത്തിന് ബലൂൺ എന്ന പദം. ബലൂണിന് പകരം വീർപ്പ (വീർപ്പിക്കുന്നത് എന്തോ അത്) എന്നൊരു പദം നമുക്ക് സ്വന്തമായിട്ടുണ്ട്. ഞാനത് കേൾക്കുന്നത് തന്നെ ആദ്യമായിട്ടായിരുന്നു. വിസിലിന് വിളിപ്പ, പമ്പരത്തിന് തിരിപ്പ എന്നിങ്ങനെയൊക്കെ മറ്റ് പദങ്ങൾ ഉണ്ടെന്നുള്ളത് മനസ്സിലാക്കിത്തന്നതിന് രാമചന്ദ്രൻ സാറിന് നന്ദി.

പ്രവർത്തനങ്ങൾ കൂടുതൽ ശക്തമായി മുന്നോട്ട് നീക്കുന്ന ആവശ്യത്തിലേക്കായി അവിടെ കൂടിയിരുന്ന എല്ലാവരേയും ചേർത്ത് മെയിലിങ്ങ് ഗ്രൂപ്പ് ഉണ്ടാക്കുകയും 4 മാസത്തിൽ ഒരിക്കലെങ്കിലും നേരിൽ സമ്മേളിക്കുകയും മാസത്തിൽ ഒരിക്കലെങ്കിലും ഓൺലൈനിൽ സമ്മേളിക്കുകയും ചെയ്യണമെന്ന നിബന്ധനയിൽ രാമചന്ദ്രൻ സാറിനെ കൺ‌വീനർ ആക്കിക്കൊണ്ട് ഒരു സമിതി തന്നെ രൂപീകരിക്കപ്പെട്ടു. കോളേജിലെ കുട്ടികളുടെ കൈയ്യിൽ നിന്ന് ഫെബ്രുവരി 23ന് ശേഖരിക്കുന്നതടക്കം അനി പീറ്റർ അയച്ചുതരുന്ന 25  പദങ്ങൾ വീതം, എല്ലാവരും സ്വന്തം സുഹൃദ്‌വലയങ്ങളിലും മറ്റും ചർച്ച ചെയ്ത് കൂടുതൽ നല്ല മലയാളം പദങ്ങൾ നിർദ്ദേശങ്ങളായി മുന്നോട്ട് വെക്കുകയും അതിൽ നിന്ന് വളരെ നല്ല ഓരോ പദം വീതം തിരഞ്ഞെടുക്കുകയും ചെയ്യണമെന്ന് തീരുമാനമായി. ഈ ആവശ്യത്തിലേക്കായി തമിഴ്, കന്നട, ഹിന്ദി എന്നീ പ്രാദേശിക ഭാഷകൾ എത്തരത്തിലുള്ള പദങ്ങളാണ് ഉപയോഗിച്ചിരിക്കുന്നത് എന്ന താരതമ്യ പഠനം നടത്തുന്നതിലേക്കായി മറ്റ് ഭാഷാ പദങ്ങൾ അയച്ചുതരേണ്ട ചുമതല അനി പീറ്റർ ഏറ്റെടുത്തു.

ഫെബ്രുവരി 21 മാതൃഭാഷാ ദിനമായിരുന്നു. 19,20,22 തീയതികളിൽ വളരെ മനോഹരമായി അത് ആഘോഷിക്കപ്പെട്ടതുപോലെ. ഓൺലൈനിലൂടെ, ഇ-എഴുത്തിലൂടെ, ഭാഷയുടെ വളർച്ചയ്ക്ക് ഒരുപാട് സാദ്ധ്യതകൾ തെളിഞ്ഞുവന്നുകൊണ്ടിരിക്കുകയാണ്. ഇതൊരു ശക്തമായ മുന്നേറ്റമായി മാറിക്കഴിഞ്ഞിരിക്കുന്നു. ചായയും പഴമ്പൊരിയും സമൂസയുമൊക്കെ കഴിച്ച് സുബൈദ ടീച്ചറുടെ വീട്ടിൽ നിന്ന് എല്ലാവരും പിരിയാൻ തുടങ്ങിയപ്പോൾ കാലം തെറ്റിയെന്നോണം തകർത്ത് പെയ്ത മഴ ശുഭസൂചകമായിത്തന്നെയാണ് എനിക്ക് തോന്നിയത്.
നമതിനെ സിയ ഇന്റർവ്യൂ ചെയ്യുന്നു.

നമതിനെ സിയ ഇന്റർവ്യൂ ചെയ്യുന്നു.

വ്യത്യസ്തമായ എഴുത്തിലൂടെ ശ്രദ്ധേയനായ ബ്ലോഗറാണ് നമത്. ഓരോ പോസ്റ്റും ഒരു കുഞ്ഞു കഥ പോലെ അല്ലെങ്കില്‍ കവിതപോലെ മനോഹരം.. വാക്കുകള്‍ തീയായും കാറ്റായും മഞ്ഞായുമൊക്കെ വായനക്കാരന്റെ ഹൃദയങ്ങളിലേക്ക് പെയ്തിറങ്ങുന്നു. ഇവിടെ നമതിനെ ഇന്റര്‍വ്യൂ ചെയ്യുന്നത് ബ്ലോഗിലും ബസ്സിലുമെല്ലാം നിറഞ്ഞ സാന്നിധ്യമായ, നമുക്കെല്ലാം പ്രിയങ്കരനായ സിയ. ഒരുപാട് നന്ദി. അഭിമുഖം അനുവദിച്ച നമതിനും, അത് വളരെ ഭംഗിയായി തന്നെ നിര്‍വഹിച്ച സിയയ്ക്കും. 

- നമ്മുടെ ബൂലോകം ടീമിനു വേണ്ടി കിച്ചു.


മതിനെയാണ് അഭിമുഖീകരിക്കേണ്ടത് എന്നറിഞ്ഞപ്പോള്‍ അമ്പരപ്പാ‍യിരുന്നു ആദ്യം. പിന്നെയത് നമതുമായി വര്‍ത്തമാനം പറയാന്‍ അവസരം കിട്ടുന്നതിന്റെ ത്രില്ലായി മാറി. എന്ത് ചോദിക്കണം എങ്ങനെ ചോദിക്കണം എന്നൊന്നും യാതൊരു ഊഹവുമില്ലായിരുന്നു. എന്തു തന്നെ ചോദിച്ചാലും എങ്ങനെ ചോദിച്ചാലും ഉടന്‍ തരാനായി നമതിന്റെ നാവിന്‍ തുമ്പില്‍ തയ്യാറായി നില്‍ക്കുന്ന ഉത്തരങ്ങളിലുള്ള വിശ്വാസമാണ് സത്യത്തില്‍ ഇങ്ങനെയൊരു സാഹസത്തിന് എന്നെ പ്രേരിപ്പിച്ചത്.ബ്ലോഗിലൂടെ നാം അറിയുന്ന നമതുമായിട്ടാണ് അഭിമുഖഭാഷണം നടത്തുന്നത്. സ്വകാര്യതയുടെ ഏകാന്തതീരങ്ങളില്‍ വരിയും വരയുമായി അഭിരമിക്കുന്ന നമതിന്റെ ആത്മസാക്ഷാത്കാരങ്ങളില്‍ സത്യത്തിന്റെ പവന്‍ തിളക്കമുണ്ട്, വായിക്കുന്നവന് സമയമൂല്യം പലമടങ്ങ് തിരിച്ചു നല്‍കുന്ന എഴുത്തുകാരന്റെ ഉത്തരവാദിത്തമുണ്ട്. എഴുത്തുകാരനെന്ന നിലയില്‍ ഏകാകിയായിത്തന്നെ സഞ്ചരിക്കുവാന്‍ ഇഷ്ടപ്പെടുന്ന നമതിനോട് ആ യാത്രാപഥങ്ങളുമായി പൊരുത്തപ്പെടുന്ന ചോദ്യങ്ങളേ ആകാവൂ‍ എന്നത് കേവല ബാധ്യതയാണ്. അവിടെയാവട്ടെ, സൂര്യന് താഴെ എന്തിനെക്കുറിച്ചും അന്വേഷിക്കാന്‍ സഹായകമായ കൈ ചൂണ്ടികളുണ്ട് താനും.

- സിയ

സിയ:‌- ആക്രമണത്തിന്റെ വന്യഭാവമില്ല, കീഴടങ്ങലിന്റെ ദയനീയതയുമില്ല. ആര്‍ജ്ജവം തുടിച്ച് നില്‍ക്കുന്ന വാക്കുകള്‍ക്കിടയില്‍ പാറിക്കളിക്കുന്ന സമാധാനത്തിന്റെ ശുഭ്രപതാകയെ തൊട്ടറിയാം. അപരന്റെ മാനസികഭാവങ്ങളോടുള്ള ഒരുതരം സമരസപ്പെടല്‍. മനസ്സിലേക്ക് മെല്ലെ അരിച്ചിറങ്ങുന്ന കുളിരിന്റെ മൃദുസാന്ത്വനം പോലെയാണ് നമതിന്റെ പല ബ്ലോഗെഴുത്തുകളും അനുഭവപ്പെട്ടിട്ടുള്ളത്. ഒരു സാധാരണ ബ്ലോഗ് വായനക്കാരന്‍ എന്ന നിലയില്‍ നമതിനെ അറിഞ്ഞു തുടങ്ങിയത് അങ്ങനെയാണ്. എങ്ങനെ പ്രതികരിക്കുന്നു ഈ പ്രസ്താവനയോട്?

നമത് :- ജീവിതത്തില്‍ സത്യസന്ധനാവുന്നത് ഒരു പരിധി വരെയെങ്കിലും നമുക്കൊന്നും പറ്റാത്ത ഒരു കാര്യമാണ്. അവനവന്‍റെ സന്തോഷത്തിനു ചെയ്യുന്ന ഒരു കാര്യത്തിലെങ്കിലും, എഴുത്തിലെങ്കിലും സത്യസന്ധത ആഗ്രഹിക്കുന്നു. വയറ്റുപ്പിഴപ്പും എഴുത്തും രണ്ടായിടത്തോളം അതിനുള്ള സ്കോപ്പുണ്ട്. പിന്നെ ഈ മനുഷ്യന്‍റെ അവസ്ഥ, അതെല്ലാ കാലത്തും ദേശത്തും അടിസ്ഥാനപരമായി ഒന്നാണ്. എല്ലാവര്‍ക്കും പൊതുവായ ഒരു സ്ഥലമുണ്ട്. വികാരങ്ങളും. സമയം മിനക്കെടുത്തി വായിക്കാന്‍ വരുന്നവന്‍ മുടക്കുന്ന സമയത്തിനുള്ള ഒരു മിനിമം വാല്യൂ. അതു കൊടുക്കേണ്ടത് ഒരു ഉത്തരവാദിത്വമാണ്.

സിയ:‌- എഴുത്തുകാരൻ‍, കാര്‍ട്ടൂണിസ്റ്റ്, ചിത്രകാരൻ‍, ഫോട്ടോഗ്രാഫർ‍, ഇനിയും അറിയപ്പെടാത്ത മറ്റെന്തൊക്കെയോ കൂടിയാണ് നമത്. ഞാന്‍ പറയാനുദ്ദേശിക്കുന്നത് ഇതാണ്. ബ്ലോഗിലെ ഈ എഴുത്തിലും വരയിലും മാത്രം തൃപ്തനാണോ താങ്കള്‍? അല്ലെങ്കില്‍ ഓണ്‍ലൈന്‍ വായനാ സമൂഹത്തിന് പുറത്ത് വായനക്കാരും കലാസ്വാദകരുമായ വലിയൊരു കൂട്ടം ആളുകള്‍ താങ്കളെ നഷ്ടപ്പെടുത്തുന്നില്ല്ല്ലേ?

നമത് :- ‌ ബ്ലോഗ് ഒരു സാദ്ധ്യതയാണ്. ആദ്യം ബ്ലോഗില്‍ കയറുമ്പോ, ആരംഭദശയിൽ‍, കരീംമാഷ് പിന്നെ പര്‍ദ്ദ അണിഞ്ഞ ഒരു ലേഡി പിന്നൊരു ആറുപേർ. അതൊക്കെയാരുന്നു ബ്ലോഗ്. ഒരു പോസ്റ്റിനു ശേഷം ബോറടിച്ചു. രണ്ടാമതു വരുന്ന വേഷം ഇത്. ഇപ്പോ ബ്ലോഗിന്‍റെ ഗുണം, എഴുത്തുകാരന് കൂടുതല്‍ ഉത്തരവാദിത്വമുണ്ട്. വ്യക്തിപരമായ അഭിപ്രായങ്ങളേറെയുള്ളപ്പോഴും എഴുത്തെന്നത് ഒരു പരിശുദ്ധമായ കാര്യമാണ്. ഇറ്റ് ഷുഡ് ബീ ക്ലോസ്സ് ടൂ ട്രൂത്ത്. അത് ഒരു ഉത്തരവാദിത്വം കൂടിയാണ്. ബ്ലോഗിലെഴുതുമ്പോള്‍ അത് എഴുത്തുകാരനില്‍ നിന്നും കൂടുതല്‍ ഉത്തരവാദിത്വം ആവശ്യപ്പെടുന്നു. ഒരു ആനുകാലികത്തിന്‍റെ ലേബലിലോ, വാങ്ങാന്‍ കാശു കൊടുത്തു പോയി എന്നതു കൊണ്ടോ ആരും ബ്ലോഗ് വായിക്കില്ല. വീണ്ടും വായിക്കണമെന്ന് വായനക്കാരനു തോന്നണം. ബ്ലോഗെന്നത് ഒരു പരിചിതവൃത്തെമന്നതു മാറി, അങ്ങോട്ടുമിങ്ങോട്ടും പരിചയമുള്ളവരു കൊച്ചുവര്‍ത്തമാനം പറയുന്ന രീതി മാറി, ഒരുപാടു പേരു ദിവസവും പുതിയതായി കടന്നു വരുന്ന ഒരു മേഖലയാണ്. പോപ്പുലേഷന്‍ എക്സ്പ്ലോഷന്‍ പോലാണ് മലയാളത്തില്‍ ബ്ലോഗ് എക്സ്പ്ലോഷന്‍ നടക്കുന്നത്, നടന്നു കൊണ്ടിരിക്കുന്നത്. പണ്ട് എടിഎം എന്താണെന്ന് കാണാന്‍ വണ്ടിയോടിച്ചു പോയിട്ടുണ്ട്. ഡയലപ്പ് കണക്ഷനില്‍ കഷ്ടപ്പെട്ടിട്ടുണ്ട്. ഇന്നോ? ബ്ലോഗ് എഴുത്തുകാരന്‍റെ ഭാവിയാണ്. ഭാവിയുടെ മാധ്യമവും. ഇന്നല്ലെങ്കില്‍ നാളെ. അപ്പോഴും എഴുതാനുള്ള മൂഡുണ്ടാവുമോ എന്നത് മറ്റൊരു കാര്യം. വായനക്കാരുടെ നഷ്ടമൊന്നും അനുഭവപ്പെടുന്നില്ല. ഫീഡ് ബര്‍ണറില്‍ 300നടുത്ത് ഫീഡ്, അതല്ലാതെ വല്ലപ്പോഴുമെഴുതിയിട്ടും ആവറേജ് പേജ് ഹിറ്റ് 150. ഞാനെഴുതിയാലും വേറാരെഴുതിയാലും പത്തായത്തില്‍ നെല്ലുണ്ടേ എലി ടാക്സി പിടിച്ചും വരും. വ്യക്തിപരമായി തോന്നുന്നത്, മൌനികളെങ്കിലും ക്രീമിലെയര്‍ വായനക്കാരുണ്ടെന്നാണ്. അതില്‍ അങ്ങേയറ്റം സന്തോഷം. നന്ദി.

സിയ:‌- വിസ്മയകരമായ, നേരിയ ഒരു നിഗൂഢത നമതിനെ ചൂഴ്‌ന്നു നില്‍ക്കുന്നോ എന്നൊരു സംശയമുണ്ട്. നമതിന്റെ പ്രവര്‍ത്തനമണ്ഡലങ്ങളെക്കുറി കലാസപര്യയെക്കുറിച്ച് കൂടൂതലറിയാന്‍ എന്നെപ്പോലെ തന്നെ ആകാംക്ഷ ഒരു പക്ഷേ വായനക്കാര്‍ക്കും കാണും. ഔദ്യോഗികമോ വ്യക്തിപരമോ ആയ വിശദാംശങ്ങളല്ല ഞാന്‍ ചോദിക്കുന്നത്. എഴുത്തിലൂടെ, വരയിലൂടെ ഞങ്ങളറിയുന്ന നമതിന്റെ ആ മേഖലയിലെ അനുഭവങ്ങള്‍ അറിയാനുള്ള ആകാംക്ഷ മാത്രം.

നമത് :- ഇതിലെന്ത് നിഗൂഡത. രണ്ടു വീതം കൈയ്യും കാലും -)) കണ്ണും. എല്ലാരെയും പോലെ ഞാനും. ചിലര്‍ക്ക് പെഴ്സണല്‍ സ്പേസിന്‍റെ വലുപ്പും കൂടുതലായിരിക്കും. എനിക്ക് സ്വകാര്യത അണ്ടര്‍വെയര്‍ പോലൊരു സാധനമാണ്. ഐ ഡോണ്ട് വാണ്ടു ടു സീ യുവേഴ്സ്, ആന്‍ഡ് ഡോണ്ട് വാണ്ടു ടു ഷോ മൈന്‍. നമത് അതെഴുതുന്ന വ്യക്തിയുടെ സ്വകാര്യ സന്തോഷം. അവനവനില്‍ ആനന്ദം കണ്ടെത്തുന്നതിനുള്ള വഴി.അവനനോടുള്ള സത്യസന്ധതയ്ക്കുള്ള ഒരു മാര്‍ഗ്ഗം. വ്യക്തിക്ക് മറ്റെല്ലാവരെയും പോലെ കുടുംബം, സൌഹൃദങ്ങളെല്ലാമുണ്ട്. പക്ഷെ വ്യക്തി എഴുത്തില്‍ പ്രസക്തനല്ല. എഴുത്തുകാരന്‍ ഏകാകിയാണ്. വ്യക്തി ഒരു പരിധി വരെ മറിച്ചും. ഒരു പക്ഷെ എഴുത്ത് എന്ന രൂപത്തില്‍ അത്തരം ബന്ധങ്ങളോടുള്ള വിമുഖതയായിരിക്കും ഈ നിഖൂ‍ഡത എന്നൊക്കെ തോന്നുന്നത്. അതൊരു വലിയ കാര്യമായി കരുതുന്നില്ല. ഇപ്പോ എന്‍റെ അമ്മയ്ക്കു പോലും ഞാനെഴുതുന്നത് അറിയില്ല. രണ്ടു ലോകവും രണ്ടായി സൂക്ഷിക്കാനുള്ള ലളിതമായ ഒരാഗ്രഹം.

സിയ:- എഴുത്തിലെങ്കിലും സത്യസന്ധത ആഗ്രഹിക്കുന്നു എന്ന് സൂചിപ്പിച്ചുവല്ലോ. അതിനെ സാധൂകരിക്കുന്ന രണ്ട് കാര്യങ്ങളാണ് ഞാന്‍ കാണുന്നത്.  ഒന്ന്, മൌലികമായ ചിന്തകളുടെ സവിശേഷമായ ആവിഷ്‌കാരമാണ് താങ്കളുടെ എഴുത്ത്. രണ്ട്, ദുര്‍ഗ്രഹതയുടെ ലാഞ്ചനയില്ലാതെ, തെളിമയും വ്യക്തതയുമുള്ള വാക്കുകള്‍ വായനക്കാരന്റെ മനസ്സിലേക്ക് കോരിയിട്ടു കൊടുക്കുന്ന ഭാഷ. സങ്കീര്‍ണ്ണവും വൈവിധ്യപൂര്‍ണ്ണവുമായ വിഷയങ്ങള്‍ അയത്നലളിതമായ ഭാഷയിലൂടെയാണ് താങ്കള്‍ വായനക്കാരനിലേക്ക് സന്നിവേശിപ്പിക്കുന്നത്. വായനക്കാരനെ പരീക്ഷിക്കുന്നവിധം, ചിന്തകന്‍ അല്ലെങ്കില്‍ ബുദ്ധിജീവി പരിവേഷം നേടിയെടുക്കാനോ നിലനിര്‍ത്താനോ ഭാഷ മനഃപൂര്‍വ്വം ദുര്‍ഗ്രഹമാക്കുകയും കഠിനപദക്കസര്‍ത്തുകളിലൂടെ വായനക്കാരന്റെ കണ്ണ് തള്ളിച്ച് “ഹമ്മേ ഈ സാറ് യെന്തരോ സംഭവം തന്നെ” എന്ന് തോന്നിപ്പിക്കുകയും ചെയ്യുന്ന കപടബുദ്ധിജീവികള്‍ക്കിടയില്‍ നമത് വ്യത്യസ്തനാവുന്നത് അങ്ങനെയാണ്. ഇത് നമതിന്റെ വായനക്കാര്‍ക്ക് വ്യക്തമായും അറിയാവുന്ന സംഗതി ആയിരിക്കണം. എന്നാല്‍ ബ്ലോഗിലെ ചിലര്‍ പുറത്ത് പറയാന്‍ പറ്റാത്ത ഏതോ ഭയം കൊണ്ടാവണം, നമതിനെ ‘വിവരമുള്ളവന്‍’ എന്ന് പറയുമെങ്കിലും ഒരു അക്കാദമിക് ബുദ്ധിജീവി ലേബലില്‍ ഉള്‍ക്കൊള്ളിക്കാതിരിക്കാന്‍ മനഃപൂര്‍വ്വം ശ്രമിച്ചതായി എന്റെ ശ്രദ്ധയില്‍ പെട്ടിട്ടുണ്ട്. എന്തു പറയുന്നു?

നമത് :- ഭാഷ, പ്രത്യേകിച്ചും എഴുതുന്ന ഭാഷയെക്കുറിച്ച് ഒരുപാട് ധാരണകള്‍ അടിയുറച്ചിട്ടുണ്ട്. പക്ഷെ അടിസ്ഥാനപരമായി ഭാഷ ആശയവിനിമയത്തിനുള്ള ഉപകരണമാണ്. സംസാരത്തിലാണെങ്കിലും എഴുത്തിലാണെങ്കിലും. ഭാഷ ഫലപ്രദമാകുന്നത് അതു സംഭവിക്കുമ്പോഴാണ്. എഴുത്ത് വായനയുടെ മറുപുറമാണ്. എഴുത്തുകാരന്‍ അടിസ്ഥാനപരമായി വായനക്കാരനും. വായിക്കുമ്പോള്‍ അനുഭവിക്കുന്ന അരുചികള്‍ എഴുത്തില്‍ വരുത്താതിരിക്കുക, എഴുത്തുകാരന്‍റെ ചുമതലയാണ്. എഴുത്തും ജീവിതവും രണ്ടും രണ്ടായി സൂക്ഷിക്കന്നതു കൊണ്ടു തന്നെ ഇത്തരം കാര്യങ്ങളെക്കുറിച്ചെനിക്കറിയില്ല. ബ്ലോഗിലെനിക്ക് ബന്ധങ്ങളില്ല. ബന്ധുക്കളും സുഹൃത്തുക്കളുമൊക്കെ ആവശ്യത്തിനും ഒരുപക്ഷെ ആവശ്യത്തില്‍ കൂടുതലും സ്വകാര്യജീവിതത്തിലുണ്ട്. അവിടെയും എല്ലാ കാര്യങ്ങളിലും അഭിപ്രായങ്ങള്‍ക്ക് ആധികാരികതയുണ്ടെന്ന് അനുഭവപ്പെടാറില്ല. എല്ലാ കാര്യങ്ങളിലും ഞാന്‍ അഭിപ്രായം പറയേണ്ടതുണ്ടെന്നും തോന്നാറില്ല. എല്ലാവരും അവരവരുടെതായ രീതിയില്‍ കാര്യങ്ങള്‍ മനസ്സിലാക്കുന്നവരാണ്. വായനക്കാര്‍ പലപ്പോഴും എഴുത്തുകാരെക്കാള്‍ വിവരമുള്ളവരാണ്. ബ്ലോഗിലെഴുതുന്നത്, പണ്ടൊരിക്കല്‍ പറഞ്ഞതു പോലെ ഇരുട്ടില്‍ നിശബ്ദരായിരിക്കുന്ന ജ്ഞാനികളുടെ മുന്‍പിലുള്ള ഒന്നാണ്. എന്‍റെ അഭിപ്രായം അല്ലെങ്കില്‍ ചിന്ത മറ്റൊരു ഒപ്ഷന്‍, അല്ലെങ്കില്‍ പെര്‍സ്പക്ടീവ് മാത്രമാണ്. അതല്ലാതെ ഒരു തിരുത്തല്‍ ശക്തിയില്ല.ദാറ്റ്സ് നോട്ട് ബൈന്‍ഡിങ്ങ് ആന്‍ഡ് ഫൈനല്‍. സ്ഥിരമായി ബ്ലോഗുകളില്‍ സജീവമായി ചര്‍ച്ച ചെയ്യുന്നവരുടെ എണ്ണം കഷ്ടിച്ച് 20 അല്ലെങ്കില്‍ 30 വരും. അവരോടുള്ള എല്ലാ ബഹുമാനങ്ങളോടെയും എനിക്കു തോന്നുന്നത്, നിശബ്ദരായിരിക്കുന്ന മദമത്സരമഹാരോഹങ്ങളില്ലാത്ത ശിഷ്ടം 270 ആളുകള്‍ കൂടുതല്‍ പൊട്ടന്‍ഷ്യലുള്ളവരാണെന്നാണ്. ഇപ്പോഴധികമൊന്നുമെഴുതാറില്ല. പക്ഷെ എഴുതുമ്പോഴുള്ള വെല്ലുവിളി അവരാണ്. സംസാരിക്കുന്നവരെ മനസ്സിലാക്കാന്‍ എളുപ്പമാണ്. തൃപ്തിപ്പെടുത്താനും. ഒരക്ഷരം പോലും മിണ്ടാതെ മറഞ്ഞിരിക്കുന്നവരെ തൃപ്തിപ്പെടുത്തുന്നതാണ് വെല്ലുവിളി.

സിയ:- സാഹിത്യത്തിലെയും പ്രണയത്തിലെയും പ്രകൃതിയുടെ സ്വാധീനത്തെ അന്വേഷിക്കവേ, നമ്മുടെ സാഹിത്യത്തിലും ഭാവനയിലും സൂക്ഷ്മ വികാരമായ പ്രണയം സ്ഥൂലവിശദാംശങ്ങള്‍ നിറഞ്ഞതാകുന്നതില്‍ നമ്മുടെ സസ്യശ്യാമള കോമളമായ പ്രകൃതിക്ക് പങ്കുണ്ട് എന്നൊരു വിലയിരുത്തല്‍ താങ്കള്‍ നടത്തുന്നുണ്ട്. മറിച്ച്, അറബിനാടുകളിലെയൊ ലെബനോനിലെയോ വരണ്ട പ്രകൃതി കണ്ണിനെ ദൃശ്യസ്ഥൂലതയില്‍ നിന്നും ആത്മാവിന്‍റെ സൂക്ഷ്മതയിലേക്ക് വഴി തിരിച്ചുവിടുന്നുണ്ടോ എന്ന് ജലാലുദ്ദീന്‍ റൂമിയെയും ഖലീ‍ല്‍ ജിബ്രാനെയും ഉദാഹരിച്ച് താങ്കള്‍ ചോദിക്കുന്നു. കാനനഛായകള്‍ക്കും അല്ലിയാമ്പല്‍ കടവുകള്‍ക്കും ചുറ്റും കറങ്ങിത്തിരിയുന്ന മലയാളിയുടെ പ്രണയപഥങ്ങള്‍, എപ്പോഴാണ് കൂടുതല്‍ സുന്ദരവും നിഗൂഢവുമായ ഒരാത്മീയ യാത്രക്ക് ഉപയുക്തമാകുക? അങ്ങനെ സംഭവിക്കണെമെങ്കില്‍ എന്തുവേണമെന്നാണ് താങ്കള്‍ കരുതുന്നത്?

നമത് :- മറ്റെന്തും പോലെ ഭാവനയും ദേശത്തിനും കാലത്തിനും സംസ്കാരത്തിനുമനുസൃതമായി രൂപപ്പെടുന്ന ഒന്നാണ്. ഇടയ്ക്കു ചില പഴുതുകളൊഴിച്ച് മലകളാലും സമുദ്രത്താലും ചുറ്റപ്പെട്ട കേരളം താരതമ്യേനെ അധിനിവേശത്തിനു വഴങ്ങാത്ത ഒന്നായിരുന്നു. പ്രകൃതി നല്‍കിയ ഒരു വരം. അതുകൊണ്ടു തന്നെ സംവത്സരങ്ങളും നൂറ്റാണ്ടുകളും നീണ്ടു നില്‍ക്കുന്ന പീഡനങ്ങളൊ അടിമത്തമോ ഉണ്ടായിരുന്നില്ല. ഏഴാം ശതകത്തിലെ ആര്യ അധിനിവേശത്തിനു ശേഷം നമ്മുടെ സമൂഹത്തിലെ അസമത്വങ്ങള്‍ അതില്‍ തന്നെ ഇന്‍ബോണായ ഒന്നാരുന്നു. പുറത്തൂന്നു ഇറക്കുമതി ചെയ്തതോ അടിച്ചേല്‍പ്പിക്കപ്പെട്ടതോ അല്ല. ഏറ്റവും മനോഹരമായ കാലാവസ്ഥ നല്‍കുന്ന സഞ്ചാരസ്വാതന്ത്ര്യം. ഓരോ ഋതുവിലും മാറുന്ന പ്രകൃതി സൌന്ദര്യം. ഇത് മലയാളിയെ പൊതുവേ മനുഷ്യനില്‍ നിന്നും പുറത്തേക്കു കൊണ്ടുപോയിരിക്കണം. ഭാവന സൂക്ഷ്മത്തിനു പകരം സ്ഥൂലമായ പുറമ്പോക്കില്‍ അലഞ്ഞിരിക്കണം. അങ്ങനെയൊരുപാടു ഘടകങ്ങള്‍ മലയാള ഭാവനയെ നിര്‍വചിക്കുന്നുണ്ട്. മറിച്ച് പടിഞ്ഞാറന്‍ രാജ്യങ്ങളില്‍ കാലാവസ്ഥ മനുഷ്യനെ വേട്ടയാടുകയാണ്. ചുടുകാറ്റും മഞ്ഞുവീഴ്ചയും നല്‍കുന്ന പരിമിതികള്‍ മനുഷ്യനെ അവനവനില്‍ തന്നെ തളച്ചിടുന്നു. വൈകാരികസമ്മര്‍ദ്ധം അനുഭവപ്പെടുമ്പോള്‍ യാത്ര ചെയ്യുമ്പോള്‍ ലഭിക്കുന്ന ആശ്വാസം പ്രകൃതിദത്തമായി ലഭിച്ച മലയാളിക്ക് അങ്ങനെ അവനവനില്‍ തളച്ചിടപ്പെടേണ്ട ആവശ്യം വന്നിട്ടില്ല. ഹീ ഈസ് ഫീല്‍ ടു റോം എറൌണ്ട്. അതിപ്പോ അമ്പലക്കുളമാണെങ്കിലും കായലാണെങ്കിലും കടലാണെങ്കിലും മലയാണെങ്കിലും. സമ്പര്‍ക്കം ഭാവനയെ സ്വാധീനിക്കുന്നു. എഴുത്തിനെയും. കാനനഛായയും അല്ലിയാമ്പല്‍ കടവുമൊക്കെ അങ്ങനെ വരുന്നതാണ്. ഏകാകിതയുടെ , ആത്മഭാഷണത്തിന്‍റെ സ്വരം മലയാളത്തില്‍ ഏറ്റവും അധികം മറ്റൊലി കൊള്ളുന്നത് ബഷീറിലാണ്. അവനവനില്‍ തളച്ചിടപ്പെട്ട മലയാളഭാവനയുടെ ദൃഷ്ടാന്തമാണ് മതിലുകള്‍. ഖസാക്ക് ചരിത്രമായതും അങ്ങനെയാണ്. കൂടുതല്‍ സുന്ദരവും നിഗൂ‍‍ഡവുമായ ആത്മാന്വേഷണം. കഴപ്പിക്കുന്ന ഒന്നാണ്. ചിലപ്പോഴെങ്കിലും അശുഭാപ്തിവിശ്വാസം. കപീഷും ലാലു ലീലയും, രാമനാഥന്‍ സാറിന്‍റെ നോവലുകളുമൊക്കെ വായിച്ചുവളര്‍ന്നവര്‍ക്ക്, അല്ലെങ്കില്‍ അതിനു മുന്‍പുള്ളവര്‍ക്ക് സ്വന്തം വീടകത്തു നിന്ന് ആകെയുള്ള പുറംലോകം വായനമാത്രമായിരുന്നു. അതില്‍ അറിയാതെ സംഭവിച്ച ഒന്നുണ്ട്. ആത്മാവിഷ്കാരത്തിനുപയോഗിച്ചാലും ഇല്ലെങ്കിലും പദസമ്പത്തിന്‍റെ രൂപപ്പെടൽ‍. പുതിയ കാലം കൂടുതല്‍ ഏകാന്തമാണ്. കൂടുതല്‍ ഒറ്റപെടലുകള്‍ നിറഞ്ഞതും. പക്ഷെ ടിവി പുറംലോകത്തെ വീടുകളിലെത്തിക്കുന്നു. ഇന്‍റര്‍നെറ്റ് മൊബൈല്‍ ഫോൺ‍, മറ്റനേകം കാര്യങ്ങൾ‍. വ്യക്തിയുടെ ഒറ്റപ്പെടല്‍ കൂടുതല്‍ തീവ്രമാകുമ്പോള്‍ ആത്മാന്വേഷണങ്ങളുണ്ടാകേണ്ടതാണ്. പക്ഷെ അത് പ്രകടിപ്പിക്കുന്നതിനുള്ള ശിക്ഷണം, ഏറ്റവും അടിസ്ഥാനമായ പദസമ്പത്ത്, ആവിഷ്കാരം അതൊക്കെ മതിലിനപ്പുറം നില്‍ക്കുന്നോ? പലപ്പോഴും തോന്നിയിട്ടുള്ള ഒന്ന് ആത്മാന്വേഷണത്തിനുള്ള ഒരു ത്വര അല്ലെങ്കില്‍ സ്ഫുരണം ഉള്ളവരില്‍ പോലും അത് തിരിച്ചറിയപ്പെടാതെ പോകുന്നു.

സിയ:- നമത് എന്ന ചിത്രകാരനെക്കുറിച്ച്? ശാസ്ത്രീയമായി ചിത്രകല അഭ്യസിച്ചിട്ടുണ്ടോ?
ആ‍ധുനിക ചിത്രകലാ സങ്കേതങ്ങളോടുള്ള കാഴ്‌ച്ചപ്പാടെന്ത്? വര യന്ത്രവത്കൃതമാകുന്നതിനെ നമത് എങ്ങനെ നോക്കിക്കാണുന്നു?

നമത് :- വര പാതികണ്ടപ്പോള്‍ നിന്നു പോയ ഒരു സ്വപ്നമാണ്. ചിത്രങ്ങളുടെ ലോകം ജീവിതമാക്കണോ എന്നൊരു തീരുമാനമെടുക്കുന്ന കാലത്ത് ഇന്‍റര്‍നെറ്റില്ലായിരുന്നു. വിരല്‍ത്തുമ്പില്‍ വിപണിയില്ലായിരുന്നു. ആകാശം മുട്ടുന്ന വിലകളില്ലായിരുന്നു. ചിത്രകല അഭ്യസിക്കുന്നവര്‍ക്ക് മുന്‍പിലുള്ള പരമാവധി സാധ്യത ഏതെങ്കിലും പരസ്യ ഏജന്‍സി മാത്രം. അതുപഠിക്കുക ആകര്‍ഷകമായ ഒരു ഒപ്ഷനല്ലായിരുന്നു. ഐ വാസ് നോട് അലോവ്ഡ് റാദര്‍. വ്യക്തിപരമായ കാരണങ്ങളാല്‍ 92-94 കാലയളവില്‍ വരയും എഴുത്തുമൊക്കെ ഉപേക്ഷിച്ചു. പിന്നീട് ഒരു നീണ്ട ഇടവേള ബ്ലോഗുകാലം വരെ. വര ഇപ്പോഴും തിരിച്ചു വന്നിട്ടില്ല. ചിത്രകല മറ്റേതൊരു ദൃശ്യകലയും പോലെ കാഴ്ചയുടെ കലയാണ്. കാഴ്ചക്കാരന്‍റെ മസ്കിഷത്തില്‍ രാസപ്രവര്‍ത്തനങ്ങളുണ്ടാക്കാന്‍, പര്യാപ്തമായവ സങ്കേതമേതായാലും ഉദാത്തകലയാകുന്നു. രാസപ്രവര്‍ത്തനങ്ങളുണ്ടാകുന്ന, അനുരണനങ്ങളുണ്ടാകുന്ന തലകളുടെ എണ്ണം കൂടുമ്പോള്‍, അത് പല കാലങ്ങളില്‍ പലതലകളിലായി നീണ്ടു നില്‍ക്കുമ്പോള്‍ ക്ലാസ്സിക്കുകള്‍ പിറക്കുന്നു. അവിടെ സങ്കേതത്തിനു വലിയ പ്രസക്തിയില്ല. സ്വപ്നങ്ങള്‍ക്കു വ്യാകരണമില്ല. നിയമങ്ങളും. ചിത്രകാരനാകുന്നതിനേക്കാള്‍ ബുദ്ധിമുട്ട് നല്ല കലാസ്വാദകനാകുന്നതാണ്. മറ്റു കലയില്‍ നിന്നും ചിത്രകലയെ വ്യത്യസ്തമാക്കുന്നത്, ആസ്വാദകന്‍ ശിക്ഷിതനാകണം എന്ന പിടിവാശിയാണ്. ആ ശിക്ഷണത്തിന്‍റെ അഭാവത്തില്‍ ചിത്രം അപരിചിതഭാഷയാകും. വര യന്ത്രവൽകൃമാകുന്നതിനേക്കാള്‍ വരയ്ക്കാനുള്ള ഉപാധികള്‍ വര്‍ദ്ധിക്കുന്നുവെന്നതല്ലേ ശരിയായ ഉപയോഗം? കൈയ്യില്‍ ബ്രഷോടുന്നവന് ടാബ്‍ലറ്റും ഓടും. അല്‍പ്പം പരിശീലനമുണ്ടെങ്കില്‍. പിന്നെ പുതിയ സാങ്കേതികവിദ്യ തരുന്ന സാധ്യതകളേറെയാണ്. ഇപ്പോ ഉദാഹരണത്തിന് കാര്‍ട്ടൂണിനു പശ്ചാത്തലമായി ഒരു തറ വരയ്ക്കണമെങ്കില്‍, ഇന്ത്യന്‍ ഇങ്ക് കാലത്ത് തോര്‍ത്ത് മഷിയില്‍ മുക്കി തുടയ്ക്കണമായിരുന്നു. ചെറുതായൊന്നുപാളിയാല്‍ ആദ്യം മുതല്‍ തുടങ്ങേണ്ട സ്ഥിതി. ഫോട്ടോ പെയിന്‍റില്‍ രണ്ടു സെക്കന്‍ഡു കൊണ്ട് ഇത് തീരും. തെറ്റിയാലും തിരുത്താനും പിന്നേം തെറ്റിയാലും തിരുത്താനുമുള്ള സാഹചര്യം. പ്രസക്തമായ മറ്റൊരു കാര്യമുണ്ട്. എഴുത്തു പോലെ തന്നെയാണ് വരയും. സിദ്ധിയുണ്ടെങ്കില്‍ മാത്രം സാധന കൊണ്ട് തെളിയുന്ന ഒന്നാണ് ഇതു രണ്ടും. അതില്ലെങ്കില്‍ ടെക്നോളജിക്ക് വലുതായൊന്നും ചെയ്യാനില്ല. ഉണ്ടെങ്കില്‍ ടെക്നോളജി ഒരുപകരണമാണ്.

സിയ:- കാര്‍ട്ടൂണുകളെക്കുറിച്ച് താങ്കളുടെ നിരീക്ഷണം വായിച്ചിട്ടുണ്ട്. കാര്‍ട്ടൂണിന് തമാശ എന്ന ചിരിയുടെ കോമാളി രൂപം വേണമെന്നത് ചിന്താമൌഡ്യമാണെന്ന നിരീക്ഷണം. സമകാലിക കാര്‍ട്ടൂണുകള്‍ ഫലിതത്തിന് പുറകേ അശ്ലീലമായ ലാഘവത്തൊടെ പാഞ്ഞു പോകുന്നു എന്നും രാഷ്ട്രീയ കാര്‍ട്ടൂണുകളുടെ അല്‍പ്പായുസ്സ് ചൂണ്ടിക്കാട്ടി രാഷ്ട്രീയം കാര്‍ട്ടൂണിനെ പരിമിതപ്പെടുത്തുന്നു എന്നുമാണ് താങ്കളുടെ കുറ്റപ്പെടുത്തൽ‍. രാഷ്ട്രീയ-ജനപ്രിയ കാര്‍ട്ടൂണുകള്‍ക്ക് അതിന്റേതായ പ്രസക്തി വകവെച്ച് കൊടുക്കേണ്ടതല്ലേ? ശിക്ഷിതരും സാക്ഷരരുമാ‍യ ഒരു വര്‍ഗ്ഗത്തിന് വേണ്ടി വരക്കപ്പെടുന്ന, ബൌദ്ധികനിലവാരം കൂടിയ, ചിന്തയെ ഉത്തേജിപ്പിക്കുന്ന, കാലത്തെ അതിജീവിക്കുന്ന കാര്‍ട്ടൂണ്‍ സംസ്കാരമാണ് വേണ്ടത് എന്നതൊരു ദുശാഠ്യമല്ലേ?

നമത് :- വസ്തുതാപരമായ ഒരു തെറ്റുണ്ടിതിൽ‍. ഒ.വി.വിജയന്‍റെ വാചകമാണ് അശ്ലീലമായ ലാഘവം. പക്ഷെ ആശയം ശരിയാണ്. എക്സപ്ഷണല്‍ ഈസ് ഡിഫൈന്‍ഡ് ബൈ മീഡിയോക്രിറ്റി. പത്രങ്ങളിലും വാരികകളിലും വരയ്ക്കുന്ന സമകാലിക രാഷ്ട്രീയ പ്രസക്തിയുള്ള കാര്‍ട്ടൂണുകളൊന്നും തന്നെ മോശം അല്ലെങ്കില്‍ മ്ലേച്ഛം എന്നൊരു ധ്വനി അതിനില്ല. അതിന്‍റെ മറ്റൊരു വശം മാത്രമാണ്. ഈ പറയുന്ന പോസ്റ്റില്‍ കൊടുത്തിരിക്കുന്ന ചിന്തിപ്പിക്കുന്ന കാര്‍ട്ടൂണുകള്‍, രാഷ്ട്രീയ സാമൂഹിക സംഭവവികാസങ്ങളെക്കുറിച്ച് പത്രദ്വാരാ അപ്ഡേറ്റ് ആവാത്ത ഒരാള്‍ക്ക് കാലങ്ങള്‍ക്കു ശേഷവും ആസ്വദിക്കാവുന്നതാണ്. ചിരിയുടെ, പുഞ്ചിരിയുടെ ഒരു ശകലത്തിനു പകരം ചിന്തയുടെ ഒരു തലോടൽ‍. ഫലിതത്തിനു പകരം ചിന്ത ഉദ്ദീപിപ്പിക്കപ്പെടുന്നു. രണ്ടും രണ്ടു തരം ആസ്വാദനമാണ്. കമ്മീഷണറു കാണുന്നതു പോലെ പിറവി കാണണം എന്ന ശാഠ്യമില്ലെങ്കില്‍ രണ്ടും രണ്ടു തലമാണ്. സുജിത്തിന്‍റെ (ഒരു വരിയില്‍ ആശയം പ്രകടിപ്പിക്കുന്നതിന്‍റെ കഴിവ് ) അല്ലെങ്കില്‍ സജ്ജീവിന്‍റെ (നല്ല സ്ട്രോക്കു് ഈഗോയില്ലാത്ത ചിന്ത, ഫലിതബോധം) കാര്‍ട്ടൂണുകള്‍ മറ്റൊരനുഭവമാണ്. ആര്‍ച്ചി മറ്റൊരനുഭവമാണ്. ഉണ്ണിയുടെ, അരവിന്ദന്‍റെ കാര്‍ട്ടൂണുകളില്‍ ചിന്തയേക്കാളധികം സമൂഹം കടന്നു വരുന്നു. അബുവും വിജയനും ചിന്തയുടെ ഉയര്‍ന്ന തലങ്ങളെ വരയാക്കുന്നു. മനുഷ്യനെ ജീവിതത്തെ കൂടുതല്‍ അഗാധമായി പ്രതിഫലിപ്പിക്കുന്നു. കാലത്തെ അതിജീവിക്കുന്ന കാര്‍ട്ടൂണ്‍ സംസ്കാരമല്ല, കാര്‍ട്ടൂണ്‍ സംസ്കാരത്തിനു പ്രശ്നമൊന്നുമില്ല. ഒരു കാര്‍ട്ടൂണും അപ്രസക്തമല്ല. എല്ലാത്തരം കാര്‍ട്ടൂണുകളും ആസ്വദിക്കാറുണ്ട്. പക്ഷെ രാഷ്ട്രീയത്തിനു എന്നും താല്‍ക്കാലിക പ്രസക്തിമാത്രമേയുള്ളൂ. ജനപ്രിയ അല്ലെങ്കില്‍ രാഷ്ട്രീയ കാര്‍ട്ടൂണുകള്‍ അവയുടെ എല്ലാ ആസ്വാദനമൂല്യത്തോടെയും ഡിസ്പോസിബിള്‍ ആണ്. രാവിലെ പത്രത്തോടൊപ്പം സമാധിയാവുന്നു. അല്ലെങ്കില്‍ കുറച്ചുകൂടി താമസിച്ച്. ജനപ്രിയമായാലും ഇല്ലെങ്കിലും വിജയന്‍റെ, അബുവിന്‍റെ, അരവിന്ദന്‍റെ, എ.എസ്സിന്‍റെ, ഉണ്ണിയുടെ കാര്‍ട്ടൂണുകള്‍ക്ക് കുറെകൂടി ഷെല്‍ഫ് ലൈഫുണ്ട്. കാലത്തെ അതിജീവിക്കുന്നുണ്ട്. ഫലിതം താല്‍ക്കാലികമാകുമ്പോള്‍ ചിന്ത അതിജീവിക്കും.

സിയ:‌- സമകാലിക കേരള രാഷ്ട്രീയത്തെക്കുറിച്ച് താങ്കള്‍ നടത്തിയ ഒരു നിരീക്ഷണം ‘അമ്പ് കൊള്ളാത്തവരില്ല കുരുക്കളില്‍’ എന്ന മട്ടിലാണ്. ഇടത്തരക്കാരന് തന്‍റെ പ്രതിബിംബം കാണുമെന്ന ഉറപ്പോടെ നോക്കാന്‍ പറ്റിയ രാഷ്ട്രീയ കണ്ണാടികള്‍ ഉടഞ്ഞ് പോയെന്ന് താങ്കള്‍ പറയുന്നു. ചെങ്കൊടി ആവേശമാക്കിയ ഒരു പഴയതലമുറയുടെ ജീവിതങ്ങള്‍ക്ക് കപ്പല്‍ചേദം വന്നു. അവരുടെ മോഹങ്ങള്‍ വീണുടഞ്ഞു.ജനസാമാന്യം പാര്‍ട്ടികളില്‍ നിന്നും അന്യവല്‍ക്കരിക്കപ്പെട്ടിരിക്കുന്നു. അതിന് ഇടതു വലതു വ്യത്യാസമോ വര്‍ഗ്ഗ വര്‍ണ്ണ ദേശഭേദമോ ഇല്ലെന്നും പറയുന്നു. കേരള രാഷ്ട്രീയത്തിന്റെ ഭാവിയെക്കുറിച്ച് താങ്കളുടെ കാഴ്‌ച്ചപ്പാടെന്താണ്?

നമത് :- സ്വാതന്ത്ര്യം എന്നത് ഒരു ലക്ഷ്യമായിരുന്നു. ദേശീയതലത്തില്‍ കോണ്‍ഗ്രസ്സ് നേതൃത്വം കൊടുത്ത ഒന്ന്. അതിനു ശേഷം കേരളത്തിലെ സാമൂഹികസമത്വത്തില്‍ ഇടതുപക്ഷത്തിന്‍റെ വിലപിടിച്ച സംഭാവന. പോരായ്മകളുണ്ടെങ്കിലും വലിയ ലക്ഷ്യങ്ങള്‍ നിറവേറിയപ്പോള്‍ ഇടതും വലതും പാര്‍ട്ടികള്‍ സംഘടനാരൂപങ്ങളായി.ഒരു ജനാധിപത്യ വ്യവസ്ഥിതിയുടെ അഭിവാജ്യഘടകം. എങ്കിലും 30 ശതമാനം വീതം പാര്‍ട്ടിവിശ്വാസികളും ബാക്കി 40 ശതമാനം നിഷ്പക്ഷരുമായിരുന്നു. അല്ലെങ്കില്‍ അനുഭാവികള്‍. അനുഭാവങ്ങളിലെ ചാഞ്ചാട്ടം വിജയപരാജയങ്ങള്‍ നിര്‍വചിച്ചു. ഇപ്പോള്‍ കണ്ടുവരുന്ന ഒരു കാര്യം പാര്‍ട്ടിയേതായാലും ഉറച്ച വിശ്വാസികളുടെ എണ്ണത്തിലുള്ള കുറവാണ്. വലതുപക്ഷത്തിന്‍റെയും ഇടതുപക്ഷത്തിന്‍റെയും ജാഥകളില്‍ ഒരുപോലെ ആള്‍ച്ചോര്‍ച്ച. പാര്‍ട്ടിവിശ്വാസികള്‍ 20 ശതമാനം വീതം മാത്രമായി കുറയുകയും അരാഷ്ട്രീയര്‍ 60 ശതമാനത്തോളമായി വളരുകയും ചെയ്യുന്ന സാഹചര്യം. ഇതു വളര്‍ന്നു വരികയാണോ എന്നൊരു തോന്നലുണ്ട്. ഇടതു വിശ്വാസമോ വലതുവിശ്വാസമോ ആവട്ടെ, വിശ്വാസം പലപ്പോഴും ആദര്‍ശത്തെക്കാള്‍ കൂടുതലായി കണ്‍വീനിയന്‍സിന്‍റെ ചോയ്സായി മാറുന്നുവെന്നതും ശ്രദ്ധേയമാണ്. ഉദാരവത്കരണത്തിനു ശേഷം, സാങ്കേതികവിദ്യകള്‍ ഭൂരിപക്ഷത്തിനും പ്രാപ്തമായപ്പോള്‍ സമൂഹശരീരത്തില്‍ വന്ന മാറ്റങ്ങള്‍ മനസ്സിലാക്കുന്നതായിരിക്കും രാഷ്ട്രീയപാര്‍ട്ടികള്‍ നേരിടുന്ന ഏറ്റവും വലിയ വെല്ലുവിളി. വളര്‍ന്നു വരുന്ന നിഷ്പക്ഷരെ കൂടെ നിര്‍ത്തുന്നതും.

സിയ:‌- യാത്രകള്‍ നമത് എന്ന വ്യക്തിയെയും നമതിന്റെ എഴുത്തിനെയും എങ്ങനെ സ്വാധീനിച്ചിട്ടുണ്ട്? യാത്രകളില്‍ മനസ്സിനെ സ്പര്‍ശിച്ച അനുഭവങ്ങൾ‍? 

നമത് :- ഒരു വലിയ സഞ്ചാരിയൊന്നുമല്ല. യാത്ര ഒരു ഒളിച്ചോട്ടമല്ലേ. ഔട്ട് ഓഫ് റേഞ്ചും ഔട്ട് ഓഫ് റീച്ചുമാകുന്ന സുഖം. പുതിയ കാഴ്ചകള്‍ പുതിയ അനുഭവങ്ങൾ‍. ഓരോ യാത്രയും ഓരോ അനുഭവം. കഴിയുന്നതും ഒറ്റയ്ക്ക്. വേവ് ലെംഗ്തിന്‍റെ പ്രശ്നം മറ്റൊന്നു. കൊച്ചുവെളുപ്പാന്‍ കാലത്തെണീക്കാനും രാത്രി വൈകും വരെ കറങ്ങിനടക്കാനും കൈവണ്ടീന്നു ഭക്ഷണം കഴിക്കാനും ഒരു കട്ടന്‍ചായയുടെ പുറത്തോ ബിയറിന്‍റെ പുറത്തോ (ശരിക്കും പുതിയതായി ചെന്നെത്തുന്ന സ്ഥലത്തിന്‍റെ പള്‍സ് അറിയുന്നതിവിടെയൊക്കെയാണ്. ആളുകളുടെ ജീവിതവും.) നാട്ടുവര്‍ത്തമാനം കേള്‍ക്കാന്‍ റെഡിയല്ലാത്ത ആരേലുമാണ് കൂടെയെങ്കില്‍ യാത്രയുടെ സുഖം പോകും. യാത്ര മസിലു പിടിച്ചു ഫോര്‍മലായി നടത്തുന്ന കാഴ്ച മാത്രമാവും. യാത്ര ആദ്യമൊക്കെ ഡ്രൈവ് ചെയ്യുന്ന കാഴ്ച കാണുന്ന ത്രില്ലു മാത്രമാരുന്നു. അതിനു ഡെപ്ത് വന്നത് ഇങ്ങനെയൊക്കെയുള്ള ചെറിയ സംസാരങ്ങളിലാണ്. ചുമ്മാ ഒന്നു മൂളിക്കൊടുത്താല്‍ മാത്രം കിട്ടുന്ന വിവരങ്ങള്‍ വലുതാണ്. ഓരോ വാക്കുകളും നല്ലതോ കെട്ടതോ ഒരു ജീവിതത്തിന്‍റെ തുണ്ടാണ്. ഒരു മാനസികാവസ്ഥ, ഒരു ചിന്ത. പഴങ്കഥ. ഗോസ്സിപ്പ്.. കഥയങ്ങനെ നീളും.കാച്ചുകളും.
ഇപ്പോ, ഒന്നു രണ്ടു മാസമായി യാത്രയൊന്നുമില്ലാതെ. മറ്റു പല പദ്ധതികളേയും പോലെ യാത്രയും പലപ്പോഴും ആഗ്രഹം മാത്രമായി അവശേഷിക്കുന്നു. ധനുഷ്കോടിക്ക് പോകണം. മൃതനഗരം. കഴിഞ്ഞ തവണ രാമേശ്വരം വരെ പോയതാണ്. പക്ഷെ അവിടുന്നത് ധനുഷ്കോടിക്കുള്ള ദൂരം ജീപ്പില്‍ പോകാനുള്ള മടി കൊണ്ട്, ഐ ഹേറ്റ് അദേഴ്സ് ഡിക്ടേറ്റിങ്ങ് മൈ ഷ്യെഡൂള്‍, ഉപേക്ഷിച്ചത്. ധനുഷ്കോടിക്കു റോഡുകളില്ല. പകരം മണല്‍പ്പരപ്പ് മാത്രം. ഇടയ്ക്ക് പുതയുന്നിടത്ത് കിളിയിറങ്ങി പലകയിട്ട് അതിനു മൂകളിലാണ് ജീപ്പു ചില സ്ഥലങ്ങളൊക്കെ കടക്കുക. പ്രശ്നം അവരോടൊപ്പം പോണം, അവരോടൊപ്പം തിരിച്ചു വരുണം. എന്നാ പിന്നാ പോവാതിരുന്നൂടെ. പോവുന്നെങ്കില്‍ വെളുപ്പിനു പോണം, സന്ധ്യ കാണണം. തപ്പിപ്പിടിച്ചപ്പോള്‍ ബൈക്കില്‍ പോയവരുണ്ട്. രാമേശ്വരത്ത് ബൈക്ക് റെന്‍റിനു കിട്ടുവോന്നറിയില്ല. ഇല്ലെങ്കില്‍ ഇനി ഇവിടെ നിന്നൊരു ബസ്സില്‍ ബൈക്കു കയറ്റി, അവിടെ ചെന്ന് ഡ്രൈവ് ചെയ്ത് പോണം.

സിയ:- ഈ വര്‍ത്തമാനത്തിന് ഇത്രയും സമയം അനുവദിച്ചതിന് ഒത്തിരി നന്ദിയുണ്ട്...എങ്ങനെ പ്രകാശിപ്പിക്കണമെന്നറിയാതെ അകം നിറയുന്ന നന്ദി.

നമത് :- അല്‍പ്പം ദീര്‍ഘിച്ച സംഭാഷണത്തിനു ശേഷം വായനക്കാര്‍ക്കു നന്ദി പറഞ്ഞു കൊണ്ടു ഈ സംഭാഷണം അവസാനിപ്പിക്കുമ്പോൾ‍... സിയ നന്ദി, നമ്മുടെ ബൂലോകം നന്ദി. നന്ദി ഒണ്‍ അന്‍ഡ് ഓൾ‍. ഫോര്‍ യുവര്‍ കൈന്‍ഡ് ഇന്‍ററസ്റ്റ്.

നമതിന്റെ ബ്ലോഗിലേക്ക് ഇതിലേ പോകാം.

ബ്ലോഗര്‍ പാച്ചുവിന് അഭിമാനാര്‍ഹമായ നേട്ടം.

കേരള ലളിത കലാ അക്കാദമിയുടെ ഈ വര്‍ഷത്തെ കലാ പുരസ്ക്കാരങ്ങളില്‍ ഫോട്ടോഗ്രാഫിക്കുള്ള അവാര്‍ഡു പ്രശസ്ത ന്യൂസ്‌ ഫോട്ടോഗ്രാഫറും ബ്ലോഗ്ഗറുമായ ശ്രീ ഫൈസല്‍ മുഹമ്മദ്‌ ഏറ്റു വാങ്ങി. ബഹുമാനപ്പെട്ട സാംസ്കാരിക -വകുപ്പ് മന്ത്രി ശ്രീ എം. എ. ബേബി യുടെ സാന്നിധ്യത്തില്‍ സാംസ്കാരിക വകുപ്പ് സെക്രട്ടറി വി. വേണു IAS അവര്‍കള്‍ ആണ് ഫെബ്രുവരി 13 ഞായറാഴ്ച എറണാകുളം ദര്‍ബാര്‍ ഹാള്‍ അങ്കണത്തില്‍ നടന്ന ചടങ്ങില്‍ ഫൈസല്‍ മുഹമ്മദിന് പുര സ്ക്കാരം സമര്‍പ്പിച്ചത്. പ്രശസ്തി പത്രവും ഇരുപതിനായിരം രൂപ കാഷ് അവാര്‍ഡുമാണ് പുരസ്ക്കാരം.


പാച്ചു എന്ന പേരില്‍ ബ്ലോഗു ചെയ്യുന്ന ശ്രീ ഫൈസല്‍ മുഹമ്മദ്‌ കഴിഞ്ഞ അഞ്ചു കൊല്ലമായി സജീവമായി ബ്ലോഗില്‍ ഉണ്ട്. നേരത്തെ മാതൃ ഭൂമിയുടെ ഇടുക്കി ഫോട്ടോഗ്രാഫര്‍ ആയിരുന്നു. തൃശൂര്‍ സബ് രജിസ്ട്രാര്‍ ഓഫീസില്‍ സര്‍ക്കാര്‍ ജോലി ലഭിച്ചതിനെ തുടര്‍ന്ന് ഫോട്ടോഗ്രഫി ഹോബി ആക്കി മാറ്റി പാച്ചു ബ്ലോഗിലെ സാന്നിദ്ധ്യം തുടര്‍ന്നു. നമ്മുടെ ബൂലോകം എഡിറ്റോറിയല്‍ ബോര്‍ഡ് അംഗം നിരക്ഷരന്‍ ആവിഷ്കരിച്ച "സേവ് കേരള" എന്ന മുല്ലപ്പെരിയാര്‍ ഡാം അധിഷ്ടിത പ്രശ്നത്തില്‍ ശ്രീ ഫൈസല്‍ മുഹമ്മദ്‌ സാഹസികമായി എടുത്ത ഫോട്ടോഗ്രാഫുകള്‍ ഡാമിന്റെ യഥാര്‍ത്ഥ അവസ്ഥയെക്കുറിച്ചും നേരിടുന്ന പ്രതിസന്ധികളെക്കുറിച്ചും കൂടുതല്‍ ബോധവാന്മാരാക്കാന്‍ കഴിഞ്ഞിരുന്നു. ഗുരുവായൂരിനടുത്തെ മമ്മിയൂര്‍ സ്വദേശി യാണ് ശ്രീ. ഫൈസല്‍ മുഹമ്മദ്‌. സര്‍ക്കാര്‍ സര്‍വ്വീസില്‍ നിന്നും അവധിയില്‍ പ്രവേശിച്ചു പൂനെ ഫിലിം ഇന്‍സ്റ്റിട്യൂട്ടില്‍ സിനിമാട്ടോഗ്രാഫി ഡിപ്ലോമ പഠനം നടത്തുകയാണ് ഫൈസല്‍ ഇപ്പോൾ‍.


"സര്‍പ്പദോഷം" എന്ന ഫൈസലിന്റെ ഫോടോഗ്രാഫിനാണ് അവാര്‍ഡു ലഭിച്ചിരിക്കുന്നത്.


ചടങ്ങില്‍ ബ്ലോഗർമാരായ കാർട്ടൂണിസ്റ്റ് സജീവ്‌ ബാലകൃഷ്ണൻ, ജോ , നന്ദപര്‍വ്വം നന്ദകുമാർ, ഫോട്ടോ ബ്ലോഗ്ഗര്‍ ഷാജി എന്നിവര്‍ പങ്കെടുത്തു. പാച്ചുവിനു ലഭിച്ച ഈ പുരസ്ക്കാരം ബൂലോകത്തിന്റെയും,

ബൂലോകരുടെയും അഭിമാനം കൂടിയാണ്. അഭിമാനാര്‍ഹമായ ഈ നേട്ടം കൈവരിച്ച പാച്ചുവിന് നമ്മുടെ ബൂലോകം ടീമിന്റെ അഭിനന്ദനങ്ങൾ‍.
.
വിക്കി എറണാകുളം പഠനശിബിരം  ഫെബ്രുവരി 19ന്

വിക്കി എറണാകുളം പഠനശിബിരം ഫെബ്രുവരി 19ന്

റണാകുളം ജില്ലയിൽ നിന്നുള്ളവരുടെ ദീർഘനാളായുള്ള ആവശ്യപ്രകാരം എറണാകുളത്ത് ഒരു മലയാളം വിക്കിപഠനശിബിരം സംഘടിപ്പിക്കപ്പെടുന്നു.

എറണാകുളം ജില്ലയിൽ നിന്ന് മലയാളം വിക്കി സംരംഭങ്ങളിൽ പ്രവർത്തിക്കുവാൻ താല്പര്യമുള്ളവർക്കായി 2011 ഫെബ്രുവരി 19-നു് ഉച്ച കഴിഞ്ഞ് 2:00 മണി മുതൽ മുതൽ വൈകുന്നേരം 5:00 വരെയാണ് വിക്കിപഠനശിബിരം നടത്തുന്നത്.

പരിപാടി: മലയാളം വിക്കി പഠനശിബിരം
സ്ഥലം: ടോക് എച്ച് പബ്ലിക് സ്കൂൾ, കൊച്ചി
തീയതി: 2011 ഫെബ്രുവരി 19
സമയം: ഉച്ചക്ക് 2.00 മണി മുതൽ വൈകുന്നേരം 5:00 വരെ
ആർക്കൊക്കെ പങ്കെടുക്കാം? മലയാളം വിക്കിസംരംഭങ്ങളിൽ താല്പര്യമുള്ള ആർക്കും പങ്കെടുക്കാം.

കാര്യപരിപാടികൾ

* മലയാളം വിക്കി സംരംഭങ്ങളെ പരിചയപ്പെടുത്തുക,
*എങ്ങനെയാണു് വിക്കി സംരംഭങ്ങളുടെ പ്രവർത്തനങ്ങളിൽ പങ്കെടുക്കുക?
* മലയാളം വിക്കികളിൽ എങ്ങനെ മലയാളത്തിൽ ടൈപ്പ് ചെയ്യാം?

തുടങ്ങി പുതുമുഖങ്ങൾക്ക് മലയാളം വിക്കികളെകുറിച്ചു് അറിയാൻ താല്പര്യമുള്ള എല്ലാ വിഷയങ്ങളും ഇതിൽ കൈകാര്യം ചെയ്യും. മലയാളം വിക്കിസംരംഭങ്ങളെ സംബന്ധിച്ചുള്ള നിങ്ങളുടെ ചോദ്യങ്ങൾക്ക് മലയാളം വിക്കി പ്രവർത്തകർ മറുപടി തരാൻ ശ്രമിക്കും.

താല്പര്യമുള്ളവർ ദയവായി വിക്കിയിൽ രജിസ്റ്റർ ചെയ്യുകയോ help@mlwiki.in എന്ന വിലാസത്തിലേക്ക് ഇ-മെയിൽ അയക്കുകയോ, 989593 8674 എന്ന നമ്പറിൽ വിളിച്ച് അറിയിക്കുകയോ ചെയ്യുക.

സജി മാർക്കോസിന് അഭിനന്ദനങ്ങൾ

മാതൃഭൂമിയുടെ യാത്രാ മാഗസിൻ നടത്തിയ യാത്രാവിവരണ മത്സരത്തിൽ, അച്ചായൻ എന്ന ഓമനപ്പേരിൽ അറിയപ്പെടുന്ന ബ്ലോഗർ സജി മാർക്കോസിന്റെ ‘നുബികളുടെ നാട്ടിൽ‘ എന്ന യാത്രാവിവരണം ഒന്നാം സമ്മാനം നേടിയിരിക്കുന്ന വിവരം സസന്തോഷം എല്ലാ വായനക്കാരുമായും പങ്കുവെക്കുന്നു.

സജി മാർക്കോസ്

ലോകത്തിന്റെ വിവിധ ഭാഗങ്ങളിൽ നിന്നായി 150 ല്‍പ്പരം പേർ പങ്കെടുത്ത മത്സരത്തിലാണ് സജി മാർക്കോസ് സമ്മാനാർഹനായത് എന്നത് അസൂയപ്പെടുത്തുന്ന നേട്ടം തന്നെയാണ്. മലേഷ്യയിൽ മൂന്ന് പകലും നാല് രാത്രിയും ചിലവഴിക്കാനുള്ള യാത്രാ പാക്കേജാണ് സജി മാർക്കോസിന് ലഭിക്കുന്ന ഒന്നാം സമ്മാനം. സമ്മാനം പ്രഖ്യാപിച്ചുകൊണ്ടുള്ള മാതൃഭൂമി വാർത്ത ഇവിടെ ക്ലിക്ക് ചെയ്ത് വായിക്കാം. സമ്മാനാർഹമായ യാത്രാവിവരണം വായിക്കാൻ ഈ ലിങ്കിൽ ക്ലിക്ക് ചെയ്യൂ. ഇത് മറ്റൊരു ലിങ്ക്.

മാതൃഭൂമിയുടെ സ്ക്രീൻ ഷോട്ട്
നമ്മുടെ ബൂലോകത്തിൽ ഖണ്ഡശ പ്രസിദ്ധീകരിച്ച് വായനക്കാരുടെ മുക്തകണ്ഠപ്രശംസ ഏറ്റുവാങ്ങിയതാണ് സജി മാർക്കോസിന്റെ ഹിമായല യാത്രയുടെയും ഈജിപ്റ്റ് യാത്രയുടെയും വിവരണങ്ങൾ. ഒരിക്കൽക്കൂടെ ആ യാത്രാവിവരണങ്ങൾ വായിക്കണമെന്നുള്ളവർക്കായി ഇതാ ഈ ലിങ്കുകൾ വഴി പോകാം. നൈലിന്റെ തീരങ്ങളിലൂടെ, ഹിമാലയ യാത്ര.


സജി മാർക്കോസ് എന്ന ബൂലോകത്തിന്റെ സ്വന്തം ഹിമാലയ അച്ചായന്, നമ്മുടെ എല്ലാവരുടെയും നൈൽ അച്ചായന് നമ്മുടെ ബൂലോകം ടീമിന്റെ അഭിനന്ദനപ്പൂച്ചെണ്ടുകൾ.

കൂടുതൽ യാത്രാവിവരണങ്ങളുമായി ബൂലോകത്തെന്ന പോലെ ഭൂലോകത്തും സജി മാർക്കോസിന്റെ യാത്രാവിവരണങ്ങൾ നിറഞ്ഞുനിൽക്കട്ടെ, കൂടുതൽ കൂടുതൽ അംഗീകാരങ്ങൾ കൈവരിക്കാൻ അദ്ദേഹത്തിനാകട്ടെ എന്നും ഹൃദയത്തിന്റെ ഭാഷയിൽ ആശംസിക്കുന്നു.
ആള്‍ ദൈവങ്ങളും പ്രവചനക്കാരും

ആള്‍ ദൈവങ്ങളും പ്രവചനക്കാരും

ആള്‍ ദൈവങ്ങളും പ്രവചനക്കാരും വര്‍ദ്ധിക്കുന്ന കേരളം

കേരളത്തില്‍ ഏതാനും വര്‍ഷം കൊണ്ട്‌ വന്‍‌തോതില്‍ വളര്‍ന്നുവരുന്ന ഒരു വ്യവസായമാണ്‌ ഭക്തി.ട്രേഡ്‌ യൂണിയനുകളുടെ ശല്യം ഇല്ലാതെ ഒരുപക്ഷെ കേരളത്തില്‍ നടത്താവുന്ന അപൂര്‍വ്വം സംരഭങ്ങളില്‍ ഒന്നാണിതെന്നും പറയാം. യോഗയുടെ മെമ്പൊടിയോടെയും മന്ത്രവാദത്തിന്റെ അകമ്പടിയോടെയും ധ്യാനം പ്രാര്‍ത്ഥനതുടങ്ങിയവയുടെ പേരിലും അതു കേരളത്തിലെ ഗ്രാമങ്ങളെയും നഗരങ്ങളെയും ഒരുപോലെ കീഴടക്കിക്കൊണ്ടിരിക്കുന്നു.മാധ്യമങ്ങളില്‍ വന്‍ പരസ്യവും നഗരങ്ങളില്‍ ഉത്സവങ്ങളും സ്വീകരണങ്ങളും ഒക്കെയായി ഇത്‌ കേരളീയന്റെ ജീവിതത്തിന്റെ ഒരു ഭാഗമായിക്കൊണ്ടിരിക്കുന്നു. ഇന്നു നാം അന്ധവിശ്വാസത്തിന്റെയും ദുരാചാരങ്ങളുടേയും കൂത്തരങ്ങായിരുന്ന പഴയ ശിലായുഗത്തിലേക്ക്‌ അതിവേഗം സഞ്ചരിക്കുകയാണെന്ന യാദാര്‍ഥ്യം മറന്നുകൂട. നമ്മുടെ സാമൂഹ്യപരിഷ്ക്കര്‍ത്താക്കളും വിപ്ലവകാരികളും (ശത്രുസംഹാര പൂജയും, മറ്റുഹോമങ്ങളും നടത്തുകയും,വാസ്തുദോഷവും രാഹുവും നോക്കി വീടുപണിയുകയും താമസിക്കുകയും ചെയ്യുന്ന ഡ്യൂപ്ലിക്കേറ്റ്‌/കോര്‍പ്പറേറ്റ് വിപ്ലവകാരികളല്ല)നടത്തിയ പ്രവര്‍ത്തനങ്ങള്‍ എല്ലാം പാഴായിക്കൊണ്ടിരിക്കുന്നു.

ഇന്ന് അന്ധവിശ്വാസത്തിന്റെ പടുകുഴിയിലേക്ക്‌ അതിവേഗം പതിച്ചുകൊണ്ടിരിക്കുന്ന മലയാളി ഒരു കാലത്ത്‌ ആള്‍ദൈവങ്ങള്‍ക്കെതിരെ ശക്തമായി പ്രതികരിച്ചിരിരുന്നവര്‍ ആയിരുന്നു. ഇന്ന് പക്ഷെ നിലവിലുള്ളവരെ പോരാതെ പുതിയ ആള്‍ദൈവങ്ങള്‍ക്കായി പരക്കം പായുകയാണ്‌.എന്താണ്‌ മലയാളിക്ക്‌ പറ്റിയത്‌ ഒരുപക്ഷെ ധാരാളം പണം കൈകളില്‍ എത്തുകയും കൂട്ടുകുടുമ്പ വ്യവസ്തിതി തകര്‍ന്ന് അണുകുടുമ്പങ്ങള്‍ ധാരാളം ഉണ്ടാകുകയും ചെയ്തതായിരിക്കാം. പുതിയ ജീവിത സാഹചര്യങ്ങള്‍ പലര്‍ക്കും മാനസീകമായ പ്രശ്നങ്ങള്‍(ആത്മവിശ്വാസക്കുറവ്‌, അപകര്‍ഷത,)വര്‍ദ്ധിക്കുവാന്‍ തുടങ്ങി.കുടുമ്പം ഭാഗംവെക്കല്‍ പലപ്പോഴും നല്ല രീതിയില്‍ ആയിരിക്കില്ല നടക്കുക. സഹോദരങ്ങളും മാതാപിതാക്കളും ഇതിന്റെ ഫലമായി പരസ്പരം അകലുന്നു. തുടര്‍ന്ന് ഓരോരുത്തര്‍ക്കും തങ്ങള്‍ ഒറ്റപ്പെട്ടു എന്ന ഒരു തോന്നല്‍ ഉണ്ടാകുകയും അതിന്റെ ഫലമായി മാനസ്സീക സംഘര്‍ഷം ഉടലെടുക്കുന്നു. ഈ സംഘര്‍ഷങ്ങള്‍ ജ്യോതിഷികളും മന്ത്രവാദികളും വളരെയധികം പ്രയോജനപ്പെടുത്തുന്നു. ഭര്‍ത്താക്കന്മാര്‍ ജോലിസംബന്ധമായി മറ്റു സ്ഥലങ്ങളില്‍ ഉള്ള സ്ത്രീകളില്‍ ഇതിന്റെ ആഘാതം കൂടുന്നു. പലപ്പോഴും സ്ത്രീകളാണിതിന്റെ ഇരകളാകുന്നത്‌.

ഒറ്റപ്പെടലിന്റെ സംഘര്‍ഷങ്ങള്‍ക്കിടയില്‍ ജീവിതത്തില്‍ എന്തെങ്കിലും വിധത്തിലുള്ള വിഷമതകള്‍ ഉണ്ടാകുകകൂടി ചെയ്താല്‍ അവര്‍ ഏതെങ്കിലും ജ്യോല്‍സ്യന്മാരെയോ മറ്റു പ്രവചനക്കാരെയോ സമീപിക്കുന്നു. ഇരകളെ എങ്ങിനെ കൈകാര്യം ചെയ്യണം എന്നതില്‍ വളരെ വിദഗ്ദരായ പ്രവചനക്കാര്‍ ഇത്‌ ശത്രുക്കള്‍ ചെയ്ത ദുഷ്കര്‍മ്മത്തിന്റെ ഫലമാണെന്നും വന്‍ ദോഷമാണ്‌ നിങ്ങള്‍ക്ക്‌ ഇതുമൂലം ഉണ്ടാകുകയെന്നും പറയുന്നു.പ്രത്യേകിച്ചും ഭര്‍ത്താവിനു വലിയപത്തുവരുന്നു എന്നൊക്കെ പറയുമ്പോള്‍ അതില്‍ ഒരു ഭാഗ്യപരീക്ഷണത്തിനു ഒരിക്കലും ഭാര്യമാര്‍ മുതിരില്ല ഇത്തരത്തില്‍ സ്ത്രീകളെ എളുപ്പത്തില്‍ മാനസീകമായി പിരിമുറുക്കത്തില്‍ എത്തിക്കുകയാണ്‌ ആദ്യ ഘട്ടം. മാനസീകമായ പിരിമുറുക്കം അനുഭവിക്കുന്ന അവസ്ഥയില്‍ ഉള്ള ആളുകളെ എളുപ്പത്തില്‍ ഇവര്‍ പാട്ടിലാക്കുന്നു. പിന്നെ നിരവധി പരിഹാരക്രിയകള്‍ അവര്‍ നിര്‍ദ്ദേശിക്കുകയായി. ഇതിനായി അവര്‍ ഏതെങ്കിലും മന്ത്രവാദി/പൂജാരി/ദിവ്യന്‍/സ്ദിദ്ധന്‍ തുടങ്ങിയ പേരുകളില്‍ അറിയപ്പെടുന്ന ആളുകളുടെ പേരും മേല്‍ വിലാസവും പറഞ്ഞുകൊടുക്കുന്നു. ഇതിനുപുറകില്‍ പലപ്പോഴും പരസ്പരം ഉള്ള ഒരു അഡ്ജസ്റ്റുമെന്റാണെന്ന് പലരും തിരിച്ചറിയപ്പെടാതെപോകുന്നു. പരിഹാരക്രിയകള്‍ക്കു ശേഷം താല്‍ക്കാലികമായ ഒരുമാറ്റം ജീവിതത്തില്‍ ഉണ്ടാകുന്നു എന്നാല്‍ അധികം താമസിക്കാതെ വീണ്ടും പ്രശ്നങ്ങള്‍ തലപൊക്കുന്നു (തങ്ങള്‍ ചെയ്ത പരിഹാരക്രിയ ജീവിതത്തിലെ പ്രശ്നങ്ങള്‍ക്ക്‌ പരിഹാരം ഉണ്ടാക്കും എന്ന വിശ്വാസത്തില്‍ ദിവസങ്ങള്‍ തള്ളിനീക്കുന്നു, ആദ്യദിവസങ്ങളില്‍ ഒരു പക്ഷെ ഉണ്ടാകുന്ന ചില അനുഭവങ്ങള്‍ അവരെ സ്വാധീനിക്കുകയും ചെയ്യും. യദാര്‍ത്ഥത്തില്‍ ഇത്‌ ഒരു മാനസീക അവസ്തയാണ്‌) വീണ്ടുപ്രശ്നങ്ങള്‍ ഉണ്ടാകുന്നതോടെ അവര്‍ പഴയമന്ത്രവാദിയെയോ അല്ലെങ്കില്‍ മറ്റൊരാളെയോ തേടിപ്പോകുന്നു. ശത്രു വീണ്ടും കടും പ്രയോഗം നടത്തിയെന്നും കൂടിയ പ്രയോഗമായതിനാല്‍ പ്രതിവിധിയും അതിനു അനുസൃതമായിരിക്കണം എന്ന ഉപദേശമാണ്‌ മിക്കവാറും അവിടെ നിന്നും ലഭിക്കുക.

അടുത്തകാലത്തുണ്ടായ ശബരിമലവിവാദം പലവസ്തുതകളും പുറത്തുകൊണ്ടുവന്നു.ഒരു വ്യക്തി തന്റെ പ്രശസ്തിക്കുവേണ്ടി ചിലകാര്യങ്ങള്‍ ചെയ്തു എന്ന് മാധ്യമങ്ങള്‍ റിപ്പോര്‍ട്ടുചെയ്തു. പലതരത്തിലുള്ള അന്വേഷണങ്ങള്‍ക്കും ഇതു ഇടവെച്ചു.മുന്‍ അനുഭവം വച്ചുനോക്കുമ്പോള്‍ ഒരു പക്ഷെ മറ്റുപല വിവാദവിഷയങ്ങളുടേയും അന്വേഷണഫലങ്ങള്‍ പോലെ ഉള്‍പ്പെട്ട ആര്‍ക്കും പരിക്കുണ്ടാക്കാത്തവിധത്തില്‍ ഉള്ളതാകാമെങ്കിലും മാധ്യമങ്ങളുടെ റിപ്പോര്‍ട്ടുകളില്‍ നിന്നും സാമാന്യജനത്തിനു കാര്യങ്ങള്‍ ബൊധ്യമായിട്ടുണ്ട്‌. ഇതിന്റെ പേരില്‍ ഒരു പഴയകാല നടിയുടെ പേരില്‍ കേസും ചാര്‍ജ്ജ് ചെയ്തു. “സിദ്ധന്റെ“ മുമ്പില്‍ നഗ്നപൂജയ്ക്കായി ഇരുന്നു കൊടുക്കുവാന്‍ നടികള്‍ അടക്കം ഉള്ള സ്തീകള്‍ക്ക് മടിയില്ലാ എന്ന് മറ്റൊരു കേസുമായി ബന്ധപ്പെട്ട് പുറത്തുവന്ന വാര്‍ത്തകളില്‍ പറയുന്നു. ഈ സിദ്ധന്‍ ഒരു തട്ടിപ്പു വീരന്‍ ആണെന്നും പിന്നീട് പല വിധ കേസുകളിലായി ഇദ്ദേഹം ഇപ്പോള്‍ ജയിലില്‍ ആണെന്നും കൂടെ കൂട്ടി വായിക്കുമ്പോള്‍ ആണ് ഇവര്‍ക്ക് പറ്റിയ അമളിയെ പറ്റി ആലോചിക്കേണ്ടത്. നിത്യ യവ്വനത്തിനും ഐശ്വര്യത്തിനുമായി വെറ്റില സ്വാമിമാര്‍ക്കും മുമ്പില്‍ യാതൊരു മടിയുമില്ലാതെ “നഗ്നപൂജയ്ക്കായി” ഉടുതുണിയഴിക്കും മുമ്പ് ഇതെല്ലാം കാണുവാന്‍ താനും സ്വാമിയും മാത്രമല്ല ഒളിച്ചു വച്ചിരിക്കുന്ന ക്യാമറകളെ പറ്റിയും മലയാളി മങ്കമാര്‍ ഒന്നു കൂടെ ഓര്‍ക്കുന്നത് നല്ലതാണ്.

മാധ്യമങ്ങള്‍ ഇത്തരം പല തട്ടിപ്പുകളും പുറത്തുകൊണ്ടുവരാറുണ്ടെങ്കിലും അന്ധവിശ്വാസങ്ങള്‍ പ്രചരിപ്പിക്കുന്നതില്‍ മുന്‍പന്തിയിലാണ്‌ ചില ടി.വി പരിപാടികള്‍.ഫോണ്‍ ചെയ്താല്‍ ജാതകഫലവും ദോഷനിവാരണവും പ്രവചിക്കുന്ന വിദ്വാനു പക്ഷെ ഇന്ത്യന്‍ ദേശീയരാഷ്ട്രീയത്തിലെ ചില കാര്യങ്ങള്‍ പ്രവചിച്ച്‌ അബദ്ധം പറ്റിയതില്‍ പിന്നെയാണോ എന്നറിയില്ല ഇപ്പോള്‍ അധികം കാണാറില്ല. അങ്ങേരുടെ പ്രോഗ്രാം പലപ്പോഴും കൊള്ളാവുന്ന കോമഡിപ്രോഗ്ഗാമ്മുകളേക്കാളും നിലവാരമുള്ള നര്‍മ്മം പ്രേക്ഷകര്‍ക്ക്‌ നല്‍കിയിരുന്നു എന്നത്‌ സത്യമാണ്‌. ഇതിലും അപ്പുറമാണ്‌ ടി.വിയില്‍ക്കൂടെ നേരിട്ടു കാണിക്കുന്ന ചില "ഇന്‍സ്റ്റന്റ്‌" അല്‍ഭുത രോഗശാന്തി.ദീര്‍ഘകാലമായി മാറാത്ത രോഗങ്ങള്‍ നിമിഷനേരം കൊണ്ട്‌ മാറ്റുന്ന അല്‍ഭുതവിദ്യ പലപ്പോഴും നമ്മുടെ സാമാന്യ ബുദ്ധിയെ ചോദ്യം ചെയ്യുകയും ശാസ്ത്രത്തെ വെല്ലുവിളിക്കുകയും ചെയ്യുന്നു. ഹിപ്നോട്ടിസം കൊണ്ട്‌ അതും മാസ്സ്‌ ഹിപ്നോട്ടിസം കൊണ്ട്‌ അല്‍ഭുതങ്ങള്‍ കാണിക്കാമെന്ന് പല മാന്ത്രികരും അവരുടേ പ്രോഗ്രാമ്മുകളിലൂടെ നമ്മെ ബോധ്യപ്പെടുത്തുന്നുണ്ടെങ്കിലും അതിനെ തട്ടിപ്പായും ദൈവീകപരിവേഷത്തിന്റെ അകമ്പടിയുള്ളതുകൊണ്ട്‌ ഇത്‌ ചോദ്യം ചെയ്യപ്പെടാതെയും ഇരിക്കുന്നു. ഇനി അതവാ ഇത്തരം ഇടങ്ങളില്‍ നിയമവ്യവസ്തയോ പോലീസോ ഇടപെട്ടാല്‍ അതു മത സാമുദായിക തലത്തിലേക്ക്‌ മാറ്റി വിശ്വാസികളെ രംഗത്തിറക്കി രക്ഷപ്പെടുവാനും നടത്തിപ്പുക്കാര്‍ക്ക്‌ നന്നായറിയാം. ഇത്തരം ഒരു സംഭവം അടുത്തകാലത്തുണ്ടായത്‌ മാധ്യമങ്ങളില്‍ നിറഞ്ഞുനിന്നതാണല്ലോ?ദിനം പ്രതി വര്‍ദ്ധിച്ചുകൊണ്ടിരിക്കുന്ന സാമുദായികശക്തികളുടെ വളര്‍ച്ചയും അതിലൂടെ ജനാധിപത്യവ്യവസ്ഥയില്‍ നടത്തുന്ന ഇടപെടലുകളും കേരളസമൂഹത്തെ എവിടെകൊണ്ടെത്തിക്കും?

പ്രസിദ്ധ ഹാസ സാഹിത്യകാരനായിരുന്ന സഞ്ചയന്റെ മാന്ത്ര സിദ്ധിയുള്ള രുദ്രാക്ഷത്തെ പറ്റിയുള്ള കഥ മലയാളിക്കുള്ള വലിയ ഒരു ഗുണപാഠമായിരുന്നു. അല്‍ഭുത സിദ്ധിയുണ്ടെന്ന് പറഞ്ഞു കൊണ്ട് ധാരാളം പരസ്യം നല്‍കി ചാക്കുകണക്കിനു രുദ്രാക്ഷം ശേഖരിച്ച് തപാല്‍ വഴി അയച്ചു കൊടുത്തതായിരുന്നു അതിലെ പ്രതിപാദ്യം. ഇന്നിപ്പോള്‍ മണിക്കൂറുകളോളം ആണ് ധാനകര്‍ഷണ യന്ത്രങ്ങളുടേയും, രുദ്രാക്ഷത്തിന്റേയും, മാന്ത്രിക ഉറുക്കിന്റേയും, ഏലസ്സിന്റേയും, വിവിധങ്ങളായ ചക്രങ്ങളുടേയും പരസ്യങ്ങള്‍ നമ്മുടെ മുഖ്യധാരാ മാധ്യമങ്ങളില്‍ പ്രത്യക്ഷപ്പെടുന്നത്. ആകര്‍ഷകമായ വാക്കുകള്‍ കൊണ്ട് മനുഷ്യനെ വശീകരിക്കുന്ന ഇത്തരം പരസ്യങ്ങളിലെ ഉല്പന്നങ്ങള്‍ക്ക് വെറും 2999, 4999 തുടങ്ങിയ വിചിത്രമായ വിലയും ആയിരിക്കും ഇട്ടിരിക്കുന്നത്.

മലയാളിയുടെ മാനസീകനിലവാരത്തിലുള്ള പോരായമയാണ്‌ പലപ്പോഴും ഇത്തരം അനാരോഗ്യപ്രവണതകള്‍ സമൂഹത്തില്‍ വേരുറപ്പിക്കുവാനുള്ള പ്രധാനകാരണം. ആധുനീക ജീവിതത്തെ പുണരാനും എന്നാല്‍ പാരമ്പര്യത്തെവിടുവാനും സാധിക്കാത്ത ഒരു മനസ്സാണ്‌ ഒരു ശരാശരിമലയാളിയുടേത്‌. ഇതുണ്ടാക്കുന്ന മാനസീക സംഘര്‍ഷങ്ങളിലേക്കാണ്‌ ഇത്തരം തട്ടിപ്പുകാര്‍ കടന്നുവരുന്നത്‌. പിന്നെ ചില ദിവ്യന്മാരുടെ അനുയായി എന്നുപറയുന്നത്‌ ഒരു സോഷ്യല്‍ സ്റ്റാറ്റസ്‌ സിംബലായിമാറിയിരിക്കുന്നു. വീണ്ടും ഒരു സാസ്കാരിക/ശാസ്ത്ര വിപ്ലവം ഉണ്ടാകേണ്ടിയിര്‍ക്കുന്നു. വിദ്യാസമ്പന്നരായ അന്ധവിശ്വാസികളുടെ ഒരു സമൂഹമായി അതിവേഗം മലയാളി അധ:പതിക്കുന്നു എന്നതാണ്‌ യാദാര്‍ത്ഥ്യം.

സ്വാമി വിവേകാനന്ദന്റെ "കേരളം ഒരു ഭ്രാന്താലയമാണെന്ന്" അയിത്തവും ജാതിവ്യവസ്ഥയും നടമാടിയിരുന്ന കേരളത്തെക്കുറിച്ച്‌ എത്രയോ വര്‍ഷങ്ങള്‍ക്ക്‌ മുമ്പ്‌ പറഞ്ഞ പ്രസിദ്ധമായവാക്കുകള്‍ കേരളത്തെ സംബന്ധിച്ചിടത്തോളം അനുദിനം പ്രസക്തി വര്‍ദ്ധിച്ചുകൊണ്ടിരിക്കുന്നു. ഭ്രാന്താലയം മാത്രമല്ല ഇപ്പോള്‍ ഇത്തരം അന്ധവിശ്വാസ ഉല്പന്നങ്ങളുടെ ബ്രാന്റമ്പാസിഡര്‍ മാരായി മലയാളിയും മാറിക്കൊണ്ടിരിക്കുന്നു.



എസ്. കുമാര്‍ , പാര്‍പ്പിടം




സര്‍ക്കാര്‍ വെബ് പോര്‍ട്ടല്‍

സര്‍ക്കാര്‍ വെബ് പോര്‍ട്ടല്‍

കേരള സര്‍ക്കാര്‍ ഓണ്‍ ലൈന്‍ സിസ്റ്റം മുഖം മിനുക്കുന്നു.

കേരള സര്‍ക്കാരിന്റെ ഔദ്യോഗിക വെബ് പോര്‍ട്ടല്‍ ആയ www.kerala.gov.in ആധുനികമായ സൗകര്യങ്ങളോടെ ജനങ്ങള്‍ക്ക്‌ മുന്‍പില്‍ അവതരിപ്പിക്കപ്പെടുന്നു. വിവിധ സര്‍ക്കാര്‍ വകുപ്പുകളുടെ വിവരങ്ങള്‍ യഥാസമയം കൃത്യമായും സുതാര്യമായും ജനങ്ങള്‍ക്ക്‌ ലഭ്യമാകാന്‍ വേണ്ടി അതതു വകുപ്പുകള്‍ നേരിട്ടായിരിക്കും ഈ വെബ് പോര്‍ട്ടലില്‍ വിവരങ്ങള്‍ രേഖപ്പെടുത്തുക. കണ്ടന്റ് മാനേജ്മെന്റ് ഫ്രെയിം വര്‍ക്ക് (സി.എം.എഫ്.) എന്ന ആധുനിക സൌകര്യത്തിലേക്ക് മാറുന്നതോടെ ഈ വെബ് പോര്‍ട്ടല്‍ നിരവധി സര്‍ക്കാര്‍ ഇ സേവനങ്ങളുടെ പ്രവേശന കവാടമാകും. പല സര്‍ക്കാര്‍ ഇടപാടുകളും ഈ സൌകര്യത്തിലൂടെ നടത്തുക വഴി പൊതു ജനങ്ങള്‍ക്ക്‌ സമയവും പണച്ചിലവും ലാഭിക്കാന്‍ ഉതകും. സമീപ ഭാവിയില്‍ വിവര സാങ്കേതിക രംഗത്ത് വരുന്ന നവീന പദ്ധതികളെ ഉള്‍ക്കൊള്ളാന്‍ സാധിക്കും വിധമാണ് ഈ പോര്‍ട്ടല്‍ സി ഡിറ്റ്‌ തയ്യാര്‍ ചെയ്തിരിക്കുന്നത്.

കേരളത്തിന്റെ ചരിത്രം, സംസ്ക്കാരം, സാഹിത്യം ,കല, വിനോദ സഞ്ചാരം, എന്നിവയെക്കുറിച്ചുള്ള വിവരങ്ങള്‍ക്ക് പുറമേ മന്ത്രിമാരെ ഇ മെയിലില്‍ ബന്ധപ്പെടാനുള്ള സൗകര്യം , പരാതി പരിഹാര സെല്ലിലെക്കുള്ള ഇ മെയില്‍ സംവിധാനം ,സര്‍ക്കാര്‍ ഉത്തരവുകള്‍ , വിവിധ കമ്മീഷനുകള്‍, പൊതു മേഖലാ സ്ഥാപനങ്ങള്‍ , തദ്ദേശ സ്വയം ഭരണ സ്ഥാപനങ്ങള്‍, സര്‍വ്വകലാശാലകള്‍ , ബോര്‍ഡുകള്‍ എന്നിവയെക്കുറിച്ചുള്ള വിവരങ്ങളും പലവിധ കാര്യങ്ങള്‍ക്കായുള്ള അപേക്ഷാ ഫോറങ്ങള്‍ എന്നിവ പോര്‍ട്ടലില്‍ നിന്നും ഡൌണ്‍ ലോഡ് ചെയ്തു പൊതു ജനങ്ങള്‍ക്ക്‌ ഉപയോഗപ്പെടുത്താനും സാധിക്കും.

നവീകരിച്ച വെബ് പോര്‍ട്ടലിന്റെ ഉദ്ഘാടനം 2011 ഫെബ്രുവരി 5 നു വൈകിട്ട് 3.30 നു തൈക്കാട് സര്‍ക്കാര്‍ ഗസ്റ്റ് ഹൌസ് വേദിയില്‍ ബഹു കേരള മുഖ്യമന്ത്രി ശ്രീ വി .എസ്‌. അച്യുതാനന്ദന്‍ നിര്‍വ്വഹിക്കും.
.

പോപ്പുലർ പോസ്റ്റുകൾ