സമരമില്ലാത്ത കലാലയം പ്രതിഷേധമില്ലാത്ത സമൂഹം

എസ്. കുമാര്‍
പ്രതികരിക്കുകയും പ്രതിഷേധിക്കുകയും ചെയ്യുക എന്നത് ആരോഗ്യകരമായ ഒരു വ്യവസ്ഥിതി നിലനില്‍ക്കുന്ന ഒരു സമൂഹത്തിന്റെ ലക്ഷണമാണ്. ക്രിയാത്മകമായ പ്രകടനങ്ങളും പ്രതിഷേധങ്ങളും പ്രതികരണങ്ങളും യഥാര്‍ത്ഥത്തില്‍ ശുഭസൂചകങ്ങളാണ്. അതുതന്നെയാണ് ജനാധിപത്യത്തിന്റെ ശക്തിയും സൌന്ദര്യവും. എന്നാല്‍ സമരമില്ലാത്ത കലാലയങ്ങളും പ്രതിഷേധമില്ലാത്ത സമൂഹവും എന്നത് ജനാധിപത്യ വിരുദ്ധരുടെയും ഏകാധിപതികളുടേയും ഏറ്റവും വലിയ സ്വപ്നങ്ങളില്‍ ഒന്നാണ്. ഓരോ സമൂഹത്തിന്റേയും പുതുനാമ്പുകള്‍ വളര്‍ന്നുവരുന്നത് കലാലയങ്ങളില്‍ നിന്നുമാണ്. ജീവിതത്തിന്റെ മുന്നോട്ടുള്ള പ്രയാണത്തില്‍ കരുത്തും ഊര്‍ജ്ജവും പകരുന്നതില്‍ സമൂഹത്തോടൊപ്പം കലാലയജീവിതത്തിനും അവിടെ നിന്നും ആര്‍ജ്ജിക്കുന്ന അറിവിനും തുല്യപ്രാധാന്യം ഉണ്ട്. ആനിലക്ക് ജനാധിപത്യ വ്യവസ്ഥിതിയില്‍ ജീവിക്കുന്ന ഏതൊരു ആളുടേയും ജനാധിപത്യ - രാഷ്ടീയ സങ്കല്‍പ്പങ്ങള്‍ തീര്‍ച്ചയായും കലായങ്ങളില്‍ നിന്നും തന്നെ രൂപപ്പെടേണ്ടതുണ്ട്, പ്രത്യേകിച്ചും വോട്ടവകാശം ആരംഭിക്കുന്നത് 18 വയസ്സിലാണെന്നിരിക്കെ, ജനാധിപത്യ ബോധവും പ്രതികരണ ശേഷിയും ഉള്ള ഒരു യുവജനത വളര്‍ന്നുവന്നെങ്കിലേ ജനാധിപത്യം എന്ന സങ്കല്‍പ്പം തന്നെ മുന്നോട്ട് പോകുകയുള്ളൂ. അതുകൊണ്ടുതന്നെ വിദ്യാലയങ്ങളില്‍ രാഷ്ടീയത്തിനു പ്രസക്തിയുണ്ട്. ജനാധിപത്യം എന്ന ആശയത്തിന്റെ അടിസ്ഥാനം മനസ്സിലാക്കുവാനും അതിനെ ഉള്‍ക്കൊള്ളുവാനും വിദ്യാര്‍ഥി രാഷ്ടീയം യുവതലമുറയെ വളരെയധികം സഹായിക്കുന്നുണ്ട്. സമൂഹത്തിനു വേണ്ടി പ്രവര്‍ത്തിക്കുവാന്‍ ഉള്ള ബോധം, നേതൃത്വ ഗുണങ്ങള്‍ എന്നിവ ആര്‍ജ്ജിക്കുന്നതില്‍ ഇതിനു വലിയ പങ്കാണുള്ളത്.

പിന്‍ വാതിലിലൂടെ ജനാധിപത്യത്തിന്റെ പദവികളില്‍ കയറിയിരിക്കുന്നവരെ മാറ്റിനിര്‍ത്തിയാല്‍ (ഇത്തരക്കാര്‍ക്ക് സാധാരണക്കരുള്‍പ്പെടുന്ന സമൂഹത്തോടുള്ള പ്രതിബദ്ധത തീരെ കുറവായിരിക്കും എന്ന് അനുഭവസാക്ഷ്യം) ഇന്നു ഇന്ത്യന്‍ ജനാധിപത്യത്തിന്റെയും രാഷ്ടീയ സംഘടനകളുടേയും മുന്‍നിരയില്‍ ഉള്ള നേതാക്കന്മാരില്‍ തൊണ്ണൂറു ശതമാനവും ഇത്തരത്തില്‍ കലാലയ രാഷ്ടീയത്തിന്റെ സംഭാവനയാണ്. പഴയ തലമുറയിലെ ആയാലും പുതിയ തലമുറയിലെ ആയാലും നിരവധി സാമാജികര്‍ ഇത്തരത്തില്‍ വിവിധ ക്യാമ്പസ്സുകളുടെ സംഭാവനയാണ്. വിദ്യാര്‍ഥിരാഷ്ടീയം വിദ്യാഭ്യാസത്തെ ഇല്ലാതാക്കും, ലക്ഷ്യങ്ങളില്‍ നിന്നും വ്യതിചലിപ്പിക്കും എന്നൊക്കെ പലരും പറയുന്നത് കേള്‍ക്കാം. എന്നാല്‍ വിദ്യാര്‍ഥി രാഷ്ടീയം സജീവമായി ഉണ്ടായിരുന്ന ക്യാമ്പസ്സുകളുടെ സംഭാവനകള്‍ ഇന്നും ഇന്ത്യന്‍ രഷ്ടീയത്തിലും മറ്റും ഉന്നത പദവികള്‍ അലങ്കരിക്കുന്നു. മുന്‍ രാഷ്ട്രപതിയും, സുപ്രീം കോടതി ചീഫ് ജസ്റ്റിസും എല്ലാം ഇത്തരം കലാലായങ്ങളിലെ പഠിതാക്കള്‍ ആയിരുന്നു.

ഇന്ത്യന്‍ സ്വാതന്ത്ര സമരത്തില്‍ നിര്‍ണ്ണായകമായ സ്ഥാനം വഹിച്ചവരാണ് അന്നത്തെ വിദ്യാര്‍ഥിസമൂഹം. സ്വാതന്ത്രാനന്തര ഇന്ത്യയില്‍ ഇന്ദിരാഗാന്ധി കൊണ്ടുവന്ന അടിയന്തിരാവസ്ഥയ്ക്കെതിരെ ഇന്ത്യയിലെ അങ്ങോളമിങ്ങോളമുള്ള ക്യാമ്പസ്സുകള്‍ ശക്തമയാണ് പ്രതികരിച്ചത്. കേരളത്തിലെ ക്യാമ്പസ്സുകള്‍ അടിയന്തിരാവസ്ഥയ്ക്കെതിരെ സക്രിയവും സജീവവുമായ ഇടപെടലാണ് നടത്തിയത്. അടിയന്തിരാവസ്ഥാവിരുദ്ധ പ്രതിഷേധങ്ങള്‍ക്കിടയില്‍ രാജന്‍ രക്തസാക്ഷിയായി. ബെന്‍‌ഹര്‍ ക്രൂരമായ പീഠനങ്ങള്‍ക്ക് ഇരയായി. എന്നാല്‍ അതൊക്കെ ഭരണകൂടഭീകരതയ്ക്കെതിരെ പ്രതികരിക്കുവാന്‍ യുവജനതയ്ക്ക് കൂടുതല്‍ ഊര്‍ജ്ജം പകരുകയാണുണ്ടാത്. തുടര്‍ന്നും പോരാട്ടങ്ങളുടെ വലിയ ഒരു ചരിത്രമാണ് കേരളത്തിലെ ക്യാമ്പസ്സുകള്‍ക്ക് പറയുവാന്‍ ഉള്ളത്. ചരിത്രം എന്നാല്‍ വിദ്യാര്‍ഥിരാഷ്ടീയത്തിന്റെ ഘട്ടം ഘട്ടമായുള്ള വന്ധ്യം കരണം ആണ് ഇന്ന് കേരള സമൂഹത്തില്‍ നടന്നുകൊണ്ടിരിക്കുന്നത്. പലപ്പൊഴും ഒറ്റപ്പെട്ട ചില സംഭവങ്ങളുടെ പേരില്‍ വിദ്യാലയ രാഷ്ടീയത്തെ സംബന്ധിച്ച് കോടതികളുടെ ഇടപെടലും മറ്റും ഉണ്ടാകുകയും ചെയ്യുന്നു.

പുതിയ വിദ്യാഭ്യാസ സമ്പ്രദായങ്ങളും സാമൂഹിക ക്രമങ്ങളും വിദ്യാഭ്യാ‍സത്തെ കച്ചവടവല്‍ക്കരിച്ചു. ഇതിന്റെ ഭാഗമായി അവനവന്റെ സുഖസൌകര്യങ്ങളെ ഉറപ്പുവരുത്തുന്നതിലേക്ക് ചിന്തയെ ചുരുക്കുന്ന ഒരു രീതി യുവതലമുറയില്‍ ശക്തിപ്പെട്ടുവരുന്നു. വിദ്യാഭ്യാസത്തെ കേവലം ബിരുദ കടലാസുകള്‍ മാത്രമായി കാണുമ്പോല്‍ അത് വിദ്യാഭ്യാസം എന്ന പ്രക്രിയയുടെ യഥാര്‍ത്ഥ ലക്ഷ്യത്തില്‍ നിന്നും വളരെ അകലെയാണെന്ന് തിരിച്ചറിയാതെ പോകുന്നു. പഠനമെന്നാല്‍ പാഠപുസ്തകത്തില്‍ നിന്നും ആര്‍ജ്ജിക്കുന്ന വിഞ്ജാനമാണെന്നും കൂടുതല്‍ മാര്‍ക്കും എന്ട്രന്‍സ് റാങ്കുമാണ് ലക്ഷ്യമിടേണ്ടതെന്നും ഓരോ വിദ്യാര്‍ഥിയേയും ഓര്‍മ്മിപ്പിക്കുവാന്‍ പലകോണുകളില്‍ നിന്നും ഉപദേശങ്ങള്‍ എത്തുന്നു. എന്നാല്‍ വിശാലമായ ലോകത്ത് ജീവിക്കുവാന്‍, കലാലയ ജീവിതം നല്‍കുന്നത് കേവലം ബിരുദങ്ങള്‍ മാത്രമല്ല പല തരത്തിലുള്ള അനുഭവങ്ങളും അതു നല്‍കുന്ന ജീവിത കാ‍ഴ്ചപ്പാടുമാണ്.

വിദ്യാഭ്യാസത്തെ കച്ചവടമാക്കിയവരെ സംബന്ധിച്ച് ലാഭം ഉണ്ടാക്കുക എന്നതു മാത്രമായിരിക്കും ഏക ലക്ഷ്യം. എന്നാല്‍ ഇത്തരം കച്ചവടതാല്പര്യങ്ങള്‍ക്ക് പലപ്പോഴും തടസ്സമാകുക വിദ്യാര്‍ഥിരാഷ്ടീയമായിരിക്കും. അതിനാല്‍ തന്നെ ആ “ശല്യത്തെ” ഒഴിവാക്കുവാന്‍ ഉള്ള “കരുക്കള്‍“ പല കോണുകളില്‍ നിന്നും അവര്‍ നീക്കിക്കൊണ്ടിരിക്കും. ചെറിയ സംഭവങ്ങള്‍ പോലും പ്രകോപനങ്ങളിലൂടെ പെരുപ്പിക്കും. വലിയ പ്രചാരണങ്ങള്‍ നടത്തും. വാര്‍ത്തകളെ വിറ്റും വ്യഭിചരിച്ചും കാശുണ്ടാക്കുവാന്‍ മത്സരിക്കുന്നവര്‍ ഇതിനെ വളച്ചൊടിച്ച് തെറ്റായ വ്യാഖ്യാനങ്ങളും ദു:സ്സൂചനകളും നല്‍കി അവതരിപ്പിക്കും. ഇത്തരക്കരുടെ വിജയമാണ് വിദ്യാര്‍ഥിരാഷ്ടീയത്തെ വിവിധ നിയമങ്ങളിലൂടെ നിയന്ത്രിക്കുന്നതിലൂടെ ആഘോഷിക്കപ്പെടുന്നത്. ഇവരുടെ തുടര്‍ച്ചയായുള്ള പ്രചാരണങ്ങളില്‍ പലപ്പോഴും സമൂഹത്തിലെ ഒരു വിഭാഗമെങ്കിലും വിശ്വസിച്ചുപോകും. എന്നാല്‍ വിദ്യാര്‍ഥി രാഷ്ടീയത്തെ സംരക്ഷിക്കുമെന്ന സര്‍ക്കാര്‍ നിലപാട് ഇക്കാര്യത്തില്‍ ഒരു ആശ്വാസമായി കരുതാവുന്നതാണ്.

വിദ്യാര്‍ഥി സംഘടനകള്‍
കേരളത്തിലെ ഏതാണ്ട് എല്ലാ ക്യാമ്പസ്സുകളിലും സജീവമാണ് വിദ്യാര്‍ഥിസംഘടനകള്‍. കുപ്രചാരകര്‍ പറയുന്ന പോലെ കേവലം സമരങ്ങള്‍ നടത്തുവാന്‍ മാത്രം രൂപീകരിക്കപ്പെട്ടവയല്ല അവ. അവര്‍ വിദ്യാര്‍ഥികളുടെ ഇടയില്‍ സര്‍ഗ്ഗാത്മകമായ പ്രവര്‍ത്തനങ്ങളും നടത്തുന്നുണ്ട്. കേരളത്തില്‍ ഏറ്റവും അധികം വിദ്യാര്‍ഥികള്‍ പിന്തുണക്കുന്ന, വിദ്യാര്‍ഥി പ്രശ്നങ്ങളില്‍ സജീവമായി ഇടപെടുന്ന സംഘടനകള്‍ തീര്‍ച്ചയായും ഇടതുപക്ഷ വിദ്യാര്‍ഥി പ്രസ്ഥാനങ്ങള്‍ ആണ്. ഇക്കാര്യത്തില്‍ എന്നും എസ്.എഫ്.ഐ എന്ന സംഘടന മുന്‍ പന്തിയില്‍ ഉണ്ട്. എസ്.എഫ്.ഐ, എ.ഐ.എസ്.എഫ്, കെ.എസ്.യു, കെ.വി.എസ് തുടങ്ങിയ മതേതര ജനാധിപത്യ കാഴ്ചപ്പാടുള്ള സംഘടനകളില്‍ നിന്നും വിഭിന്നമായി ചില വര്‍ഗ്ഗീയ വിദ്യാര്‍ഥിസംഘടനകളും ക്യാമ്പസ്സുകളില്‍ ഇടം പിടിക്കുവാന്‍ തുടങ്ങിയിരിക്കുന്നു. വിദ്യാര്‍ഥി സംഘടനകളുടെ പേരില്‍ പ്രവര്‍ത്തിക്കുന്ന, എന്നാല്‍ തികച്ചും മതവിശ്വാസത്തില്‍ അതിഷ്ഠിതമായ ആശയങ്ങളുമായി പ്രവര്‍ത്തിക്കുന്ന /സങ്കുചിത മത ചിന്തകള്‍ മുദ്രാവാക്യമാക്കുന്ന സംഘങ്ങള്‍ പലപ്പോഴും അപകടകാരികളാണ്. ഇവര്‍ വിദ്യാര്‍ഥി സമൂഹത്തെ മതപരമായി വേര്‍തിരിക്കുകയും അവര്‍ക്കിടയില്‍ വര്‍ഗ്ഗീയതയുടെ വിഷവിത്തുകള്‍ പാകുവാന്‍ ശ്രമിക്കുകയും ചെയ്യുന്നു. ഇത്തരം സംഘടനകള്‍ ജനാധിപത്യപരവും സര്‍ഗ്ഗാത്മകവുമായ പ്രവര്‍ത്തനങ്ങളേക്കാള്‍ കൂടുതല്‍ ഊന്നല്‍ നല്‍കുക മതവിശ്വാസത്തിന്റെ അടിസ്ഥാനത്തില്‍ ഉള്ള കാര്യങ്ങള്‍ക്കായിരിക്കും തീര്‍ച്ചയായും ഈ ആശയഗതികള്‍ വിശാലമായ ജനാധിപത്യ പ്രസ്ഥാനങ്ങളുടെ കൊടിക്കീഴില്‍ നിന്നും, ഇടുങ്ങിയതും സാമുദായിക ചിന്തയുടെ ഇരുള്‍ നിറഞ്ഞ ആശയങ്ങളുടെ ലോകത്തേക്ക് വിദ്യാര്‍ഥി സമൂഹത്തെ നയിക്കും. ഇത്തരം സംഘങ്ങള്‍ വളരുന്നത് ജനാധിപത്യമെന്ന വിശാലമായ കാഴ്ചപ്പാടിന് ഒരുനിലക്കും പ്രയോജനകരമാകില്ല.

സമൂഹത്തില്‍ നിന്നും സമുദായത്തിലേക്ക്
സമുദായത്തില്‍ നിന്നും സമൂഹത്തിലേക്ക് സേവനം വികസിപ്പിച്ച ഒരു തലമുറയുടെ പിന്‍ഗാമികള്‍ ഇന്നു സമൂഹത്തില്‍ നിന്നും സമുദായത്തിലേക്ക് ചുരുങ്ങുവാന്‍ നിര്‍ബന്ധിതരായിക്കൊണ്ടിരിക്കുന്നു. അതിനുള്ള ഒരുക്കങ്ങള്‍ അണിയറയില്‍ തകൃതിയായി നടക്കുന്നു. സമുദായങ്ങള്‍ വിദ്യാഭ്യാസമേഖലയില്‍ അനുദിനം പിടിമുറുക്കിക്കൊണ്ടിരിക്കുന്നു. കാരുണ്യവും ദയയും എല്ലാം പ്രസംഗത്തില്‍ ഒതുക്കി, വിദ്യാഭ്യാസത്തെയും ആതുരസേവനത്തേയും കച്ചവടവല്‍ക്കരിച്ചുകൊണ്ടിരിക്കുന്നു. സമുദായനാമത്തില്‍ പലതും നേടിയെടുക്കുകയും കോഴപ്പണത്തിന്റെ അടിസ്ഥാനത്തില്‍ സീറ്റുകള്‍ വില്‍ക്കുകയും ചെയ്തുകൊണ്ടിരിക്കുന്നു. അതാതു സമുദായത്തില്‍ പെട്ടവര്‍ അവരുടെ സമുദായത്തിലെ വിദ്യാഭ്യാസ സ്ഥാപനങ്ങളില്‍ തന്നെ പഠിക്കണം എന്ന് ഉപദേശങ്ങളും പ്രചാരണഘോഷങ്ങളും നടത്തുകയും ചെയ്യുന്നു. മക്കളുടെ “നല്ല ഭാവിയെ“ കരുതിയും മതപഠനത്തിനും മറ്റുമുള്ള സൌകര്യവും പരിഗണിച്ച് പലരും ഇത്തരം വിദ്യാലയങ്ങളില്‍ മക്കളെ ചേര്‍ക്കുന്നു. അന്യസമുദായക്കാരുമായുള്ള ഇടപെടലിനു സാധ്യമാകാതെ വളരുന്ന വിദ്യാര്‍ഥികള്‍ അവിടത്തെ ഇടുങ്ങിയ ചട്ടക്കൂടില്‍ നിന്നും ആര്‍ജ്ജിക്കുന്ന അറിവുമായിട്ടായിരിക്കും പുറത്തുവരിക. ഇതുമൂലം പലപ്പോഴും അവരുടെ മനസ്സില്‍ വിശാലമായ സാമൂഹിക കാഴ്ചപ്പാടിനു പകരം അന്യമത വിദ്വേഷത്തിന്റേയും സമുദായത്തെ മാത്രം മുന്നില്‍ കണ്ടുകൊണ്ടുമുള്ള ഒരു വീക്ഷണവും ആയിരിക്കും ഉണ്ടാകുക. രാജ്യത്തേക്കാള്‍ വലുതാണ് സമുദായം എന്ന സങ്കുചിത ചിന്ത വളരുവാന്‍ സാധ്യതയുള്ള അന്തരീക്ഷത്തില്‍ നിന്നും പഠനം പൂര്‍ത്തിയാക്കി വരുന്ന സാധാരണ വിദ്യാര്‍ഥിയുടെ, ചിന്തയും ജനാധിപത്യ സങ്കല്പവും സങ്കുചിതമാകാനേ വഴിയുള്ളൂ. കേരളത്തില്‍ തീവ്രവാദ സംഘടനകള്‍ പിടിമുറുക്കുന്നതിന്റേയും കാശ്മീര്‍ അടക്കമുള്ള സ്ഥലങ്ങളിലേക്ക് യുവാക്കളെ തീവ്രവാദത്തിനായി റിക്രൂട്ട്മെന്റ് നടത്തുന്നതിന്റേയും വാര്‍ത്തകള്‍ നമ്മെ അലോസരപ്പെടുത്തുന്നു. അരാഷ്ടീയമായ ക്യാമ്പസ്സുകള്‍ ഇത്തരക്കാര്‍ക്ക് വളരെ എളുപ്പം റിക്രൂട്മെന്റ്റ് കേന്ദ്രങ്ങളായി മാറ്റുവാന്‍ ബുദ്ധിമുട്ടുണ്ടാകില്ല.

സ്വന്തം സമൂഹത്തിനും രാജ്യത്തിനും അസ്വസ്ഥതയും ദുരന്തവും നല്‍കുന്ന പ്രവര്‍ത്തനങ്ങളിലൂടെ സമുദായത്തിനോ മതത്തിനോ എന്തു നേട്ടം എന്നു ചിന്തിക്കണമെങ്കില്‍ ഇത്തരക്കാരുടെ നീരാളിപ്പിടുത്തത്തില്‍ നിന്നും കുതറിമാറുവാന്‍ യുവതലമുറയ്ക്കാകണം. ഇന്ന മതത്തില്‍ ‍/ സമുദായത്തില്‍ പെടുന്നവന്‍ എന്ന സങ്കുചിതമായ സ്വത്വബോധമല്ല, മറിച്ച് വിശാലമായ വര്‍ഗ്ഗബോധമാണ് യഥാര്‍ത്ഥ ജനാ‍ധിപത്യവിശ്വാസിക്ക് ഉണ്ടാകേണ്ടത് എന്നതുപോലെ സമുദായ ബോധമല്ല, മറിച്ച് ജനാധിപത്യ ബോധമാണ് ഒരു ജനാധിപത്യ സമൂഹത്തില്‍ വളര്‍ന്നു വളര്‍ന്നുവരുന്ന തലമുറക്ക് ഉണ്ടാകേണ്ടത്.

ജനവിരുദ്ധ സമരങ്ങള്‍
സമരങ്ങള്‍ക്ക് പൊതുജന പിന്തുണ നഷ്ടപ്പെടുന്നത് പലപ്പോഴും അതിന്റെ ലക്ഷ്യവും രീതിയും ശരിയായ രീതിയില്‍ ആകാതെ വരുമ്പോളാണ്. മനുഷ്യന്റെ സഞ്ചാരത്തിനും സ്വാതന്ത്രത്തിനും വിഘാതം സൃഷ്ടിക്കുകയും സ്വത്തുക്കള്‍ക്കും ജീവനും നാശം ഉണ്ടാക്കുകയും ചെയ്യുമ്പോള്‍ അത് ജനവിരുദ്ധ സമരമായി മാറുന്നു. ഇത്തരം സമരങ്ങള്‍ക്ക് ജനങ്ങളില്‍ നിന്നും എതിര്‍പ്പു വരിക സ്വാഭാവികമാണ്. അപ്രതീക്ഷിതമായ ബന്ദും ഹര്‍ത്താലും എല്ലാം ജനങ്ങളെ വല്ലാതെ ബുദ്ധിമുട്ടിക്കുന്നു. രാഷ്ടീയപാര്‍ട്ടികളുടെ ഗുണ്ടകള്‍ കൊല്ലപ്പെടുമ്പോള്‍ ഉണ്ടാകുന്ന ബന്ദ് പോലെയല്ല രാജ്യത്തിന്റെ പരമാധികാരം സാമ്രാജ്യത്വത്തിനു മുമ്പില്‍ അടിയറ വെക്കുന്നതിന് എതിരായുള്ള സമരങ്ങള്‍. പലപ്പോഴും അത് തിരിച്ചറിയാതെ സമരങ്ങള്‍ അടിച്ചേല്‍പ്പിക്കുന്ന രാഷ്ടീയ പ്രസ്ഥാനങ്ങള്‍ക്കും ഉത്തരവാദിത്വം ഉണ്ട്. ഇതു തന്നെയാണ് വിദ്യാഭ്യാസ മേഖലയിലും സംഭവിക്കുന്നത്. വിദ്യാഭ്യാസ രംഗത്തെ ചൂഷണത്തിനെതിരെ ഉള്ള സമരം അനിവാര്യമാകുമ്പോള്‍ തന്നെ, കോപ്പിയടിച്ച നേതാവിനെതിരെ നടപടിയെടുക്കുന്ന സര്‍വ്വകലാശാലാ അധികൃതര്‍ക്കെതിരെ നടത്തുന്ന സമരം. ഈ അന്തരം ശരിയായ രീതിയില്‍ മനസ്സിലാക്കി ഔചിത്യപൂര്‍ണ്ണമായി പലപ്പോഴും കൈകാര്യം ചെയ്യപ്പെടാതെ പോകുന്നതും വിദ്യാര്‍ഥിസമരത്തിന്റെ പേരില്‍ വിദ്യാഭ്യാസ സ്ഥാപനത്തെ അടിച്ചുതകര്‍ക്കുന്നതും പലപ്പോഴും വിപരീത ഫലം സൃഷ്ടിക്കുന്നു. ഇത്തരം ദൃശ്യങ്ങള്‍ പകര്‍ത്തിയെടുത്ത് കൂടെ കൂടെ പ്രദര്‍ശിപ്പിക്കുകയും അത് ഒരു പരിധിവരെ നീതിന്യായ പീഠങ്ങളെ പോലും സ്വാധീനിക്കുവാന്‍ ഇടവരുത്തുകയും ചെയ്യുമ്പോള്‍, പരാജയപ്പെടുന്നത് ജനാധിപത്യവും വിജയിക്കുന്നത് മുതലാളിത്വവുമാണ്. അവര്‍ എറിഞ്ഞുകൊടുക്കുന്ന ചൂണ്ടക്കുരുക്കില്‍ കൊത്തി പിടയുന്നവരുടെ ദൃശ്യങ്ങളായും ഈ തച്ചുടക്കലുകളെ വ്യാഖ്യാനിക്കാം. അണികള്‍ക്ക് ആവേശം പകരാം, എന്നാല്‍ അവരെ നിയന്ത്രിക്കുവാനും പതിയിരിക്കുന്ന ചതികളെപറ്റിയും മുന്നറിയിപ്പുകൊടുത്ത് ശരിയായ പാതയിലൂടെ അവരെ നയിക്കുവാന്‍ ഇവിടത്തെ വിദ്യാര്‍ഥി / രാഷ്ടീയ നേതൃത്വത്തിനും സമൂഹത്തിനും ഉത്തരവാദിത്വമുണ്ട്. ഏതാനും ചില അനിഷ്ട സംഭവങ്ങളുടെ പേരില്‍ വിദ്യാര്‍ഥിരാഷ്ടീയത്തെ നിരോധിച്ചും പ്രവര്‍ത്തകരെ വിരട്ടിയും ഇല്ലാതാക്കുകയല്ല, മറിച്ച് അതിനെ ക്രിയാത്മകവും സര്‍ഗ്ഗാത്മകവും ആക്കി നിലനിര്‍ത്തുകയാണ് വേണ്ടത്. സമരമില്ലാത്ത കലാലയം പ്രതിഷേധമില്ലാത്ത സമൂഹം എന്നത് അരാഷ്ടീയതയിലേക്കാകും നമ്മെ കൊണ്ടെത്തിക്കുക. അതുകൊണ്ടുതന്നെ വിദ്യാര്‍ഥി രാഷ്ടീയത്തെ ഇല്ലാതാക്കണം എന്ന് പറയുമ്പോള്‍ ഒരുനിമിഷം ഓര്‍ക്കുക അരാഷ്ടീയമായ ഒരു സമൂഹം ഏകാതിപത്യത്തിന്റേയും അരാജകത്വത്തിന്റേയും വിളനിലമായിരിക്കും. അവ ഭീകരതയ്ക്ക് സര്‍വസ്വതന്ത്രമായി താണ്ഡവമാടുവാന്‍ ഉള്ള വേദിയുമാകും.

Download This Post In PDF Format

20 Responses to "സമരമില്ലാത്ത കലാലയം പ്രതിഷേധമില്ലാത്ത സമൂഹം"

  1. അരാഷ്ടീയമായ ഒരു സമൂഹം ഏകാതിപത്യത്തിന്റേയും അരാജകത്വത്തിന്റേയും വിളനിലമായിരിക്കും. അവ ഭീകരതയ്ക്ക് സര്‍വസ്വതന്ത്രമായി താണ്ഡവമാടുവാന്‍ ഉള്ള വേദിയുമാകും.

    തികച്ചും പ്രസക്തമായ ലേഖനം.......

    ReplyDelete
  2. എന്റെ ഒന്നാം ക്ലാസില്‍ പഠിക്കുന്ന മകള്‍ പോവുന്നത് ഒരു അണ്‍എയ്ഡഡ് സ്ക്കൂളില്‍ ആണ്.

    അതിനാല്‍ തന്നെ, എന്റെ മകളെ (അത് എന്തിന്റെ പേരിലാലായാലും)ചേര്‍ത്ത സ്കൂളില്‍ ഒരു തരത്തിലുമുള്ള രാഷ്ടീയപ്രവര്‍ത്തനവും ഇല്ല.

    പറയുന്നതും പ്രവര്‍ത്തിക്കുന്നതും ഒന്നാവുന്നവര്‍ക്കേ, ആ വിഷയത്തില്‍ കമാ എന്നോരു അക്ഷരം പറയാന്‍ അവകാശമുള്ളു..

    അല്ലാത്തതെല്ലാം വെറും ഗീര്‍വാണം അടിയാണ്. ഇത് എഴുതിയ ആളും, ഇനി ഇതില്‍ കമന്റ് ഇടാന്‍ പോവുന്ന ആളും സ്വന്തം മനസാക്ഷിയോട് ചോദിച്ചിട്ട് കമന്റും, പ്രതികമന്റും ഇടട്ടെ.

    കാപട്യമേ നിന്റെ പേരോ മലയാളീ....... എന്ന് ഞാന്‍ തന്നെ സ്വയം വിളിച്ച് കൂവിയാല്‍ നാണക്കേട് എനിക്ക് തന്നെയല്ലേ.

    രാഷ്ടീയബോധമുള്ള ഒരു പൌരയാക്കി അവളെ വളര്‍ത്താമെന്ന് എനിക്ക് ആശിക്കാം.

    ReplyDelete
  3. വിദ്യാർഥിരാഷ്ടീയം കണ്ടും കേട്ടും അനുഭവിച്ചും വളർന്ന കൃത്യമായ രാഷ്ടീയം ഉള്ള വ്യക്തിയാണ് ഇത് എഴുതിയ ആൾ. എന്നാൽ പൂർണ്ണമായും ഏതെങ്കിലും പാർടി വിധേയത്വം എന്നത് തീരെ ഇല്ലതാനും.

    ReplyDelete
  4. മേടയിലിരുന്ന് അച്ചന്മാര്‍ ഭരിക്കുന്ന, മതഭ്രാന്തന്മാരായ മുല്ലമാര്‍ നയിക്കുന്ന, അഴിമതിവീരന്മാരായ ജഡ്ജിമാര്‍ വിധിക്കുന്ന സമത്വസുന്ദരമായ കേരളം നമുക്ക് സ്വപ്നം കാണാം!!

    ReplyDelete
  5. രാഷ്ട്രീയമെന്നാൽ കക്ഷിരാഷ്ട്രീയമാണുദ്ദേശിക്കുന്നതെങ്കിൽ അതിന്റെ വിദ്യാലയങ്ങളിൽ നിന്നും മാറ്റി നിർത്തുന്നതാണു നല്ലതെന്നാണു എന്റെ അഭിപ്രായം.

    ReplyDelete
  6. വികലമായ സാമൂഹിക വീക്ഷണം ഉള്ളവര്‍ നേതൃത്വത്തിലേക്ക് തിക്കികയറാന്‍ ശ്രമിക്കുന്നതിന്റെ നല്ല ഉദാഹരണം തന്നെ ഈ ലേഖകനും ലേഖനവും. മൂല്യങ്ങള്‍ ഇല്ലാത്തവര്‍ അക്രമ വാസനയിലൂടെയും നശീകരണപ്രതികരണത്തിലൂടെയും രാഷ്ട്രീയ സാംസ്‌കാരിക നേതാക്കളാവുക ഇന്ന് വളരെ എളുപ്പമാണ്. അതിനു പലപ്പോഴും സമൂഹത്തിന്റെ അസ്തിത്വത്തെ അവഹേളിച്ചു പരിഹസിച്ചു പുതിയ തലമുറയ്ക്ക് മറ്റൊരു സന്ദേശം നല്‍കുകയാണ്.

    ഭാരതത്തിന്റെ അസ്ഥിത്വം കണ്ടെത്തണമെങ്കിലും അത് പകര്‍ന്നു കൊടുക്കണമെങ്കിലും അല്പം ബുദ്ധിമുട്ടാണ്. അതിനാല്‍ ഏതു ശുംഭനും വളരെ പെട്ടെന്ന് തലയില്‍ കേറുന്നതും ഭക്ഷണവും, ജോലിയും സമത്വവും അല്ലാതെ മറ്റൊന്നും ചിന്തിക്കാനില്ലാത്തതും ആയ ഇന്‍സ്റ്റന്റ് / ഫാസ്റ്റ് ഫുഡ്‌ ആദര്‍ശങ്ങളെ യുവ തലമുറയിലേക്കു തിരുകികയറ്റാന്‍ ശ്രമിക്കുന്നത് ഏതു ആഗോളവല്‍കരണത്തിന്റെയുംസാമ്രാജ്യത്ത്വവാദികളുടേയും അജണ്ടയാണ് എന്ന് ജനങ്ങള്‍ തിരിച്ചറിയണം. പൈതൃകമായ ആദര്‍ശങ്ങള്‍ എന്തുകൊണ്ട് അവഹെളിക്കപെടുന്നു ഇന്ന്?. സഹിഷ്ണതയും സഹവര്‍ത്തിത്വവും എന്തെ അന്യമാവുന്നു?
    മാനുഷീക മൂല്യങ്ങള്‍ക്കും വ്യെക്തിമൂല്യങ്ങള്‍ക്കും ദൈവീക സത്യങ്ങള്‍ക്കും ബദലായി വിപ്ലവ ആദര്‍ശങ്ങള്‍ യുവാക്കളില്‍ എത്തിക്കുന്നതിന് ആരാണ് ഇത്ര വെപ്രാള പെടുന്നത്.

    ഈ ലേഖനം ഒരു താക്കീതാണ്. ഈശ്വര ചൈതന്യം നശിച്ച സാമൂഹിക നന്മകളെ ചവിട്ടിമെതിക്കുന്ന ഒരു നാളേക്ക് വേണ്ടി ഇത്തരം വ്യാപകമായ പ്രവര്‍ത്തനങ്ങള്‍ നടക്കുന്നു. സമൂഹത്തിന്റെയും വ്യെക്തികളുടെയും ഭാവി ഏതാനും രാഷ്ട്രീയ രാക്ഷസര്‍ തീരുമാനിക്കുന്ന കാര്യങ്ങളിലേക്ക് കൊണ്ടെത്തിക്കും, ഇത്തരം ചിന്താഗതിക്കാര്‍.

    സ്വയം അറിയുവാനും പരസ്പരം അറിയുവാനും ഭാരത സത്യങ്ങളെ ജനങ്ങള്‍ കൂടുതല്‍ അറിയാന്‍ ശ്രമിക്കട്ടെ.

    "തമസോമ ജ്യോതിര്‍ഗമയ
    അസതോമാസദ്ഗമയ
    മൃത്യോര്‍മ അമൃതംഗമയ
    ഓം ശാന്തി ശാന്തി ശാന്തി"

    ReplyDelete
  7. -ഇന്ത്യാ താങ്കളുടെ കമന്റ് വായിച്ചു.
    ജനാധിപത്യം അല്ലാതെ എന്താണ് ഇദ്ദേഹം മുന്നോട്ടുവെക്കുന്ന ഭരണക്രമം?

    ReplyDelete
  8. ദൈവീകസത്യങ്ങെളെ വളച്ചൊടിച്ചും വിപണനം ചെയ്തും ആണല്ലോ ഇവിടെ തീവ്രവാദികളും വ്യാജ ദൈവങ്ങളും വളരുന്നത്. അല്ലെന്ന് അഭിപ്രായം ഉണ്ടോ? ദൈവത്തെ സംരക്ഷിക്കുവാൻ മനുഷ്യൻ വളും വെട്ടോത്തിയും ബോംബും എടുക്കണം എന്നാണോ നിങ്ങളുടെ വീക്ഷണം?

    സമൂഹത്തിന്റെ ഭാവി ജനങ്ങൾ തിരഞ്ഞെടുക്കുന്നവരോ അതോ ഏതെങ്കിലും മതത്തിന്റെ പേരിൽ ഏതാനും ഭീകരന്മാർ ആണോ തീരുമാനിക്കേണ്ടത്?

    ReplyDelete
  9. സുഹൃത്തേ, ജനാധിപത്യത്തെ കുറിച്ച് വാ തോരാതെ സംസാരിക്കുന്നവരുടെ നടുവിലാണ് നമ്മള്‍ ജീവിക്കുന്നത്. അതുകൊണ്ട് അതിന്റെ വിശദീകരണം ആവശ്യമില്ല. എന്നാലും ജനാധിപത്യത്തിന്റെ അടിസ്ഥാന ഘടകങ്ങള്‍ ഇവയാണ് എന്നാണു എന്റെ വിശ്വാസം.

    •Guarantee of basic Human Rights to every individual person vis-à-vis the state and its authorities as well as vis-à-vis any social groups (especially religious institutions) and vis-à-vis other persons.
    •Separation of Powers between the institutions of the state:
    Government [Executive Power],
    Parliament [Legislative Power] und
    Courts of Law [Judicative Power]
    •Freedom of opinion, speech, press and massmedia
    •Religious liberty
    •General and equal right to vote (one person, one vote)
    •Good Governance (focus on public interest and absence of corruption)

    പക്ഷെ മുകളില്‍ കാണിച്ച ജനാധിപത്യ അടിസ്ഥാന തത്വങ്ങള്‍ അതിന്റെ പൂര്‍ണമായ അര്‍ത്ഥത്തില്‍ നമ്മുടെ സമൂഹത്തില്‍ അനുവര്‍ത്തിക്കുന്നു എന്ന് നിങ്ങള്ക്ക് മുന്‍വിധിയില്ലാതെ സ്വതന്ത്രമായി പറയുവാന്‍ സാധിക്കുമോ?
    ജനാധിപത്യ തത്വങ്ങള്‍ക്ക് വിപരീതമായി നടക്കുന്നത് ഇവയാണ്


    Totalitarian regime Government by a little group of leaders on the basis of an ideology, that claims general validity for all aspects of life and usually attempts to replace religion. The regime does not tolerate any deviation from its state ideology. Regime opponents are persecuted, tortured, detained in concentration camps and members of ethnic minorities are killed in mass executions (genocide).
    Historic examples of totalitarian regimes include: National Socialism (Germany under Hitler, 1933-1945) and Stalinism.
    Authoritarian regime Government by a little group of leaders. In contrast to totalitarian regimes, authoritarian regimes have no distinct state ideology and grant some amount of freedom (e.g. economic and cultural) as long as their rule is not jeopardized. The most important goal of authoritarian regimes is the maintenance of power and the personal enrichment on cost of the country and its population.
    Theocracy "Government by God": in reality this means government by religious leaders. Usually a certain interpretation of ancient religious laws replaces modern forms of law and is enforced with utmost severity.

    ജനാധിപത്യത്തിനു പകരം Monarchy, Aristocracy, Oligarchy, Theocracy, Dictatorship ഒന്നും ഞാന്‍ ആവശ്യപെടുന്നില്ല.
    പകരം ഓരോ വ്യെക്തിയുടെയും സ്വാതന്ത്ര്യം മാനിക്കപ്പെടുന്ന അവകാശങ്ങള്‍ സംരക്ഷിക്കപെടുന്നതായിരിക്കണം ജനാധിപത്യം. കൂടാതെ ബഹുഭൂരിപക്ഷത്തിന്റെ താല്പര്യം മാനിക്കുന്നതും ആയിരിക്കണം.
    ഒരു ആത്മ പരിശോധന നടത്തുന്നത് നല്ലതായിരിക്കും.

    ReplyDelete
  10. ലേഖനം അല്പം നീണ്ടുപോയോ എന്നൊരു സംശയം . കാര്യമാത്രപ്രസക്തമാകി ചുരുക്കി പറഞ്ഞിരുന്നെങ്കില്‍ കൂടുതല്‍ നന്നായിരുന്നു.

    പൊതുവേ ലേഖനത്തോടു വലിയ വിയോജിപ്പില്ലെങ്കിലും പൊതുവേ കഷിരാഷ്ട്രീയതിനനുകൂലമായ നിലപാടാണ് ലേഖനകാരന്‍ കൈക്കൊള്ളുന്നതെന്നും മനസ്സിലാകുന്നു. ഒന്ന് ചോദിക്കട്ടെ, എന്തുകൊണ്ടാണ് എല്ലാറ്റിനും നന്നായി പ്രതികരിക്കുമായിരുന്നു എന്ന് ലേഖനകാരന്‍ തന്നെ പറയുന്ന നമ്മുടെ സമൂഹം ഇങ്ങനെ സ്വന്തം കാര്യ മാത്രം നോക്കുന്ന സമൂഹമായി പരിണമിച്ചത്‌? ഉത്തരവും ലേഖകന്‍ തന്നെ പറയുന്നു. "ഇന്നു ഇന്ത്യന്‍ ജനാധിപത്യത്തിന്റെയും രാഷ്ടീയ സംഘടനകളുടേയും മുന്‍നിരയില്‍ ഉള്ള നേതാക്കന്മാരില്‍ തൊണ്ണൂറു ശതമാനവും ഇത്തരത്തില്‍ കലാലയ രാഷ്ടീയത്തിന്റെ സംഭാവനയാണ്. പഴയ തലമുറയിലെ ആയാലും പുതിയ തലമുറയിലെ ആയാലും നിരവധി സാമാജികര്‍ ഇത്തരത്തില്‍ വിവിധ ക്യാമ്പസ്സുകളുടെ സംഭാവനയാണ്." ശരിയാണ് ഈ കലാലയ രാഷ്ടീയത്തിന്റെ സംഭാവനയായ നേതാക്കന്മാരെ കാണുന്നതുകൊണ്ട് തന്നെയാണ് നമ്മുടെ മക്കള്‍ അങ്ങനെയാവരുത് എന്ന് നാം ആഗ്രഹിക്കുന്നത്. ഇന്ന് കലാലയ രാഷ്ടീയം എന്നത് അക്രമരാഷ്ട്രീയമാണെന്നു പോതുസമൂഹത്തെക്കൊണ്ട് ചിന്തിപ്പിക്കാനിടയാക്കിയതും ഇതേ നേതാക്കളുടെ പ്രവര്‍ത്തികളും അവരുടെ അനുയായികളും തന്നെയല്ലേ ? രാഷ്ട്രീയം എന്നത് ചതിയും വഞ്ചനയും അഴിമതിയും ആഭാസത്തരവും നിറഞ്ഞതാണ്‌ എന്ന് സമൂഹത്ത്തിനെക്കൊണ്ട് പറയിപ്പിക്കാന്‍ ഇടവരുത്തിയത് കച്ചവടക്കാരും ബൂര്‍ഷ്വാകളുമല്ല പകരം ഈ നേതാക്കന്മാരും ഇവരുടെ ശിങ്കിടികളുമാണ് . ഇന്ന് രാഷ്ട്രീയക്കാരന്‍ എന്ന് പറഞ്ഞാല്‍ തന്നെ കള്ളന്‍ എന്നാ വിചാരമാണ് ജനത്തിനു. അതിനും കാരണക്കാര്‍ ആരാണ്? ഈ നേതാക്കന്മാര്‍ നോക്കിയാല്‍ ഇത് മാറ്റാന്‍ സാധിക്കുമോ? അവര്‍ക്ക് തങ്ങളുടെ കസേര ഉറപ്പിക്കാന്‍ ഈ കള്ളത്തരങ്ങള്‍ വേണം. അതാണ്‌ പറയുന്നത് കള്ളനു കഞ്ഞിവെച്ചരാണ് നാം മാതൃകയായി കാണുന്ന ഈ കലാലയ രാഷ്ട്രീയ നേതാക്കള്‍ ! പിന്നെങ്ങനെ എന്റെ മക്കളെ അതുപോലെയുള്ള നേതാക്കന്മാരുടെ മാതൃക സ്വീകരിക്കാന്‍ ഞാന്‍ പറയും. അതുകൊണ്ട് കലാലയത്തില്‍ രാഷ്ട്രീയം ഇല്ലെങ്കില്‍ മറ്റുപലതും വളരുമെന്നുള്ളതില്‍ ഞാന്‍ യോജിക്കുന്നുണ്ടെങ്കിലും ഈ മൂല്യച്യുതി വന്ന അക്രമരാഷ്ട്രീയം കലാലയത്തില്‍ ഇല്ലാതിരിക്കുന്നതാണ് നല്ലത്. അവനവനു വേണമെങ്കില്‍ നന്നാകാം വേണ്ടെങ്കില്‍ നശിക്കാം എന്നതാണ് ഇന്നത്തെ കലാലയ അന്തരീക്ഷം. അതുകൊണ്ട് നന്നാവനമെന്നാഗ്രഹമുല്ലവനെങ്കിലും നന്നാവാമല്ലോ !

    അല്ലെങ്കില്‍ വെറുതെ ഗീര്‍വാണവും വെല്ലുവിളിയും നടത്താതെ വിദ്യാര്‍ഥികളുടെ നന്മാക്കുതകുന്നത് എന്തെങ്കിലും ചെയ്തു കാണിക്കട്ടെ. ഏതെങ്കിലും ഒരു നേതാവ് കാണിച്ച തോന്ന്യവാസത്തിന് ഒത്താശ ചെയ്യാന്‍ ഒരു കോളേജിലെ വിദ്യാര്‍ത്തികളെ മുഴുവന്‍ ശിക്ഷിക്കുന്നതല്ലേ ഇപ്പോഴും ഇവരുടെ പ്രവര്‍ത്തന രീതി?

    പിന്നെ ഭീകരത എന്നതൊക്കെ നിര്‍വചിക്കുന്നത് നമ്മള്‍ തന്നെയല്ലേ? ഇഷ്ടമില്ലാത്തച്ചി തൊട്ടതെല്ലാം കുറ്റം . ഞാന്‍ ചെയ്‌താല്‍ അത് അടിച്ചമര്‍ത്തപ്പെട്ടവന്റെ സ്വാഭാവിക പ്രതികരണം (കാരണം അധികാരം എന്റെ കൈയിലാണ്) എനിക്കനുകൂലമല്ലാത്തവന്‍ ചെയ്‌താല്‍ അത് ഭീകരത !

    ഇത് പറഞ്ഞ ഞാന്‍ കൊടും ഭീകരന്‍ !

    ReplyDelete
  11. രാഷ്ട്രീയം കക്ഷിരാഷ്ട്രീയത്തിന്‌ വഴിമാഴിയതാണ്‌ നമ്മുടെ ശാപം... സ്വത്വകക്ഷിരാഷ്ട്രീയം...

    കലാലയങ്ങളെ ചൂണ്ടയിൽ കുരുക്കിയത്‌ കച്ചവടക്കാർ എന്ന്‌ വിളിച്ച്‌ ആക്ഷേപിക്കപ്പെട്ടവർ അല്ല... കക്ഷിരാഷ്ട്രീയത്തിന്റെ ചാവേറുകളായി കലാലയം കലുഷിതമാക്കിയവർ ആണ്‌...

    “വിദ്യ” അഭ്യസത്തെ പിന്നാമ്പുറങ്ങളിലേക്ക്‌ തള്ളി സമരാഭാസം മാത്രമേ നടത്തു എന്ന്‌ വാശി പിടിക്കുന്ന കുട്ടിരാഷ്ട്രീയക്കാർ രാഷ്ട്രീയ നേതാക്കളുടെ ചട്ടുകങ്ങളായി വർത്തിക്കുമ്പോൾ... ജനാധിപത്യവാദികളും പറഞ്ഞുപോകും ഈ കുട്ടിരാഷ്ട്രീയക്കാരെ നിയന്ത്രിക്കേണ്ട സമയം അതിക്രമിച്ചിരിക്കുന്നു...

    ReplyDelete
  12. വിദ്യാലയങ്ങളിലെ അരാഷ്ട്രീയവല്‍ക്കരണം സംബന്ധിച്ച ഈ ലേഖനം വളരെ മികച്ചതാണ്. എന്നാല്‍ കേവലം വിദ്യാലയങ്ങളിലൊതുങ്ങി നില്‍ക്കുന്നതല്ല ഈ പ്രശ്നം. എന്റെ മുന്‍‌ലേഖനത്തില്‍ ചൂണ്ടിക്കാ‍ണിച്ച വിഷയങ്ങളോട് ചേര്‍ത്തു വായിയ്ക്കാവുന്നതാണ് ഈ പ്രശ്നവും.ഒരു ലേഖനത്തിലോ കമന്റിലോ ഒതുക്കാവുന്നതിലും വലുതാണ് ഈ വൃത്തത്തിന്റെ വ്യാസം. ഗൌരവമായ പഠനങ്ങള്‍ നടക്കേണ്ടിയിരിയ്ക്കുന്നു, എന്താണ് കേരളത്തില്‍ സംഭവിയ്ക്കുന്നത് എന്നതിനെപറ്റി.
    തൊണ്ണൂറുകള്‍ മുതല്‍ ആരംഭിച്ച അപചയം ക്രമാനുഗതമായി വര്‍ദ്ധിച്ച് ഇന്ന് ആപല്‍ക്കരമായ അവസ്ഥയിലേയ്ക്കെത്തിയിരിയ്ക്കുന്നു.
    സാമ്പത്തിക ഉദാര-ആഗോളവല്‍ക്കരണം, ദൃശ്യമാധ്യമങ്ങളുടെ അതിപ്രസരം, ഇവയുടെ സ്വാധീനത്താലുണ്ടായ രാഷ്ട്രീയ അപചയം എന്നിവയാണ് മുഖ്യകാരണങ്ങള്‍ .
    നരസിംഹ റാവു-മന്മോഹന്‍ സിംഗ് കാലഘട്ടത്തിലുണ്ടായ ഉദാരവല്‍ക്കരണ ഫലമായി ആഗോള “ഫൈനാന്‍സ് “ മൂലധനം, അതായത് പണം, ഇങ്ങോട്ട് കുത്തിയൊഴുകി. നേരത്തെ ഇത് പല നിയന്ത്രണങ്ങള്‍ക്കും വിധേയമായി ഉല്പാദന ഉപാധികളായിട്ടാണ് വന്നിരുന്നത്. അതു കൊണ്ടു തന്നെ അതിന് ചില നല്ലവശങ്ങളുണ്ടായിരുന്നു. അത് തൊഴില്‍ അവസരങ്ങള്‍ സൃഷ്ടിയ്ക്കുന്നു, പണം സമൂഹത്തില്‍ വിതരണം ചെയ്യപ്പെടാന്‍ ഇടയാക്കുന്നു. ചുരുക്കത്തില്‍ വികസത്തിനു സഹായിയ്ക്കുന്നു.എന്നാല്‍ മുതലാളിയ്ക്ക് ചില അസൌകര്യങ്ങള്‍ (ഉദാ: തിരികെ കടത്തിക്കൊണ്ടു പോകാന്‍ )ഉണ്ടായിരുന്നു. താരതമ്യേന ലാഭവും കുറവായിരുന്നു.
    മൂലധനം പണമായി ഒഴുകിയതോടെ അത് സര്‍വമേഖലകളിലും കടന്നു ചെന്ന് ലാഭം ഉല്പാദിപ്പിച്ചു തുടങ്ങി. എന്നാല്‍ തൊഴില്‍ ഉല്പാദനം കാര്യമായി നടത്തിയതുമില്ല. ആഗോള മുതലാളിയ്ക്ക് എപ്പോള്‍ വേണമെങ്കിലും തന്റെ മൂലധനം തിരികെ കടത്താനുമാവും.

    ReplyDelete
  13. ഇത് സമൂഹത്തില്‍ കടുത്ത അസന്തുലിതാവസ്ഥയാണ് സൃഷ്ടിക്കുന്നത്. ചിലയിടങ്ങളില്‍ കുമിഞ്ഞു കൂടുന്ന പണം സ്വര്‍ഗം സൃഷ്ടിയ്ക്കുമ്പോള്‍ , അതിന്റെ ക്ഷാമം മൂലം ഭൂരിപക്ഷമിടങ്ങളിലും നരകമാണുണ്ടാകുക. മാധ്യമങ്ങളും ഭരണകൂടവും സമ്പത്ത് കുമിഞ്ഞുകൂടിയ ഇടത്തിന്റെ താല്പര്യങ്ങള്‍ക്കനുസരിച്ച് നീങ്ങാന്‍ തുടങ്ങും. അത് സുഗമമായി നടക്കാന്‍ മറുവശത്തെ നിര്‍വീര്യമാക്കേണ്ടതുണ്ട്. അതിനായി ആശയ വന്ധ്യംകരണം ആരംഭിയ്ക്കുന്നു. അതിന്റെ ആദ്യപടിയാണ് അരാഷ്ട്രീയവല്‍ക്കരണം. അത് തുടങ്ങേണ്ടത് മുളയില്‍ തന്നെയാണ്. അതാണ് ഇന്ന് വിദ്യാലയങ്ങളില്‍ സംഭവിയ്ക്കുന്നത്. അതിന് വെള്ളവും വളവും നല്‍കാന്‍ ആഗോള ഫിനാന്‍സ് മൂലധനം ആവേശിച്ച ജുഡീഷ്യറിയും മുന്‍പിലുണ്ട്. ഇതാണ് ഇവിടുത്തെ വര്‍ത്തമാനകാല സ്ഥിതി.
    കുറെക്കാലം മുന്‍പുവരെ ആദര്‍ശങ്ങള്‍ക്ക് സമൂഹത്തില്‍ വലിയ വിലയുണ്ടായിരുന്നു, പണത്തേക്കാളധികം. സമ്പന്നനെക്കാള്‍ എത്രയോ ഉയരത്തിലായിരുന്നു ദരിദ്രനായ രാഷ്ട്രീയപ്രവര്‍ത്തകന്റെ, സാംസ്കാരിക പ്രവര്‍ത്തകന്റെ വില. എന്നാലിന്നോ? മുതലാളിമാര്‍ സ്വന്തം പേരില്‍ മറ്റുള്ളവരെക്കൊണ്ട് എഴുതിയ്ക്കുന്നു, സിനിമ സംവിധാനം ചെയ്യുന്നു, ചാനല്‍ നടത്തുന്നു, പത്രം നടത്തുന്നു, എന്തിന് പരസ്യങ്ങള്‍ പോലും സ്വന്തം മുഖശ്രീയാല്‍ അനുഗ്രഹീതമാക്കുന്നു. അതായത് പണമുണ്ടെങ്കില്‍ എന്തും നേടാം എന്ന സന്ദേശം സമൂഹത്തിലേയ്ക്ക് പരോക്ഷമായി നല്‍കുന്നു. ചാനലുകള്‍ എല്ലാ ആഡംബരങ്ങളുടെയും പ്രചാരകരാകുന്നു. ആദര്‍ശങ്ങളെ അടിച്ചുടയ്ക്കാനും അരാഷ്ട്രീയം പ്രചരിപ്പിയ്ക്കാനും ഓവര്‍ടൈം പണിയെടുക്കുന്നു.
    ഇങ്ങനെ എല്ലാം “പണ“കേന്ദ്രീകൃതമായ സമൂഹം, ആദര്‍ശങ്ങള്‍ക്കു പകരം അശാന്തി സ്വീകരിച്ച്, ആചാരങ്ങളിലേയ്ക്ക് മടങ്ങിപ്പോകുന്നു. അവിടെയ്ക്ക് വര്‍ഗീയതയും ജാതിചിന്തകളും തള്ളിക്കയറി അടിമുടി ആപത്തിലേയ്ക്കു നീങ്ങുന്നു നാം.
    ഈ അപചയം ബാധിച്ച രാഷ്ട്ര്രീയപാര്‍ട്ടികളും ഈയവസ്തയ്ക്കുത്തരവാദികളാണ്. ആര് ആരെ കുറ്റപ്പെടുത്തും?

    ReplyDelete
  14. ഈ വിഷയത്തിലും ഇതുമായി ബന്ധപ്പെട്ട വിഷയങ്ങളിലുമെല്ലാം പലയിടങ്ങളിലും പ്രതികരിച്ചിട്ടുള്ളതു കൊണ്ട് വീണ്ടും അതെല്ലാം എഴുതാന്‍ മടി.

    കലാലയങ്ങള്‍ മാത്രമല്ല, സമൂഹത്തെ ഒന്നാകെ തന്നെ അരാഷ്ട്രീയവല്‍ക്കരിക്കുക എന്ന അജണ്ടയാണു ഇവിടെ ചിലര്‍ നടപ്പിലാക്കാന്‍ ശ്രമിക്കുന്നത്.കലാലയങ്ങള്‍ അതിന്റെ ഒരു ഭാഗം മാത്രം.ജനാധിപത്യത്തിന്റെ മൂന്നു പ്രധാന വിഭാഗങ്ങള്‍ ഒന്നായ കോടതിയും അതിനു ചൂട്ടു പിടിച്ചു കൊടുത്തത് തെറ്റായിപ്പോയി.അരാഷ്ട്രീയവല്‍ക്കരിക്കപ്പെടുന്ന ൊരു സമൂഹത്തില്‍ ജാതി മത വര്‍ഗീയ ശക്തികള്‍ക്ക് കടന്നു കയറാന്‍ വളരെ എളുപ്പമാണ്.അതു വഴി സാമ്രാജ്യത്വം ഉദ്ദേശിച്ച രീതിയില്‍ കാര്യങ്ങള്‍ ചെന്നെത്തുന്നു.കലാലയങ്ങളിലും ഏതെങ്കിലും ജാതി മത വിദ്യാര്‍ത്ഥി സംഘടനകള്‍ക്ക് പ്രവര്‍ത്തിക്കാന്‍ ഇഅവര്‍ വിലക്ക് ഏര്‍പ്പെടുത്തിയിട്ടില്ല.മാനേജ്‌മെന്റിന്റെ ആശിര്‍വാദത്തോടെ അത്തരം സംഘടനകള്‍ നാടൊട്ടുക്ക് പ്രവര്‍ത്തിക്കുന്നത് പകല്‍ പോലെ വ്യക്തമാണ്.ഇതു വഴി സമൂഹത്തോട് ഉത്തരവാദിത്വം ഇല്ലാത്തതും സ്വാര്‍ത്ഥത മാത്രം കൈമുതലുമായിട്ടുള്ള ഒരു തലമുറയെയെയാണു ഇവര്‍ സൃഷ്ടിക്കുന്നത്..

    ReplyDelete
  15. ഇന്ന് ക്യാമ്പസ്സുകളില്‍ നില്‍ക്കുന്ന കക്ഷിരാഷ്ട്രീയത്തിക് അധിഷ്ഠിതമായ വിദ്യാര്‍ത്ഥി രാഷ്ട്രീയത്തോട് വിയോജിപ്പാണ്‍ ഉള്ളത്. പലപ്പോഴും ക്രിയാത്മകമായി ഇടപെടുന്നു എന്ന് ലേഖകന്‍ തന്നെ അവകാശപ്പെടുന്ന ഇടതുപക്ഷ വിദ്യാര്‍ത്ഥിസംഘടനകള്‍ മാതൃസംഘടനയുടെ താല്പര്യങ്ങള്‍ക്ക് വഴങ്ങുന്ന കാഴ്ച പലപ്പോഴും കാണാന്‍ സധിക്കും. ഒരു നല്ല ഉദാഹരണം ഈ നാലു വര്‍ഷത്തിനിടയ്ക്ക് വിവിധ സര്‍വ്വകലാശാലകള്‍ ട്യുഷന്‍ ഫീസ്, പരീക്ഷാ ഫീസ് ഇനങ്ങളില്‍ വരുത്തിയ വര്‍ദ്ധനവും ഈ വിദ്യാര്‍ത്ഥിസംഘടനകള്‍ പ്രതിക്ഷേധിച്ച രീതിയും നോക്കിയാല്‍ മനസ്സിലാകും. അമിതമായ രാഷ്ട്രീയ ക്യാമ്പസ്സുകളില്‍ നന്നല്ല എന്നു തന്നെ ഞാന്‍ കരുതുന്നു.

    ReplyDelete
  16. കലാലയങ്ങളിൽ കാവിക്കാരും കൈവെട്ടുകാരും ആധിപത്യം ഉറപ്പിച്ചാൽ അതോടെ വിദ്യാഭ്യാസമേഘലയും വരും നാളുകളും എങ്ങനെയിരിക്കും? കൈവെട്ട് വരാനിരിക്കുന്ന വൻ വിപത്തുക്കളുടെ സൂചനയായി കണ്ട് അതിനെ സമൂഹവും ഭരണകൂടവും ശക്തിയായി പ്രതിരോധിക്കുകതന്നെ വേണം. കേരളത്തെ മറ്റൊരു കാശ്മീരോ കാബൂളോ ആക്കുവാൻ അനുവദിക്കരുത്.

    ReplyDelete
  17. ഹാവൂ... പടിഞ്ഞാറന്‍ നാടുകളില്‍ എസ്.എഫ്.ഐ ഇല്ലാത്തതുകൊണ്ട് എല്ലാവരും ശുംഭന്മാരായി പോയി അല്ലേ മാഷേ? കൊള്ളാ‍ാം തല്ലിപ്പോളിക്കൂ എല്ലാ വിദ്യാലയങ്ങളും.. ഒരൊറ്റ കുട്ടി പോലും പാസാവരുത്.. നേതാക്കളുടെ മക്കള്‍ പഠിക്കുന്നത് ലണ്ടനിലല്ലേ!

    ReplyDelete
  18. പ്രസക്തമായ വിഷയം നല്ല ലേഖനം

    ReplyDelete
  19. സമുദായത്തില്‍ നിന്നും സമൂഹത്തിലേക്ക് സേവനം വികസിപ്പിച്ച ഒരു തലമുറയുടെ പിന്‍ഗാമികള്‍ ഇന്നു സമൂഹത്തില്‍ നിന്നും സമുദായത്തിലേക്ക് ചുരുങ്ങുവാന്‍ ര്‍ബന്ധിതരായിക്കൊണ്ടിരിക്കുന്നു. അതിനുള്ള ഒരുക്കങ്ങള്‍ അണിയറയില്‍ തകൃതിയായി നടക്കുന്നു.
    പലരും ശ്രദ്ധിക്കാതെ പോയതും എന്നാൽ ഈ ലേഖനത്തിലെ പ്രസക്തവുമായ ഒരു സംഗതിയാണിത്.

    മതപഠനത്തിലേക്ക് കൂടുതൽ ഊന്നൽ നൽകിക്കൊണ്ടിരിക്കുന്നു. സമൂഹം എന്നത് തനിക്കും മറ്റുള്ളവർക്കും തുല്യമായ അവകാശം ഉള്ളതാണെന്ന ബോധത്തിനു പകരം തന്റെ സമുദായത്തിന്റെ ഒരു സമൂഹം കെട്ടിപ്പടുക്കുക എന്ന മൌലീകവാദികളുടെ അജണ്ടകൾക്ക് മുൻ തൂക്കം ലഭിക്കുവാൻ ഇത് ഇടവരുത്തിയേക്കും. ഏതു തീവ്രവാദിയും ഇപ്പോൾ ഉന്നയിക്കുന്ന ഒരു കാര്യം ഉണ്ട്. ഞങ്ങൾ സമുദായത്തെ ഉദ്ധരിക്കുവാൻ ശ്രമിക്കുന്നതുകൊണ്ടാണ് നിയമവും രാഷ്ടീയക്കാരും തങ്ങൾക്ക് നെരെ തിരിയുന്നതെന്ന്. കറതീർന്ന “ പുത്തൻ വിശ്വസിയെ“ സംബന്ധിച്ച് ഇത് വിശ്വസിക്കുവാതിരിക്കുവാൻ ആകില്ല. എന്നൽ യദാർഥ വിസ്വാസിയെ സംബന്ധിച്ച് ഇതിലെ അസത്യം മനസ്സിലാക്കുവാനും തള്ളിക്കളയുവാനും ആകും.

    ഒരു കള്ളനെ/ഭീകരനെ പിടികൂടിയാൽ അല്ലെങ്കിൽ അവനു വേണ്ടി പോലീസ് തിരച്ചിൽ നടത്തിയാൽ അതിനെ മതത്തിനെർതിരയുള്ള കടന്നുകയറ്റമായി ചിത്രീകരിച്ച് അക്രമികൾ രക്ഷപ്പെടുവാൻ ശ്രമിക്കുന്നു. ഇത് ശരിയല്ല.

    കേരളത്തിലെ ഇന്ന് നിലനിൽക്കുന്ന രാഷ്ടീയത്തോടുള്ള അങ്ങേയറ്റത്തെ വിരോധം നിലനിർത്തിക്കൊണ്ട് തന്നെ ഈ ലേഖനത്തിൽ ചില യാദാർഥ്യങ്ങൾ ഉണ്ടെന്ന് സമ്മതിക്കുന്നു.

    ReplyDelete

നമ്മുടെ ബൂലോകത്തില്‍ ലേഖനങ്ങള്‍ എഴുതുന്നവര്‍ വായനക്കാരുടെ അഭിപ്രായങ്ങള്‍ ആഗ്രഹിക്കുന്നു. നിങ്ങളുടെ അഭിപ്രായങ്ങള്‍ മടിക്കാതെ കമന്റ് ചെയ്യൂ.....

പോപ്പുലർ പോസ്റ്റുകൾ